လၢတၢ်လိာ်ခိၣ်လိာ်ကွဲ မၤမုာ်မၤဖှံသးအလီၢ် (amusement park) န့ၣ် ဖဲယဒိးလိာ်ကွဲကဟၣ်လၢ ပှၤအါဂၤဘၣ်သးမုာ်လၤဒိၣ်မးတခိၣ် လဲၤစွါထီၣ်ကယီကယီဆူ တၢ်လီၢ်အထီအကတီၢ်, ယဘံၣ်ဃာ် ယမဲာ်ချံ, ဒီးယကျဲးစၢးပၢၤဃာ်ယသး ဒ်ယတနၢ်ဟူ ကယဲၢ်ပှၤမၤသီၣ်မၤသဲတၢ်ကလုၢ်တဖၣ်န့ၣ်လီၤ. ဖဲကဟၣ်အိၣ်ကတီၢ်တစိၢ်ဖိန့ၣ် ယမၤကမၣ်တၢ်, ခီဖျိလၢယကွၢ်ခူသူၣ်လီၤတၢ်န့ၣ်ဒီး, ယထံၣ်လၢ ကဟၣ်န့ၣ် ကလီၤဆူတၣ်ဖီလာ်သတူၢ်ကလာ်အဃိ, ယဖုးဘၣ်ယသးဒိၣ်မးန့ၣ်လီၤ. ယဘံၣ်ကဒီး ယမဲာ်ချံ, ဒီးကိးပသူကိးပသီတုၤဆူတၢ်ဖီလာ်န့ၣ်လီၤ. တၢ်သ့ၣ်နီၣ်က့ၤ လၢယနီၢ်ဆံးအကတီၢ် အဂ့ၢ်အံၤမၤပျံၤယၤ, မၤကနိးယသးအဖၢမုၢ်န့ၣ်လီၤ.

ဘၣ်တဘျီဘျီ, လၢပတၢ်အိၣ်မူအပူၤန့ၣ် ပသးကလၢၢ်ဘၣ် ဒ်ပလီၤတဲာ်ဆူလာ်ယံၤထီၣ်ယိာ်ထီၣ်, ဒီးပှၤလၢကဟံးဃာ်ဖီၣ်ဃာ်ပှၤအဂီၢ်, ပှၤတအိၣ်နီတဂၤအသိးဘၣ်န့ၣ်လီၤ. ဘၣ်ဆၣ်, ဖဲတၢ်အိၣ်မူန့ၣ် ဖျါလၢတၢ်သဘံၣ်ဘုၣ်အိၣ်ထီၣ်, ဒီးတၢ်ပၢၤဃာ်အီၤတန့ၢ်လၢၤဘၣ်အကတီၢ်, ဖဲပသ့ၣ်ညါ ယွၤအိၣ်ဒီးပှၤန့ၣ်ဒီး, ပဃုထံၣ်န့ၢ် တၢ်မၤမုာ်ထီၣ်က့ၤပသး သ့ဝဲဒၣ်န့ၣ်လီၤ. ဒ်ပမ့ၢ်ပှၤစူၢ်က့ၤနာ်က့ၤ ယွၤတဖၣ်အသိး, ပသ့ၣ်ညါ ယွၤ အိၣ်ဆိးဝဲလၢပသးကံၢ်ပူၤ ခီဖျိသးစီဆှံန့ၣ်လီၤ. ပကတိၤတၢ်ဒီးအီၤသ့, ဒီးယွၤအကလုၢ်အကထါ ကနဲၣ်ဆှၢပှၤန့ၣ်လီၤ.

မ့ၢ်လၢ ပှၤအံၣ်စရ့လးဖိတဖၣ် ပူထီၣ်တၢ်အဃိ, မ့ၢ် “လီၤတဲာ်” ဒၣ်လဲာ်, က “ဟံးဃာ်ဖီၣ်ဃာ်” ဝဲဒၣ်န့ၣ် ကစၢ်ယွၤ အဲၣ်ဒိးလၢ အပှၤဂီၢ်မုၢ်တဖၣ် သ့ၣ်ညါဝဲဒၣ် လီၤတံၢ်လီၤဆဲးန့ၣ်လီၤ. ခီဖျိဝံယရှါယၤန့ၣ် ယွၤစံးဝဲဒၣ် “ပျံၤတၢ်တဂ့ၤ, အဂ့ၢ်ဒ်အံၤ, ယအိၣ်ဒီးနၤလီၤ. ကွၢ်တရံးတၢ်တဂ့ၤ. အဂ့ၢ်ဒ်အံၤ, ယမ့ၢ်နကစၢ်လီၤ. ယဒုးဆူၣ်ထီၣ်လံနဂံၢ်နဘါလံ, မ့ၢ်မးယမၤစၢၤလံနၤလံ. မ့ၢ်မး ယဒုးအိၣ်ကျၢၤလံနၤလၢ ယစုထွဲအတီအလိၤ” (ယရှါ ၄၁:၁၀) န့ၣ်လီၤ. လၢတၢ်မၤကွၢ်တဖၣ်အပူၤန့ၣ် အဝဲကမၤစၢၤဝဲဒၣ်န့ၣ် ယွၤအဲၣ်ဒိးလၢ အပှၤဂီၢ်မုၢ်သ့ၣ်ညါ (:၁၃) ဝဲဒၣ်န့ၣ်လီၤ. ဖဲပှၤအံၣ်စရ့လးဖိတဖၣ် ဘၣ်တၢ်စိာ်မၢကဲကုၢ်လၢတခီထံတခီကီၢ်အပူၤဒၣ်လဲာ်, ယွၤတစူးကွံာ်ညိကွံာ် အဝဲသ့ၣ်ဘၣ်န့ၣ် အဝဲသ့ၣ် မ့ၢ်သ့ၣ်ညါဝဲန့ၣ်ဒီး, ကကဲထီၣ် တၢ်န့ၢ်ဂံၢ်န့ၢ်ဘါ လၢအပှၤဂီၢ်မုၢ်တဖၣ်အဂီၢ်န့ၣ်လီၤ.

ဖဲပပၢဆှၢပၢၤဃာ် ပတၢ်အိၣ်မူတန့ၢ်လၢၤဘၣ်အကတီၢ်, ဒ်သိးကမၤစၢၤပှၤအဂီၢ်, ပမ့ၢ်သ့ၣ်ညါလၢ ယွၤအိၣ်ဒီးပှၤန့ၣ်ဒီး, ပပာ်ဆူၣ်ထီၣ်ပသး သ့ဝဲဒၣ်န့ၣ်လီၤ. ပအိၣ်ဘံၣ် အိၣ်ဘၢလၢယွၤအတၢ်အဲၣ်, ဒီးအစုဂံၢ်ဆူၣ်ဘါဆူၣ်အပူၤန့ၣ်လီၤ.