လၢ လိၣ်ရဲၤတၤ (Loretta) အဂီၢ်, တၢ်လၢာ်ဘူၣ်လၢာ်စ့ၤ ကျိၣ်စ့ဒီလၣ်တကယၤန့ၣ် တၢ်လၢာ်အါဒိၣ်န့ၢ်ဒံး ညီနုာ်အဘၣ်ဟ့ၣ်ဝဲန့ၣ်လီၤ. အဝဲစံးဘၣ်အဖိခွါလၢ “ဘၣ်ဆၣ်, ယွၤကကတဲာ်ကတီၤန့ၢ်ပှၤတၢ်” န့ၣ်လီၤ. ဖဲမုၢ်တနံၤအံၤ တသီဃီန့ၣ်, ဒိးန့ၢ်ဝဲ လံာ်တၢ်ကစီၣ်, လၢအပုၢ်ဒ့ခွါအသဒါအအိၣ်, ဒီးစံးဝဲဒၣ်, “လိၣ်ရဲၤတၤဧၢ, မ့ၢ်လၢနဟ့ၣ်ဂံၢ်ဟ့ၣ်ဘါယၤ ထီဘိအဃိ, ယအဲၣ်ဒိးစံးဘျုးနၤန့ၣ်လီၤ. လၢနလီလံာ်ပရၢအပူၤန့ၣ် ယဆှၢလီၤန့ၢ်နၤ တၢ်တမံၤ” န့ၣ်လီၤ. ဖဲမုၢ်ဃ့ၢ်လီၤအကတီၢ်, လၢအလံာ်ပရၢအပူၤန့ၣ် ထံၣ်ဝဲဒၣ် စ့ဒီလၣ် တကယၤ, တၢ်ဟ့ၣ်လံာ်က့ဖိတဘ့ၣ်လၢ အပုၢ်ဒ့ခွါ ဆှၢလီၤန့ၢ်အီၤန့ၣ်လီၤ. မ့ၢ်တၢ်လီၤလး တမံၤဧါ. ဘၣ်သ့ၣ်သ့ၣ်, လၢပှၤတနီၤအဂီၢ်, တမ့ၢ်တၢ်လီၤလးဘၣ်. မ့မ့ၢ်လၢ လိၣ်ရဲၤတၤ အဂီၢ်န့ၣ်ဒီး, “တၢ်ဘၣ်ဆၢၣ်ဘၣ်တီၤ”န့ၣ် ကမ့ၢ်ဝဲ ဒ်တၢ်လီၤလိၢ်လီၤလးန့ၣ်လီၤ. ထီဘိန့ၣ်
မုၢ်လၢ်ဝဲဒၣ် ကစၢ်ယွၤ, လၢအမူဝဲတဂၤ ကကတဲာ်ကတီၤန့ၢ်တၢ်လၢအဂီၢ်န့ၣ်လီၤ.

လိၣ်ရဲၤတၤ အတၢ်ထံၣ်န့ၣ် ဆဲးကပီၤဖျါထီၣ် တၢ်မၤလိတမံၤလၢ ကစၢ်ယ့ၣ်ရှူး ဂဲၤဆၢထၢၣ်သမူထီၣ်က့ၤအဂ့ၢ်န့ၣ်လီၤ. မုၢ်အိၣ်ဘှံးနံၤဝံၤအလီၢ်ခံ, ပှၤပိာ်မုၣ် သၢဂၤ ဟံးန့ၢ်တၢ်နၢမူ, ဒ်သိးကလဲၤဖှုကစၢ်ယ့ၣ်ရှူးအနီၢ်ခိ လၢတၢ်သွၣ်ခိၣ်အပူၤန့ၣ်လီၤ. ဘၣ်ဆၣ်, အဝဲသ့ၣ် လဲၤဝဲဒၣ် ဖဲမုၣ်ဟဲထီၣ်သီအဖၢမုၢ်, ပိာ်မုၣ်သၢဂၤ အသးပူၤန့ၣ် အိၣ်ဒီးတၢ်ဂ့ၢ်ကီ တမံၤန့ၣ် မ့ၢ်ဝဲဒၣ် “မ့ၢ်မတၤကတလ့ၣ်ကွံာ်န့ၢ်ပှၤလၢ လၢၢ်အိၣ်လၢ တၢ်သွၣ်ခိၣ်အခိၣ်ထိး တဂၤလဲၣ်” (မၢ် ၁၆:၁-၃), ဒီးတမုၢ်လၢ်ဝဲဒၣ်လၢ ကထံၣ်န့ၢ် တၢ်လီၤလးဘၣ်န့ၣ်လီၤ.

အဝဲသ့ၣ် အတၢ်သံကွၢ်အပူၤန့ၣ် အိၣ်ဒီးတၢ်သးဒ့ဒီလၢ အဲၣ်ဒိးဃုသ့ၣ်ညါတၢ် လီၤဆီဒၣ်တၢ်, ပိာ်မုၣ်တဖၣ်အကျါ, ပာ်ဃုာ်ဒီးနီၢ်မၤရံမၤကဒါလ့ၣ်, လၢအလဲၤသကိးတၢ်, ဒီးအနီၢ်ကစၢ်ဒၣ်ဝဲန့ၣ် ထံၣ်ဘၣ်တ့ၢ်ဝဲ ကစၢ်ယ့ၣ်ရှူး အစိအကမီၤတဂၤန့ၣ်လီၤ. ဘၣ်ဆၣ်, ဖဲမုၢ်တဂီၤအံၤန့ၣ်, အဝဲသ့ၣ်ခဲလၢာ် ကွၢ်ဃုဝဲဒၣ် ကစၢ်ယ့ၣ်ရှူး, လၢအသံတဂၤန့ၣ်လီၤ.

လၢအလီၢ်န့ၣ်, တၢ်စံးဘၣ်တဲဘၣ်အဝဲသ့ၣ်လၢ “ဂဲၤဆၢထၢၣ်က့ၤလံဝဲလံ. တအိၣ်ဘၣ်ဖဲအံၤဘၣ်” (:၁၆) န့ၣ်လီၤ. တၢ်ဘိးဘၣ်သ့ၣ်ညါအံၤ ဒုးနၢ်ပၢၢ်ပှၤလၢ ပမုၢ်လၢ်တၢ်လၢ ကစၢ်ယ့ၣ်ရှူး, လၢအမူဝဲ, ဒီးဂဲၤဆၢထၢၣ်သမူထီၣ်က့ၤဝဲဒၣ်လၢ အစိအကမီၤလီၤလိၢ်လီၤလးတဂၤအအိၣ် သ့ဝဲဒၣ်န့ၣ်လီၤ. အဝဲမူဝဲဒၣ်န့ၣ်လီၤ. ဖဲပဘၣ်ကွၢ်ဆၢၣ်မဲာ် “လၢၢ်လၢအဃၢတဖၣ်,” လၢပကဘၣ်ဆီၣ်ဖျိးကွံာ်အီၤအကတီၢ်,
ကစၢ်ကအိၣ်ဒီးပှၤ, ဒီးကမၤစၢၤပှၤန့ၣ်လီၤ. ကစၢ်ယ့ၣ်ရှူး တအိၣ်ဝဲဒၣ်လၢ တၢ်သွၣ်ခိၣ် အပူၤဘၣ်. ကစၢ်ယ့ၣ်ရှူး ဂဲၤဆၢထၢၣ်သမူထီၣ်က့ၤနီၢ်နီၢ်လံ.