ပိာ်မုၣ်လၢ ဟဲထီၣ်တၢ်ထံၣ်လိာ်အိၣ်ဖှိၣ် (conference) တဂၤ ပာ်သူၣ်ပာ်သးဘၣ်ဝဲဒၣ် အတံၤသကိးလၢ ကဘၣ်ဟ့ၣ်ထီၣ် တၢ်ဂ့ၢ်လၢ မုၢ်တနံၤအံၤန့ၣ် ဖျါလၢအိၣ်တဆူၣ်ဘၣ် န့ၣ်လီၤ. အဝဲလဲၤဆူ အတံၤသကိးအအိၣ်, ဒီးသံကွၢ်သံဒိးဝဲန့ၣ်ဒီး, ပှၤကဘၣ်ဟ့ၣ်ထီၣ်တၢ်တဂၤန့ၣ် စံးဆၢအီၤ “မုၢ်တနံၤအံၤ, ယကမၤဝံၤ တၢ်ပာ်ဖျါန့ၣ်လီၤ. ခဲမုၢ်ဆ့ၣ်ဂီၤခီ, ယမ့ၢ် တကိညၣ်ထီၣ်က့ၤဘၣ်န့ၣ်ဒီး, ယကလဲၤဒုးနဲၣ်ယသးလၢ ကသံၣ်သရၣ်” န့ၣ်လီၤ. ပိာ်မုၣ်တဂၤအံၤ တသးပ့ၤနီၣ် အတံၤသကိး အတၢ်အၢၣ်လီၤဘၣ်. အဝဲကဘၣ်က့ၤဆိဝဲဒၣ်အဃိ, တဲတ့ၢ်ဝဲအတံၤသကိးအဂၤ ဒ်သိးကကွၢ်ထွဲ ပှၤကဘၣ်ဟ့ၣ်ထီၣ်တၢ်တဂၤန့ၣ်လီၤ.

လၢခံတဂီၤန့ၣ်, တၢ်ဟဲဒိတကျိာ် ပှၤဟ့ၣ်ထီၣ်တၢ်အဒၢး အတြဲၤ, ဒီးတံၤသကိး ခံဂၤတဂၤန့ၣ် ဟဲဆူအအိၣ်, ဒ်သိးကနီၣ်ဆှၢအီၤဆူ တၢ်ဆါဟံၣ်န့ၣ်လီၤ. လၢတၢ်ပၢၤဃာ် တၢ်အၢၣ်လီၤအီလီၤ, ဒီးလၢတၢ်ဘူၣ်ဂ့ၤတီၢ်ဘၣ်အပူၤ, အဝဲဒိးန့ၢ်ဘၣ်တၢ်ကူစါယါဘျါလၢ ကမၤပူၤဖျဲးအသးသမူ ဘၣ်ဆၢဘၣ်ကတီၢ်န့ၣ်လီၤ. လၢတၢ်သးစွံကတုၤအပူၤ, တံၤသကိးတဖၣ် ကွၢ်ထွဲမၤစၢၤတၢ်န့ၣ် ကဲထီၣ်တၢ်မၤစၢၤ လၢကပူၤဖျဲးဒီးတၢ်သံန့ၣ်လီၤ.

ဒ်ပှၤသ့ၣ်တဖၣ်လၢ လံာ်မၢ်ကူး ၂ အပူၤအသိး, တံၤသကိးတဖၣ် အတၢ်မၤစၢၤလၢတၢ်ပာ်သးစွံကတုၤန့ၣ် ကဲထီၣ်တၢ်ဆိၣ်ဂ့ၤတမံၤသ့ဝဲဒၣ်န့ၣ်လီၤ. အဝဲသ့ၣ်နၢ်ဟူဝဲဒၣ် ကစၢ်ယ့ၣ်ရှူး အတၢ်ကူစါယါဘျါတၢ် အစိကမီၤအဂ့ၢ်, ဒီးခဲကနံၣ်အံၤ, ကစၢ်ယ့ၣ်ရှူး ကဟဲဒၣ်ဝဲဆူ အဝဲသ့ၣ်အဝ့ၢ် (:၁) န့ၣ်လီၤ. မ့ၢ်လၢပှၤဂီၢ်မုၢ်တဖၣ် အိၣ်ဖှိၣ်ရိဖှိၣ်တကီၢ်ခါအါဂၤ, “တုၤအလီၢ်တအိၣ်လၢာ်ဘၣ်” အဃိ, ဒ်သိးပှၤသ့ၣ်တဖၣ် ကလဲၤစိာ် အတံၤသကိးလၢ အသံတခီပၤတဂၤဆူ ကစၢ်ခရံာ်အဂီၤထံးအဂီၢ်န့ၣ် တသ့လၢၤဘၣ် (:၂) န့ၣ်လီၤ. တၢ်လၢ အတံၤသကိး လိၣ်ဘၣ်တၢ်မၤစၢၤတမံၤန့ၣ် ဒ်သိးကဒိးန့ၢ်ဘၣ်ဝဲအဂီၢ်, ပှၤလွံၢ်ဂၤန့ၣ် တပျဲဝဲဒၣ် ပှၤဂီၢ်မုၢ် ဆိကတီၢ်အဝဲသ့ၣ်ဘၣ်. လၢတၢ်န့ၣ်အဃိ, “အဝဲသ့ၣ်မၤဟးဂီၤ ဟံၣ်ခိၣ်, ဒီးဘၢၣ်ဖျိတၢ်လၢ အအိၣ်ဝဲအလီၢ်အဖီခိၣ်, ဒီးစဲၤလီၤလီၢ်မံလၢ ပှၤသံတခီပၤတဂၤ မံလီၤလၢအပူၤ” (:၄) ဆူ ကစၢ်ခရံာ် လၢအမၤဘျါအီၤတဂၤအအိၣ် (: ၁၁-၁၂) န့ၣ်လီၤ.

တၢ်လၢပှၤဂုၤပှၤဂၤ လိၣ်ဘၣ်ဝဲတဖၣ်န့ၣ် မ်ပကစိာ်ဆှၢဆူ ကစၢ်ယ့ၣ်ရှူးအအိၣ်, ခီဖျိတၢ်ထုကဖၣ်စွံကတုၤန့ၣ်တက့ၢ်. ဒီးတၢ်လၢပလိၣ်ဘၣ်န့ၣ် ဒ်ကစၢ်ယ့ၣ်ရှူး ကတဲာ်ကတီၤန့ၢ်ပှၤအသိး, မ်ပကထဲးဂံၢ်ထဲးဘါ မၤဂ့ၤမၤစၢၤ, ဒီးပာ်ဖျါထီၣ် တၢ်အဲၣ်လၢအဝဲသ့ၣ်အဂီၢ်ဂ့ၤဂ့ၤဘၣ်ဘၣ်န့ၣ်တက့ၢ်.