ဒ်သိးတၢ်ကမၤသ့ၣ်နီၣ်ထီၣ်က့ၤယၤ တၢ်ဂ့ၢ်တၢ်ကျိၤတဖၣ်အဂီၢ်, တၢ်ကွဲးနီၣ်ကွဲးဃါ အဘ့ၣ်ဘၣ် အိၣ်ဝဲဒၣ်လၢ ယကွဲးလံာ်စီၢ်နီၤခိၣ်အလိၤန့ၣ်လီၤ. လံာ်က့တၢ်ကွဲးရဲၣ်လီၤ တကဘျံး, လၢအမ့ၢ် “လုၢ်လၢ်အထံၣ်တဆံ, လၢတၢ်အိၣ်ဆူၣ်အိၣ်ချ့အဂ့ၤအဂီၢ်,” န့ၣ် ဘၣ်တၢ်ဆဲးတံၢ်အီၤလၢ ထးကမိာ်ခံန့ၣ်လီၤ. လံာ်က့ဖိအံၤ, လၢအပူၤကွံာ် တဘျုးနံၣ်န့ၣ် ယထံၣ်န့ၢ်ဝဲဒၣ်လၢ တၢ်အီၣ်န့ၢ်ဂံၢ်န့ၢ်ဘါ အမဲးကစံတဘ့ၣ်အပူၤ, ဒီးယတံာ်တဲာ်ဟံးဃာ်အီၤန့ၣ်လီၤ. ဖဲလၢတယံာ်ဒံးဘၣ်န့ၣ်, ယထံၣ် တၢ်ကွဲးရဲၣ်လီၤဖိအံၤ ကိးမုၢ်နံၤဒဲးဒၣ်လဲာ်, ယသ့ၣ်နီၣ်ယဲဒၣ်ထဲ တၢ်ဂ့ၢ် လွံၢ်ထံၣ်အဃိ, ကဲထီၣ်တၢ်ကမၢကမၣ်လၢယဂီၢ်န့ၣ်လီၤ.
တၢ်ကွဲးရဲၣ်လီၤဖိအံၤ အိၣ်ဒီးယၤဘူးဘူးတံၢ်တံၢ်, လၢယတၢ်ဖံးတၢ်မၤတနံၤဘၣ်တနံၤ အပူၤဘၣ်ဆၣ်, ယတကွၢ်အီၤလီၤတံၢ်လီၤဆဲးဘၣ်, (မ့) တၢ်လၢအပာ်ဖျါဝဲတဖၣ်န့ၣ် ယတလူၤပိာ်ထွဲမၤအီၤနီၢ်နီၢ်ဘၣ်န့ၣ်လီၤ.

စီၤယၤကိာ် ကွဲးပာ်ဖျါထီၣ်ဝဲ တၢ်လၢအလီၤဂာ်ဒီးတၢ်ဂ့ၢ်ဒ်သိးအံၤ, ဘၣ်ဃးဒီး ပှၤစူၢ်က့ၤနာ်က့ၤတၢ်ဖိတဖၣ် အတၢ်ပာ်သူၣ်ပာ်သး, လၢလံာ်စီဆှံအဂ့ၢ်န့ၣ် “ပှၤတဂၤဂၤ မ့ၢ်ကဲထီၣ် ပှၤနၢ်ဟူတၢ်အကလုၢ်, ဒီးတမ့ၢ်ဘၣ် ပှၤမၤဘၣ်ဝဲန့ၣ်ဒီး, မ့ၢ်အမၤအသး ဒ်ပှၤကွၢ်အမဲာ်ဒၣ်ဝဲလၢ မဲာ်ထံကလၤအသိးလီၤ. အဂ့ၢ်ဒ်အံၤ, ကွၢ်လီၤအသး, ဒီးဟးဝဲဒီး, သးပ့ၤနီၣ်အက့ၢ်အဂီၤတကီၢ်ခါ” (ယၤ ၁:၂၃-၂၄) န့ၣ်လီၤ. ပှၤပိာ်ကစၢ်ခရံာ်အခံတဖၣ် အါဒံအါဂၤန့ၣ် သ့ၣ်ညါပာ်သူၣ်ပာ်သး လံာ်စီဆှံ အတၢ်ပာ်ဖျါတဖၣ်ဘၣ်ဆၣ်, ပကကဲထီၣ်ထဲဒၣ် “ပှၤနၢ်ဟူတၢ်ကလုၢ်” (:၂၂) ဧိၤသ့ၣ်သ့ၣ်, ဒီးတၢ်ဟ့ၣ်လီၤအးလီၤ ပသးန့ၣ် ကတၢၢ်ဝဲဒၣ်ဖဲန့ၣ်လီၤ. ခီဖျိကျိၤကျဲဒ်သိးအံၤအပူၤန့ၣ်, ဘၣ်ဃးဒီးလံာ်စီဆှံအစိအကမီၤ,ဒီးအတၢ်န့ၢ်စိန့ၢ်ကမီၤအဂ့ၢ်န့ၣ် ပတၢ်ပာ်သူၣ်ပာ်သး တတီတလိၤ လၢၤဘၣ်, ဒီးပတထံၣ်အီၤ ဒ်တၢ်လၢအဟ့ၣ်ပှၤ “တၢ်သိၣ်တၢ်သီအလၢအပှဲၤ ဘၣ်ဃးဒီး တၢ်ထူၣ်ဖျဲး” (:၂၅) ဘၣ်န့ၣ်လီၤ.

စီၤယၤကိာ် စံးဘၣ်တဲဘၣ်ပှၤလၢ ပကမ့ၢ် “ပှၤမၤတၢ်အကလုၢ်” (:၂၂) န့ၣ်လီၤ. “ပှၤမၤတၢ်” န့ၣ် “ကွၢ်ထံကွၢ်ဆး” ယွၤအကလုၢ်ကထါ, ဒီး “အိၣ်မူမၤထွဲ” (:၂၅, ခ့ခါ) “တၢ်အကလုၢ်” (:၂၂) န့ၣ်လီၤ. တၢ်ဒိကနၣ်ယွၤန့ၣ် တကြၢးမ့ၢ်ဝဲဒၣ်ထဲ ပတၢ်ဖံးတၢ်မၤတဖၣ်အပူၤန့ၣ်ဘၣ်, ကဘၣ်မ့ၢ်တၢ်အိၣ်ဟဲယွၤလီၤဝဲလၢ ပတၢ်မ့ၢ်တၢ်, လၢပသးကံၢ်ပူၤန့ၣ်လီၤ. ပအိၣ်မူမၤထွဲ ယွၤအကလုၢ်ကထါ လၢဟီၣ်ခိၣ်ချၢအံၤ ခီဖျိလၢယွၤအဂံၢ်အဘါသ့ဝဲဒၣ်န့ၣ်လီၤ.