ခရ့း(စ) မဲးခဲ(န)(ဒ)လဲး(စ) (Chris McCandless) တဂၤ, အိၣ်လီၤဖးဒီးပှၤကညီတဖၣ်, ဒီးလဲၤအိၣ်ဆိးဝဲလၢ အလၣ်(စ)ကဲၣ် ပှၢ်မုၢ်ကနၢ (Alaskan) ဝံၤန့ၣ်ဒီး, ပာ်လီၤအသးလၢ ကဟဲက့ၤအိၣ်ဆိးဝဲလၢဝ့ၢ်ပူၤန့ၣ်လီၤ. ဘၣ်ဆၣ်, တချုးလၢတၢ်ကိၢ်ခါ ထံလီၤသကၤပှံၢ်လီၤ, ဒီးကဲထီၣ် ထံကျိအထံမဲာ်ဖံးခိၣ်အါထီၣ်ထီထီၣ်, ထံဟဲယွၤလီၤဆူၣ်, ဒီးတၢ်ခီဂာ်အီၤ တန့ၢ်တသ့အကတီၢ်, အဝဲခီဂာ် တဲး(က)လၣ်နံၣ်ကၣ် (Teklanika) အထံကျိၤ ဖဲ လါအ့ဖြ့ၣ်အပူၤန့ၣ်လီၤ. တၢ်ဆၢကတီၢ်အါလါလဲၤပူၤကွံာ်ဝံၤ, တၢ်အီၣ်တအိၣ်လၢၤအဃိ, မဲးခဲ(န)(ဒ)လဲး(စ) တဂၤ, ဟဲက့ၤကဒါဆူ ဟံၣ်တန့ၢ်လၢၤဘၣ်. အတၢ်သံလၢ အလီၤသးအုး အလီၤသးဘၣ်ဒိန့ၣ် ဘၣ်တၢ်မၤသ့ၣ်နီၣ်က့ၤလၢ လံာ်လဲၢ်, ဒီးတၢ်ဂီၤမူတဖၣ်အပူၤန့ၣ်လီၤ.

လၢပျၢၤ, ပှၤအံၣ်စရ့လးဖိတဖၣ် ဒ်သိးကနုာ်လီၤဝဲဆူ ကီၢ်တၢ်စံးပာ်အဂီၢ်, ဘၣ်ကွၢ်ဆၢၣ်မဲာ်ဒီးတၢ်ခီဂာ်ထံကျိ, လၢအကါဒိၣ်တပတီၢ်န့ၣ်လီၤ. ဘၣ်ဆၣ်, “ယၢ်ဒ့ၣ် အထံလုၣ်ဘၢအနံၤခဲလၢာ်” (ယိၤရှူ ၃:၁၅), ဒီးကကဲထီၣ် တၢ်မၤကွၢ်တမံၤ, ဒ်သိး ကမၤဒိၣ်ထီၣ်မၤအါထီၣ် ပှၤဂီၢ်မုၢ်အတၢ်စူၢ်တၢ်နာ်န့ၣ်လီၤ. ဒီးယွၤ စံးဘၣ် စီၤယိၤရှူ,
“တၢ်လၢမုၢ်မဆါတနံၤအံၤ ယကပာ်ဒိၣ်သီနၤလၢ အံၣ်စရ့လးအမဲာ်ညါ, ဒ်သိး အဝဲသ့ၣ် ကသ့ၣ်ညါ ဒ်ယအိၣ်ဒီးစီၤမိၤရှ့အသိးန့ၣ် ယကအိၣ်ဒီးနၤ” (:၇) န့ၣ်လီၤ.

စီၤယိၤရှူ စံးဘၣ်ပှၤဂီၢ်မုၢ်လၢ, “ကွၢ်ကွၢ်, ဟီၣ်ခိၣ်ဒီဘ့ၣ်ညါအကစၢ် အတၢ်အၢၣ်လီၤအီလီၤအတလါန့ၣ် လဲၤခီဂာ်တၢ်လၢ သုမဲာ်ညါဆူ ယၢ်ဒ့ၣ်အပူၤ” (:၁၁) န့ၣ်လီၤ. တုၤပှၤလုၢ်တၢ်အဒိၣ် လၢအစိာ်တလါ, အခီၣ်တဖၣ် လီၤဘျၢထံကျါဒီး, “ထံလၢအဟဲလီၤန့ၣ် ဆၢထၢၣ်ဝဲ” (:၁၅-၁၆) န့ၣ်လီၤ. ပှၤအံၣ်စရ့လးဖိခဲလၢာ် ခီဂာ်ယၢ်ဒ့ၣ်အထံကျိလၢခိ (:၁၇) တုၤအလၢာ်န့ၣ်လီၤ.

ဖဲပကဘၣ်ကွၢ်ဆၢၣ်မဲာ်ဒီး “တၢ်ခီဂာ်ထံကျိတဖၣ်,” အကတီၢ်တဘျီလၢ်လၢ်န့ၣ် ဒ်သိးပကခီဂာ်တၢ်အဂီၢ်, ဖဲပမ့ၢ်ဃၣ်လိၤပသးဆူ ပှၤလၢအမၤန့ၢ်ပှၤကျဲတဂၤအအိၣ်န့ၣ်ဒီး, တၢ်အိၣ်အသးလၢ ကဲထီၣ်လိၣ်ထီၣ်တသ့တဖၣ်န့ၣ် ကမၤဒိၣ်ထီၣ် ပတၢ်စူၢ်တၢ်နာ်သ့ဝဲဒၣ်န့ၣ်လီၤ. တၢ်ခီဂာ်ဒ်သိးအံၤတဖၣ်အကျါ, အဒိၣ်ကတၢၢ်န့ၣ် မ့ၢ်ဝဲဒၣ် တၢ်ခီဂာ်ခ့ခါအတၢ်အိၣ်မူ, ဒီးနုာ်လီၤဆူတၢ်အိၣ်မူခါဆူညါတပတီၢ်န့ၣ်လီၤ. ဖဲတၢ်ကမၤအသးတမံၤမံၤန့ၣ်, ကစၢ်ယွၤ လၢအအိၣ်ဒီးစီၤမိၤရှ့, စီၤယိၤရှူ, ဒီးပှၤအံၣ်စရ့လးဖိတဖၣ်န့ၣ် ကမၤန့ၢ်ဝဲဒၣ် ကျဲတဘိလၢပဂီၢ်စ့ၢ်ကီးန့ၣ်လီၤ.