ဖဲယစုဒုၣ်အဃံကၢ်အကတီၢ်, ယတံၤသကိး ရဲး(စ) (Rex) ဆှၢလီၤန့ၢ်ယၤ တၢ်ကဟုကယာ် အတလါအဘိၣ်ဖိတဖျၢၣ်, လၢအပူၤန့ၣ် အိၣ်ဝဲဒီးတၢ်ချီထံ လၢတၢ်မၤလီၤသကၤ,ဃုာ်ဒီးနီၣ်တၢၤစ့ဃံလၤတဘိအဃိ, ကဲထီၣ် တၢ်ကမၢကမၣ်လၢယဂီၢ်န့ၣ်လီၤ. အတၢ်မၤန့ၣ် ထိးဘၣ်ယသးဒိၣ်မးအဃိ, ယအီတၢ်ချီထံလၢာ်တ့ၢ်ဝဲဒၣ်လဲာ်, ယဟံးဃာ်ပၢၤဃာ် နီၣ်တၢၤစ့ဖိအံၤန့ၣ်လီၤ. ယစုဒုၣ်ဘျါဂ့ၤထီၣ်က့ၤ, ဒီးယတံၤသကိး ရဲး(စ) တဂၤ လဲၤပူၤကွံာ်တ့ၢ်လံဟီၣ်ခိၣ်ဘၣ်ဆၣ်, အတၢ်ဒုးနဲၣ်တၢ်အဲၣ်အံၤ ပာ်ဖျါထီၣ် ယွၤအတၢ်အဲၣ် လၢယဂီၢ်အဖၢမုၢ်န့ၣ်လီၤ. ဖဲယဖီၣ်ထီၣ် နီၣ်တၢၤစ့ဖိတဘျီလၢ်လၢ်န့ၣ်, ယစံးဘျုးယွၤအတၢ်အဲၣ်လၢယဂီၢ်, ခီဖျိယတံၤသကိးအဃိန့ၣ်လီၤ.

တၢ်သ့ၣ်နီၣ်ထီၣ်က့ၤ အတၢ်အဲၣ်လၢ တၢ်ထိၣ်သတြီၤအီၤ တန့ၢ်တသ့အဂီၢ်, ကစၢ်ယ့ၣ်ရှူး ဟ့ၣ်လီၤပှၤ တၢ်သ့ၣ်နီၣ်ဘူၣ်စီဆှံ, (လူၤ ၂၂:၁၉), တၢ်ဟ့ၣ်လၢ ပထံၣ်န့ၢ် ပလၢၢ်အီၤသ့န့ၣ်လီၤ. ပှၤတၢ်မၢဖိ စီၤပီလူး ဒုးသ့ၣ်နီၣ်ထီၣ်က့ၤ ပှၤကရံၣ်သူးဖိတဖၣ်လၢ ကစၢ်ယ့ၣ်ရှူး ဟံးန့ၢ်ကိၣ်ဒီးစိၢ်ဘျဲးဝဲ, ဒီးစံးဝဲဒၣ်, “အအံၤမ့ၢ်ယနီၢ်ခိလၢ သုဂီၢ်လီၤ. မၤတၢ်အံၤလၢတၢ်သ့ၣ်နီၣ်ထီၣ်က့ၤယၤအဂီၢ်” (၁ ကရံၣ် ၁၁:၂၄) န့ၣ်လီၤ. ဝံၤန့ၣ်ဒီး, ကစၢ်ခရံာ် “ဟံးန့ၢ်လီခီဒီးစံးဝဲဒၣ်, လီခီအံၤမ့ၢ် တၢ်အၢၣ်လီၤအီလီၤအသီ လၢယသွံၣ်န့ၣ်လီၤ. ဖဲဒၣ်သုအီတၢ်အံၤတစုစုဒီး, မၤလၢတၢ်သ့ၣ်နီၣ်ထီၣ်ယၤအဂီၢ် (:၂၅) န့ၣ်လီၤ. ဒ်ပမ့ၢ်ပှၤစူၢ်က့ၤနာ်က့ၤ ကစၢ်ခရံာ်တဖၣ်အသိး, ဖဲပဟံးန့ၢ်ကိၣ်ဒီးအီလီခီ တဘျီလၢ်လၢ်န့ၣ် မ့ၢ်ဒၣ်ပသ့ၣ်နီၣ်ထီၣ်က့ၤ ကစၢ်ယွၤအတၢ်အဲၣ် အတၢ်ကဟုကညီၢ်အဒိၣ်အယိာ်န့ၣ်လီၤ.

ရဲး(စ) ပာ်ဖျါထီၣ် အတၢ်အဲၣ် ခီဖျိလၢတၢ်သူၣ်အိၣ်သးအိၣ် အတလါဖိတဖျၢၣ်, တၢ်ဟ့ၣ်လၢယထံၣ်န့ၢ်ပလၢၢ်အီၤသ့တမံၤ, ဒီးပာ်တ့ၢ်န့ၢ်ယၤ နီၣ်တၢၤစ့ဖိ တဘိ, လၢတၢ်မၤသ့ၣ်နီၣ်ထီၣ်က့ၤယၤတလါဝံၤတလါန့ၣ်လီၤ. ကစၢ်ယ့ၣ်ရှူး အဲၣ်ပှၤ, ဒီးဟ့ၣ်လီၤပှၤအတၢ်ဟ့ၣ်လၢ ကဆီတလဲတၢ်အိၣ်မူ, ခီဖျိလၢတၢ်ဟ့ၣ်လီၤကွံာ် အနီၢ်ခိ, ဒ်တၢ်လုၢ်တမံၤအသိး, လၢသ့ၣ်ဖျၢၣ်ထူၣ်စုညါအလိၤ လၢပတၢ်ဒဲးဘးအဂီၢ်န့ၣ်လီၤ. လၢတၢ်မၤသ့ၣ်နီၣ်ထီၣ်က့ၤပှၤ အတၢ်အဲၣ် အထူအယိာ်အဂီၢ်, ကစၢ်ယ့ၣ်ရှူး ပာ်လီၤတ့ၢ်န့ၢ်ပှၤ တၢ်သ့ၣ်နီၣ် ဘူၣ်စီဆှံအလုၢ်အလၢ်န့ၣ်လီၤ.