ဖဲယကွဲးတၢ်ဂ့ၢ်တဖၣ်အံၤအကတီၢ်, ပထွံၣ်ဖိ, ဝ့စတၢၣ်(န) (Winston) န့ၣ် အိၣ်မံကွီၤလီၤအသး လၢယခီၣ်ထံးန့ၣ်လီၤ. အဝဲခိးကွၢ်ဝဲဒၣ် ယသုးယသးလၢ လီၢ်ဆ့ၣ်နီၤလၢ အကပၤတဖျၢၣ်ဆူ တၢ်အီၣ်ဒၢးအစီၢ်နီၤခိၣ်န့ၣ်လီၤ. ယအိၣ်တၢ်အလီၢ် တၢ်ဒ့ၣ်စၢၤ တဆံ ခီၣ်ယီၢ်ဖိန့ၣ် ယံၤကဲာ်ဆိးလၢအဂီၢ်န့ၣ်လီၤ.

ယဆိကမိၣ် ယၤဒီးယထွံၣ်ဖိ, ပတၢ်ရ့လိာ်သးဘူးဘူးတံၢ်တံၢ် တအိၣ်လၢၤဘၣ်န့ၣ် ကမ့ၢ်ဝဲဒၣ်, လၢအပူၤကွံာ်န့ၣ် ယဘၣ်လဲၤက့ၤ ဖံးမၤတၢ်လၢ တၢ်လီၢ်အယံၤအဃိန့ၣ်လီၤ. တချုးလၢတၢ်မၤအသးဒ်သိးအံၤဘၣ်န့ၣ် ယမ့ၢ်ကတဲာ်ကတီၤယသးလၢ ယကလဲၤဟး (မ) ယမ့ၢ်စံးတၢ်ကတိၤ “လဲၤ” န့ၣ် ဟဲဃ့ၢ်ထီၣ်လၢယလိၤ, အိၣ်စဲထီဃာ်အသးဒီးယၤန့ၣ်လီၤ.

လၢပှၤကညီအတၢ်ရ့လိာ်ဘၣ်ထွဲလိာ်သးအပူၤ, ပှၤတဂၤ “အိၣ်စဲထီဃာ်အသး” ဒီးပှၤအဂၤန့ၣ် ပှၤတစံးကတိၤဂ့ၤအဂ့ၢ်လီၤလီၤဆီဆီဘၣ်. ဘၣ်ဆၣ်, ယထွံၣ်ဖိအိၣ်စဲထီဃာ်အသးန့ၣ် ယထံၣ်လၢ တၢ်သန့ၤစဲထီ အိၣ်ဒီးတၢ်နာ်သန့ၤ အက့ၢ်အဂီၤဖျိဖျိဖျါဖျါ, တၢ်လၢပကထံၣ်ဘၣ်ဝဲဒၣ် ဖဲ ထါစံးထီၣ်ပတြၢၤ ၆၃ အပူၤန့ၣ်လီၤ.

ထါတယုၢ်အံၤအပူၤန့ၣ်, စီၤဒၤဝံး တ့ခဲၣ်ဝဲ က့ၢ်ဂီၤဘၣ်ဃးဒီးတၢ်အဲၣ်နာ်သန့ၤကစၢ်ယွၤအဂ့ၢ်, ဒီးစးထီၣ်ပာ်ဖျါဝဲဒၣ် “ယွၤဧၢ, နမ့ၢ်ယကစၢ်လီၤ. ယဃုနၤဂီၤဂီၤ, ယသးအံၤသူအသးလၢနၤ, ယဖံးယညၣ်ဆၢန့ၢ်နၤ” (:၁) န့ၣ်လီၤ. ဒီးဖဲအဆၢဖိ ၃ န့ၣ်, စီၤဒၤဝံး ပာ်ဖျါအါထီၣ်ဝဲဒၣ် “အဂ့ၢ်ဒ်အံၤ, နဘျုးနဖှိၣ်ဂ့ၤန့ၢ်တၢ်မူတက့ၢ်လီၤ. ယပျုၤကစံးထီၣ်ပတြၢၤနၤ” န့ၣ်လီၤ. တချုးလၢ ထါကကတၢၢ်န့ၣ်, ပကဖးဘၣ်လၢ “ယသး
သန့ၤအသးလၢနၤ, နစုထွဲမၤစၢၤယၤ” (:၈) န့ၣ်လီၤ.

ဒ်စီၤဒၤဝံးအသိး, ဒီးဘၣ်သ့ၣ်သ့ၣ်န့ၣ် ကလီၤဂာ်ဒၣ်လဲာ်, ဒ်ယထွံၣ်ဖိ သန့ၤအသးလၢယၤအသိး, ယသးအဲၣ်ဒိးနာ်သန့ၤယွၤ, လၢယနီၢ်ခိနီၢ်သးခဲလၢာ်, ဒီးဃုထံၣ်န့ၢ်အီၤလီၤတံၢ်လီၤဆဲး, လၢတၢ်သးတီအပူၤန့ၣ်လီၤ. ဘၣ်တဘျီဘျီ, ယမၤယဲဒၣ်န့ၣ်လီၤ. အကတီၢ်အဂၤတဖၣ်န့ၣ်, ယသးဖျၢၣ်ခုၣ်ကိၤဝဲဒၣ်, ဒီးတၢ်နာ်သန့ၤသးန့ၣ်ဆံးစှၤဝဲဒၣ်န့ၣ်လီၤ. ဘၣ်ဆၣ်, ဖဲယပီၢ်ယၢ်လီၤက့ၤသးဒီးယတၢ်စူၢ်တၢ်နာ် လၢအကဒံကဒါတဖၣ်ဝံၤ, ဟဲက့ၤဆူ ယွၤအအိၣ်န့ၣ်ဒီး, ယသ့ၣ်နီၣ်ယဲဒၣ်လၢ ထဲကစၢ်ယွၤတဂၤဧိၤ မၤလၢပှဲၤယသးန့ၣ်လီၤ. ထဲယွၤတဂၤဧိၤအပူၤန့ၣ် “ယသးကအီၣ်ဘျဲးအီၣ် တၢ်အီၣ်ဝံၣ်, ဒီးသိဧိၤချါဧိၤ” (:၅) န့ၣ်လီၤ.