ဖဲ ယလဲၤဟးအိၣ်သကိး ပှၤဆါတဂၤလၢ တၢ်ဆါဟံၣ်အကတီၢ်, ကသံၣ်သရၣ်ဖိတဖၣ် လၢအတၢ်လဲၤခီဖျိတအိၣ်တဖု ဆၢထၢၣ်သကိးဝဲဒၣ်, ဒီးလၢအဝဲသ့ၣ်အကျါ, ကသံၣ်သရၣ်သးစၢ်ဖိတဂၤ အတၢ်မၤအဃိ, ယကမၢကမၣ်ဘၣ်ယသးန့ၣ်လီၤ. ကသံၣ်သရၣ်ဖးဒိၣ်လၢ အတၢ်လဲၤခီဖျိ အိၣ်အါတဂၤ တဲနၢ်ပၢၢ် ပှၤဆါအတၢ်အိၣ်ဆူၣ်
အိၣ်ချ့အဂ့ၢ်န့ၣ်ဒီး, ကသံၣ်သရၣ်သးစၢ်ဖိတဖုန့ၣ် ဒိကနၣ်ဝဲဒၣ်လီၤ. ပှၤဆါတဂၤအံၤ, လၢတၢ်တဆိကမိၣ်အပူၤန့ၣ် အထးခိၣ်ထီၣ်ဖျဲးဝဲဒၣ်လၢ အတၢ်အဲၣ်ဒိးလဲၤဟးအ့ၣ်ဟးဆံၣ်, ဒီးအနီၢ်ကစၢ်ဒၣ်ဝဲ ဝံၣ်ဆၢထၢၣ်အသးတန့ၢ်ဘၣ်. နီၢ်နီၢ်န့ၣ်, ဒ်သိးပှၤကကိး သရၣ်မုၣ်ကဟဲမၤစၢၤအီၤအဂီၢ်န့ၣ် အိၣ်ခိးဝဲတသ့လၢၤဘၣ်အဃိန့ၣ်လီၤ.

ဖဲတၢ်မၤအသးဒ်သိးအံၤအကတီၢ်, ကသံၣ်သရၣ်သးစၢ်ဖိန့ၣ် ဟံးန့ၢ် တၢ်ဟးလီၢ် အသလၢ, ဒီးမၤစၢၤဝဲဒၣ်ပှၤဆါန့ၣ်လီၤ. ဖဲ သရၣ်မုၣ်မၤစၢၤတၢ် ဟဲတုၤန့ၣ်ဒီး, ထံၣ်ဝဲလၢပှၤမၤစၢၤတ့ၢ်လံ ပှၤဆါအဃိ, ကမၢကမၣ်ဘၣ်အသးန့ၣ်လီၤ. လၢတၢ်ပာ်သးကဖၢလၢအပူၤန့ၣ် ပှၤအခိၣ် ကသံၣ်သရၣ်ဖးဒိၣ်န့ၣ် အၢၣ်လီၤပာ်ပနီၣ် ကသံၣ်သရၣ်သးစၢ်ဖိ အတၢ်မၤစၢၤန့ၣ်လီၤ.

ကစၢ်ယ့ၣ်ရှူး ကမၤစၢၤ ပှၤဟီၣ်ခိၣ်ဖိတဖၣ်အဂီၢ်န့ၣ် တဟံးဃာ် အတၢ်မ့ၢ်တၢ်ယွၤအန့ဆၢၣ်, ဒီးတဂ့ၢ်လိာ်ဝဲဒၣ်ဘၣ်. ကစၢ်ယ့ၣ်ရှူး “အိၣ်ဒီးယွၤအက့ၢ်အဂီၤ ဒီးပာ်အသးထဲသိးဒီးယွၤဒီး, တဆိကမိၣ်လၢ အဂုာ်န့ၢ်ပှၤဂၤ အတၢ်ဘၣ်” (ဖံးလံး ၂:၆) န့ၣ်လီၤ. ဒ်ပှၤဟီၣ်ခိၣ်ဖိတဂၤအသိး, ကစၢ်ခရံာ် အဲၣ်ဒိးကဲထီၣ် တၢ်လုၢ်တၢ်ပာ် လၢပတၢ်ဒဲးဘးအဂီၢ်, ဒီးလုၢ်ထီၣ်အသးသမူန့ၣ်လီၤ. ကစၢ်ယ့ၣ်ရှူး ထံၣ်ဝဲဒၣ်လၢ ပလိၣ်ဘၣ် တၢ်မၤစၢၤ, ဒီးတၢ်အုၣ်က့ၤခီၣ်က့ၤအဃိ, “ဆီၣ်လီၤအသးဒီးတူၢ်ဝဲတုၤအဒိးသံအသး” (:၈) န့ၣ်လီၤ. စီၤပီလူး ကွဲးပာ်ဖျါဝဲဒၣ်လၢ ဘၣ်ဆၣ်ဒီးညိကွံာ်အလၤကပီၤ, ဒီးလိၣ်ထီၣ်အသးလၢ ပှၤကညီ, ဒီးဒိးန့ၢ်ကုၢ်အက့ၢ်အဂီၤ” (:၇) န့ၣ်လီၤ.

ကစၢ်ယွၤ အဲၣ်ဒိးဝဲလၢ ပကအိၣ်မူမၤဒိး ကစၢ်ယ့ၣ်ရှူး အတၢ်ပာ်သူၣ်ပာ်သး, ဒီး အတၢ်ဟ့ၣ်လီၤသးကျိၤကျဲတဖၣ် ဖဲလၢပရ့လိာ်ဘၣ်ထွဲလိာ်သးဒီးပှၤဂုၤပှၤဂၤတဖၣ် န့ၣ်လီၤ. ဒ်ကစၢ်ခရံာ် မၤစၢၤပှၤအသိး, လၢပှၤဟီၣ်ခိၣ်ဖိတဖၣ်အတၢ်ထံၣ်န့ၣ် ပတၢ်မၤမ့ၢ်အိၣ်ဖျါ ကဖုၣ်ကဆံးဒၣ်ဝဲထဲလဲၣ်ဂ့ၤထဲလဲၣ်ဂ့ၤန့ၣ် လၢတၢ်ဆီၣ်လီၤသးအပူၤန့ၣ် မ်ပကမၤတၢ်ခ့တၢ်ပှၤအတၢ်မၤ လၢပှၤဂုၤပှၤဂၤတဖၣ်အဂီၢ်န့ၣ်တက့ၢ်.