ဖဲ ၂၀၂၄ နံၣ်န့ၣ်, ခွါလိၣ်ဘိ ကံကါ(န) (Keegan) တဂၤ လဲၤတခွဲညၣ်, ဒီးမၤန့ၢ်ဝဲ ဘရၣ်မဲ(န)ဒံၣ် (Barramundi) ညၣ်ဖးဒိၣ်တဘ့ၣ်, အထီ ကအိၣ်ဝဲ ခံခီၣ်ယီၢ် လၢတၢ်သးခုအပူၤန့ၣ်လီၤ. ဘၣ်ဆၣ်, ဖဲအဒ့မုၣ်ဖိ နဲၣ်အီၤ တၢ်ပနီၣ်အက့ဖိတဘ့ၣ်လၢညၣ်အလိၤန့ၣ်ဒီး, အတၢ်သးခုန့ၣ် ကဲထီၣ်တၢ်သူၣ်ပိၢ်သးဝးဒိၣ်ဒိၣ်ကလဲာ်န့ၣ်လီၤ. ဒ်ကီၢ်အီစထြ့လယၢၣ် ပှၤတခွဲညၣ် အတၢ်ပြၢ ပာ်ပနီၣ်ဝဲအသိး, ညၣ်လၢ အဝဲတခွဲန့ၢ် တဘ့ၣ်န့ၣ် အလုၢ်အပှ့ၤအိၣ်ဝဲဒၣ် ဒီလၣ်တကကွဲၢ်န့ၣ်လီၤ. စးထီၣ်လၢ ၂၀၁၅ နံၣ်လံၤလံၤန့ၣ် ပှၤမၤတၢ်ပြၢအံၤ တနံၣ်ဘၣ်တနံၣ်, ဒီး ကံကါ(န) မ့ၢ်ပှၤအဆိကတၢၢ်တဂၤလၢ အမၤန့ၢ် မၤနၢၤ စ့ခိၣ်ဖးအထီကတၢၢ်န့ၣ်လီၤ.
တၢ်တခွဲန့ၢ်ညၣ်တဘ့ၣ်အံၤ တမ့ၢ်တၢ်ကမၤအသးညီညီထီဘိဘၣ်. တၢ်တခွဲန့ၢ်ညၣ် လၢအထးခိၣ်ပူၤအိၣ်ဒီးစ့တဘ့ၣ်န့ၣ် ကီခဲဒိၣ်ဝဲဒၣ်န့ၣ်လီၤ. ဘၣ်ဆၣ်, လၢလံာ်မးသဲ (၁၇:၂၇) အပူၤန့ၣ် ကစၢ်ယ့ၣ်ရှူး စံးဘၣ် အပျဲၢ်အဘီၣ် စီၤပ့းတရူးလၢ “လဲၤဆူပီၣ်လဲၣ်,… ဒီးညၣ်လၢအဟဲထီၣ်ဆိတဘ့ၣ်န့ၣ် ဟံးန့ၢ်ဒီးအိးထီၣ်အထးခိၣ်, ဒီးနကထံၣ်န့ၢ် စ့တရှက့လး” န့ၣ်လီၤ.
တၢ်အိၣ်အသးမၤအသး (context) တကတီၢ်အံၤ, ဘၣ်ဃးဒီးတၢ်သံကွၢ်, လၢအမ့ၢ် ကစၢ်ယ့ၣ်ရှူး ဟ့ၣ်သွဲစ့ဆူ တၢ်လုၢ်ဟံၣ်ဧါ, တဟ့ၣ်ဘၣ်ဧါအဂ့ၢ် (:၂၄) န့ၣ်လီၤ. ကစၢ်ယွၤ အဖိခွါကစၢ်ယ့ၣ်ရှူး ကဘၣ်ဟ့ၣ်သွဲစ့ဆူ ယွၤအတၢ်လုၢ်ဟံၣ်န့ၣ် မ့ၢ်တၢ်လၢအထီဒါ, တလီၤပလိာ်သးတမံၤဘၣ်ဆၣ်, ကစၢ်ယ့ၣ်ရှူး သ့ၣ်ညါနၢ်ပၢၢ်ဝဲ တၢ်အိၣ်အသးန့ၣ်လီၤ. လၢတၢ်န့ၣ်အဃိ, အဝဲတဲဖျါထီၣ်ဝဲဒၣ်လၢ စီၤပၤအဖိတဖၣ် တဘၣ်ဟ့ၣ်တၢ်အခိအသွဲဆူ စီၤပၤအအိၣ်ဘၣ် (:၂၅-၂၆) န့ၣ်လီၤ.
ဘၣ်ဆၣ်, “ဒ်သိးပသုတကဲထီၣ် အတၢ်လီၤဃံၤအလီၢ်တဂ့ၤ” (:၂၇), ဒီးလွဲကွံာ် ပှၤဂၤလၢ ကစၢ်ယ့ၣ်ရှူး အတၢ်သိၣ်လိ, ခီဖျိလၢတၢ်ကထံၣ်အီၤ ဒ်ပှၤပဒ့ၣ်ဟးဆှဲး တၢ်ဟ့ၣ်တၢ်ခိတၢ်သွဲအသိးဘၣ်အဃိ, ကစၢ်ယ့ၣ်ရှူး မၢဝဲဒၣ် စီၤပ့းတရူး ဒ်သိးကဖီၣ်န့ၢ်ညၣ် လၢအထးခိၣ်န့ၣ် အိၣ်ဒီးသွဲစ့, အဘၣ်တီတီလၢ ကဟ့ၣ်ဝဲ အနီၢ်ကစၢ်ဒီးစီၤပ့းတရူး ခံဂၤလိာ်အဂီၢ်န့ၣ်လီၤ. ဘၣ်သ့ၣ်သ့ၣ်, တၢ်ဂ့ၢ်အံၤ ကမ့ၢ်တၢ်မၤသ့ၣ်နီၣ်ထီၣ်က့ၤ စီၤပ့းတရူး, ဒီးပဝဲနၤယၤတဖၣ်လၢ ကစၢ်ယွၤ မ့ၢ်ပှၤလၢအကတဲာ်ကတီၤန့ၢ်ပှၤတၢ်တဂၤ, အိၣ်ဝဲဒၣ်ဒီး အဖိလၢအလူၤပိာ်အခံတဖၣ်ထီဘိန့ၣ်လီၤ.