တၢ်ကီဘၣ်ယသးန့ၣ်လီၤ. မ့ၢ်လၢယတၢ်ဆိကမိၣ်တဖၣ် လီၤသံးကွံၢ်ဝဲအဃိ, ယကွဲး တၢ်ဘူၣ်သကိးဘါသကိး အတၢ်ကွဲးဖုၣ်န့ၣ် ဝံၤဒံးဒၣ်တဝာ်န့ၣ်လီၤ. ယဃ့ထုကဖၣ် “ကစၢ်ယွၤဧၢ, ယကဘၣ်မၤတၢ်မနုၤလဲၣ်” န့ၣ်လီၤ. ယသ့ၣ်နီၣ်ထီၣ်က့ၤ တၢ်ဃိထံဃုထံၣ်န့ၢ်တမံၤ အတၢ်ပာ်ဖျါ, ဖဲပဟးယဲၤယီၤတၢ်အကတီၢ်, ပတၢ်သ့ဆိကမိၣ်တၢ်တဖၣ်န့ၣ် အိၣ်ဟဲထီၣ်ဝဲဒၣ် ၆ဝ မျးကယၤအဃိ, ယဟးထီၣ်ဆူ ဟံၣ်လီၢ်ခံကျဲအံၣ်, ဒီးစံးကတိၤတၢ်ဒီးကစၢ်ယွၤဆူညါန့ၣ်လီၤ. မံးနံးသၢဆံ လဲၤပူၤကွံာ်ဝံၤန့ၣ်ဒီး, ယန့ၢ်ဂံၢ် န့ၢ်ဘါလၢသူၣ်လၢသးန့ၣ်လီၤ. ယက့ၤကဒါဆူ ယခီၣ်ဖၠူထၢၣ်, ဒီးမၤဝံၤယတၢ်ကွဲးန့ၣ်လီၤ.

လံာ် ၂ စီၤပၤ ၄:၁၈-၃၅ ပာ်ဖျါထီၣ် ဝံအလံၤရှါဒီးအခ့အပှၤ စီၤက့ၤဃစံ စံးဆၢမၤဆၢ ပှၤရှူန့ၣ်မုၣ် အတၢ်သကွံၢ်ကညး ဃ့တၢ်မၤစၢၤ မ့ၢ်လၢအဖိခွါသံအဃိ (၄:၂ဝ-၃၅) န့ၣ်လီၤ. ဒ်စီၤအလံၤရှါ နဲၣ်ဝဲအသိး (:၂၉), စီၤက့ၤဃစံ ပာ်လီၤအနီၣ်ထိးဘိလၢ ဖိသၣ်အမဲာ်အဖီခိၣ် (:၃၁) န့ၣ်လီၤ. စီၤအလံၤရှါ ဃ့ဘါထုကဖၣ်ယွၤ ဝံၤန့ၣ်ဒီး, “လဲၤထီၣ်မံလီၤလၢ ဖိသၣ်န့ၣ်အဖီခိၣ်” (:၃၄) န့ၣ်လီၤ. အကတၢၢ်န့ၣ် စီၤအလံၤရှါ “ဟဲက့ၤ, ဒီးဟးယဲၤယီၤတၢ်လၢဟံၣ်ပူၤ, ဒီးလဲၤထီၣ် စူၣ်ထီၣ်အသးလၢအဖီခိၣ်, ဒီးဖိသၣ်ဆံၣ်ဆဲထီၣ်နွံဘျီ, ဒီးဖိသၣ်အိးထီၣ်အမဲာ်” (:၃၅) န့ၣ်လီၤ.

ဘၣ်မနုၤအဃိ စီၤအလံၤရှါ “ဟးယဲၤယီၤတၢ်လၢဟံၣ်ပူၤ” လဲၣ်, ဒီးလၢအသးပူၤန့ၣ် ဆိကမိၣ်ဝဲတၢ်မနုၤလဲၣ်န့ၣ် လံာ်စီဆှံ တပာ်ဖျါဝဲဒၣ်ဘၣ်. တၢ်လၢပသ့ၣ်ညါတမံၤန့ၣ် ဖဲ စီၤအလံၤရှါ ဃ့ထုကဖၣ်တၢ်န့ၣ် ကစၢ်ယွၤ တစံးဆၢဝဲဘၣ်ဆၣ်, တဟ့ၣ်လီၤအသးဘၣ်. တၢ်အိၣ်အသးန့ၣ် တၢ်ကဘၣ်မၤအီၤတကီၢ်ခါအကတီၢ်, ပကထံၣ်န့ၢ် စီၤအလံၤရှါ ကတိၤတၢ်ဒီးကစၢ်ယွၤန့ၣ် တကီခဲဝဲဘၣ်န့ၣ်လီၤ.

ဖဲလၢနစုကတၢၢ်, ခီၣ်ကတၢၢ်, ဒီးနကဘၣ်မၤတၢ်မနုၤလဲၣ်န့ၣ် တသ့ၣ်ညါလၢၤဘၣ်အကတီၢ်, မ့ၢ်နကမၤတၢ်မနုၤလဲၣ်. လၢနဂီၢ်, “တၢ်ဃ့ဘါထုကဖၣ် ဟးယဲၤယီၤ” န့ၣ် ကအိၣ်ဝဲသ့ၣ်သ့ၣ်န့ၣ်လီၤ. တၢ်ဟးယဲၤယီၤ ဃ့ထုကဖၣ်တၢ် လၢပဟံၣ်ပူၤမ့ၢ်ဂ့ၤ, ပလဲၤဟးထီၣ်ဆူ ဟံၣ်လီၢ်ခံကျဲအံၣ်ဖိမ့ၢ်ဂ့ၢ်န့ၣ် ဖဲပလိၣ်ဘၣ်တၢ်လၢအကါဒိၣ်တမံၤ
တကီၢ်ခါအကတီၢ်, တၢ်ဘျးစဲမၤဘၣ်ထွဲလိာ်သးဒီးကစၢ်ယွၤန့ၣ် ကဟဲစိာ်န့ၢ် တၢ်စံးဆၢတဖၣ် လၢကမၤဆၢဘှါဆှဲမၤဂ့ၢ်ထီၣ် ပတၢ်အိၣ်အသးတဖၣ်န့ၣ်လီၤ.