မုၢ်ဖီဖးလၢအဂ့ၤ (Good Friday) စံးတၢ်န့ၣ် မ့ၢ်တၢ်ဂ့ၤအိၣ်မနုၤတမံၤလဲၣ်. ဘၣ်မနုၤအဃိ, တၢ်တကိးအီၤ မုၢ်နံၤလၢအအၢ, (မ့) တၢ်သူၣ်အုးသးအုး အမုၢ်နံၤန့ၣ်လဲၣ်. နီၢ်နီၢ်န့ၣ်, တမ့ၢ်ဝဲဒၣ် မူးသးဖှံအမုၢ်နံၤတနံၤဘၣ်. မ့မ့ၢ်မုၢ်နံၤတနံၤလၢ တၢ်ကွၢ်ထံ ဆိကမိၣ်က့ၤ တၢ်သူၣ်အုးသးအုးအဂီၢ်န့ၣ်လီၤ. ဘၣ်တဘျီဘျီန့ၣ် မုၢ်နံၤအံၤ ဘၣ်တၢ်ကိးအီၤလၢ မုၢ်ဖီဖးစီဆှံ (Holy Firday) န့ၣ်လီၤ. လၢကီၢ်ကၠၢမနံၣ် (Germany) န့ၣ်, တၢ်ကိးအီၤလၢ ခၣ်ဖရဲတး(က) (Karfreitag), (မ့) “တၢ်သူၣ်အုးသးအုး မုၢ်ဖီဖး” (Sorrowful Friday) န့ၣ်လီၤ. မ့မ့ၢ်ဒ်သိးအံၤန့ၣ်ဒီး, တၢ်ကိးအီၤ “မုၢ်ဖီဖးလၢအဂ့ၤ” အထူသနူန့ၣ် မ့ၢ်ပဒိးန့ၢ်အီၤဖဲလဲၣ်. ပှၤတနီၤနီၤ နာ်ဝဲဒၣ်လၢ “မုၢ်ဖီဖးလၢအဂ့ၤ” န့ၣ် ဟဲလီၤဝဲဒၣ် လၢပျၢၤ “ကစၢ်ယွၤ အမုၢ်ဖီဖး” (God’s Friday) အထူသနူ သ့ၣ်သ့ၣ်န့ၣ်လီၤ.

မံၤအံၤအထူအထံး ကမ့ၢ်ဝဲဒ်လဲၣ်ဂ့ၤဒ်လဲၣ်ဂ့ၤ, မုၢ်ဖီဖးအနံၤလၢ ကစၢ်ယ့ၣ်ရှူး သံဝဲန့ၣ် ပှၤကိးအီၤလၢ “မုၢ်နံၤအဂ့ၤ” န့ၣ် မ့ၢ်တၢ်အကြၢးအဘၣ်န့ၣ်လီၤ. အတၢ်အဲၣ်လၢအစူးကွံာ်ညိကွံာ်သးအပူၤ, လၢပတၢ်ဒဲးဘးတဖၣ်အဂီၢ်, ကစၢ်ခရံာ်တူၢ်သံအသးန့ၣ်လီၤ. လၢတၢ်န့ၣ်အဃိ, Good Friday မ့ၢ်မုၢ်နံၤလၢအဂ့ၤန့ၣ်လီၤ. ဒီးတၢ်ကစီၣ်အဒိၣ်အမုာ်န့ၣ် သၢသီပူၤကွံာ်ဝံၤ, ကစၢ်ခရံာ်ဂဲၤထၢၣ်သမူထီၣ်က့ၤ လၢတၢ်သွၣ်ခိၣ်, လၢတၢ်မၤနၢၤတၢ်သံအဂီၢ်န့ၣ်လီၤ.

ပှၤသ့လံာ်စီဆှံအသီတကတြူၢ်စဲၣ်နီၤ ဒံၣ်. အ့ၣ်. ကၤစၣ် (D.A Carson) ကွဲးပာ်ဖျါဝဲဒၣ် “တၢ်ပျၤထီ ကစၢ်ယ့ၣ်ရှူး နးနးကျံးကျံးလၢထူၣ်စုညါအလိၤန့ၣ် တမ့ၢ်ထးပနဲာ်တဖၣ်ဘၣ်, မ့မ့ၢ် အတၢ်ပာ်လီၤသးကျၢၤမှုဆှု, ဒ်သိးကမၤလၢပှဲၤ ပၢ်ယွၤအတၢ်ဘၣ်သးအဂီၢ်, လၢတၢ်အဲၣ်ဘၣ် ပၢ်ကစၢ်ယွၤ, ဒီးမ့ၢ်လၢအတၢ်အဲၣ် ပှၤတၢ်ဒဲးဘးဖိဒ်သိးယၤတဖၣ်အဂီၢ် န့ၣ်လီၤ.” လံာ် ၁ ယိၤ ၄:၁၀ ပာ်ဖျါဝဲလၢ “တၢ်အံၤမ့ၢ်တၢ်အဲၣ်တၢ်ကွံ, လၢပအဲၣ်ယွၤ တမ့ၢ်ဘၣ်. မ့ၢ်လၢအဝဲဒၣ်အဲၣ်ပှၤ, ဒီးမၢလီၤအဖိခွါဒီး, မၤပူၤမၤဖျဲးပတၢ်ဒဲးဘး” န့ၣ်လီၤ.

Good Friday အတၢ်ကစီၣ်လၢအဂ့ၤန့ၣ် မ့ၢ်ဝဲဒၣ် ယွၤအဲၣ်ပှၤ, ဒီးအဲၣ်ဒိးရ့လိာ်အသးဒီးပှၤန့ၣ်လီၤ. မ့ၢ်လၢတၢ်အဲၣ်အံၤအဃိ, ပဘၣ်တၢ်ကိးပှၤလၢ ပကအဲၣ်ပှၤဂုၤပှၤဂၤ (:၇,၁၁) န့ၣ်လီၤ. ပမ့ၢ်အဲၣ်ပှၤဂုၤပှၤဂၤန့ၣ် မ့ၢ်ဒၣ်ပဒုးနဲၣ်ပာ်ဖျါထီၣ် ပအဲၣ်ကစၢ်ယွၤန့ၣ်လီၤ.