လၢအပူၤကွံာ်, ဟီၣ်ခိၣ်ဒီဘ့ၣ်တၢ်ဒုးတၢ်ယၤဖးဒိၣ် ခံဘျီတဘျီအကတီၢ်, တၢ်ဒိန့ၢ်တၢ်ဂီၤလၢ နၣ်စံၣ် (Nazi) အလီၢ်ခၢၣ်သးအမဲာ်ညါ တဘ့ၣ်န့ၣ် မ့ၢ်တၢ်ဟ့ၣ်ပလီၢ်တမံၤလၢ ပဝဲခဲလၢာ်အဂီၢ်န့ၣ်လီၤ. လၢတၢ်ဂီၤအပူၤန့ၣ်, ပိာ်မုၣ်လၢ အကူသိးမုာ်မုာ်ခုၣ်ခုၣ်တဂၤ လဲၤခီဂာ်ကျဲန့ၣ်လီၤ. ပိာ်ခွါတဂၤန့ၣ် ကူသိးဝဲ ဆ့ကူဆ့ကၤအလၢအပှဲၤ (suit), ဒီးလဲၤဟးတၢ်လၢ ကျဲကပၤ, မ့မ့ၢ်ပိာ်ခွါအဂၤတဂၤန့ၣ် ဂဲၤဆၢထၢၣ် ဖးဝဲတၢ်ဘိးဘၣ်သ့ၣ်ညါ ဘ့ၣ်ဘၣ်ဖးလဲၣ် ဖဲတၢ်သူၣ်ထီၣ်အသနၢၣ်န့ၣ်လီၤ. ဖဲ နၣ်စံၣ် အလီၢ်ခၢၣ်သးအမဲာ်ညါ တြဲၤအဖီခိၣ်န့ၣ် တၢ်ဘျးထီဃာ် နီၣ်တယၣ်ဘျးစဲ, အလဲၢ် ကအိၣ်ဝဲဒၣ် တၢ်သူၣ်ထီၣ် ဒီတဝာ်တဘ့ၣ်န့ၣ် ဖျါလၢအဝဲသ့ၣ်ကိးဂၤဒဲး တပာ်သူၣ်ပာ်သးဝဲဒၣ်ဘၣ်န့ၣ်လီၤ. တၢ်ကွဲးအိၣ်ဝဲတထံၣ် လၢနီၣ်တယၣ်ဘျးစဲအဖီခိၣ်န့ၣ် “ယဒုးတၢ်လၢ ကစၢ်ယွၤ အတၢ်မၤအဂီၢ်, ခီဖျိလၢတၢ်တြီဆၢထီဒါပှၤယူဒၤဖိတဖၣ်” န့ၣ်လီၤ.
မ့ၢ်လၢကစၢ်ယွၤ ပာ်သူၣ်ပာ်သးတ့ၢ်လံ တၢ်ကမၤတရီတပါယွၤဒ်သိးအံၤအဃိ, ကစၢ်ယွၤ မၤလိာ် အပှၤဂီၢ်မုၢ်လၢ “ပှ့ၤဘၣ်ယွၤ နကစၢ် အမံၤလၢ တၢ်ကလီကလီတဂ့ၤ. အဂ့ၢ်ဒ်အံၤ, ပှၤလၢအပှ့ၤဘၣ် ယွၤအမံၤလၢ တၢ်ကလီကလီန့ၣ် ယွၤတပာ်ဘၣ်အီၤလၢ အတၢ်ဒဲးဘးတအိၣ်ဘၣ်” (၂ မိၤရှ့ ၂ဝး၇) န့ၣ်လီၤ. တၢ်မၤလိာ်အံၤ ကျၢၢ်ဘၢဃုာ်ဒီး တၢ်စူးကါ ကစၢ်ယွၤအမံၤ လၢကျဲတတီတလိၤအပူၤ- ဖဲပဆိၣ်အၢဆိၣ်သီတၢ်, (မ့) ဖဲပစုဘိခီၣ်ဘိတဖၣ် မ့ၢ်ဘၣ်ဒိဘၣ်ထံးအကတီၢ်, လၢတၢ်တပာ်သူၣ်ပာ်သးအပူၤန့ၣ် ပကိးထီၣ်ဘၣ် ကစၢ်ယွၤအမံၤန့ၣ်လီၤ. တၢ်မၤတရီတပါယွၤအမံၤန့ၣ် ပၣ်ဃုာ်ဒီး တၢ်လဲလိာ်တၢ်မၤကျိၤကျဲအဂ့ၤဆူ တၢ်အတဂ့ၤ, တၢ်အအၢတကပၤ, စူးကါကစၢ်ယွၤအမံၤလၢတၢ်ကျၢၢ်ဘၢမၤဘံၣ်မၤဘၢ တၢ်အၢတၢ်သီန့ၣ်လီၤ.
ပှၤဂုၤပှၤဂၤစံးဘၣ်ပှၤလၢ “မ့ၢ်ဒၣ်ပမၤကစၢ်ယွၤအတၢ်မၤ” ဒၣ်လဲာ်, တကြၢး ပထံၣ်လီၤက့ၤပသးလၢ ပမၤယွၤအတၢ်မၤဘၣ်န့ၣ်လီၤ. လၢတၢ်ထုကဖၣ်အပူၤန့ၣ် ပကဘၣ်ဃိထံသမံသမိးက့ၤ ပတၢ်ဖံးတၢ်မၤ, ဒီးဃုထံၣ်န့ၢ် တၢ်လၢကစၢ်ယွၤ ပာ်ဖျါ ဝဲလၢ လံာ်စီဆှံအပူၤန့ၣ်လီၤ. ပမၤယွၤအတၢ်မၤန့ၣ် ပသ့ၣ်ညါအီၤကသ့ဝဲဒၣ်ဒ်လဲၣ်.
စံး ၁၁၉:၉ ပာ်ဖျါဝဲလၢ “ဘၣ်ပလီၢ်အသး ဒ်နကလုၢ်ကထါအသိး” န့ၣ်လီၤ. ကစၢ်ယွၤ မၤလိာ်ဝဲဒၣ်ပှၤလၢ “မၤတၢ်အါအါဂီၢ်ဂီၢ်လၢ ကစၢ်အတၢ်မၤတထံၣ်ဃီ” (၁ ကရံၣ် ၁၅:၅၈) အံၤ စံးဘၣ်တဲဘၣ်ပှၤလၢ အတၢ်မၤန့ၣ် အိၣ်ဝဲလၢ လံာ်စီဆှံအပူၤန့ၣ်လီၤ. မ်ပကဒိကနၣ် ကစၢ်အကလုၢ်န့ၣ်တက့ၢ်.