ပှၤအါဂၤ ပဒ့ၣ်ဟးဆှဲး ကၠီး ခၠး့(စ) (George Chase) န့ၣ်လီၤ. ကၠီး အိၣ်ဆိးဝဲလၢ သ့ၣ်ပှၢ် အဒဲ အိၣ်ဝဲတဆံခံခီၣ်ယီၢ် နၢၣ်ဘၣ်လွံၢ်ကနူၤဃူတဖျၢၣ်အပူၤ, ဖဲ ထံကျိ ဖီကထး (က)(Pawcatuck) ဒီး လ့းတဲ နရၤကဲ(န)ဆဲး (Little Narragansett) ပီၣ်လဲၣ်က့ၣ်ကျီၤထံၣ်လိာ်အသး, ဖဲ နယူ အ့ကလဲ(န) (New England) န့ၣ်လီၤ. ပှၤသ့ၣ်ညါလၢ ကၠီး အဒဲန့ၣ် တၢ်လုၣ်ထံကျိးတအိၣ်ဝဲဒၣ်အဃိ, ပှၤအိၣ်ဆိးဖဲန့ၣ်တဖၣ် မ့ၢ်နၢဘၣ် တၢ်တမုာ်တလၤအစိန့ၣ်ဒီး, သ့ၣ်ညါဝဲလၢ ကၠီး တဂၤဟဲလံန့ၣ်လီၤ.
ဘၣ်ဖဲမုၢ်တနံၤ, ဟၣ်ရံၣ်က့ (Hurricane) ကလံၤမုၢ်တဖျၢၣ်အဃိ, အဲးတလဲထ့း ပီၣ်လဲၣ်မိၢ်ပှၢ် (Atlantic Ocean) အထံံတဖၣ် ဃ့ၢ်သဖှိထီၣ်ဆူ ပီၣ်လဲၣ်ကၢၢ်ပၤနံၤ, ဒီးမၤပျီကွံာ် ဟံၣ်ဃီလၢ အထုးန့ၢ်သူၣ်န့ၢ်သးတဖၣ်န့ၣ်လီၤ. ပှၤလၢအပူၤဖျဲးဒီးတၢ်သံတၢ်ပှၢ်တဖၣ် သုးယံၤအသးလၢ ပီၣ်လဲၣ်က့ၣ်ကျီၤ, ဒီးဃုအိၣ်ဆိးဝဲလၢ တၢ်လီၢ်အဘံၣ်အဘၢန့ၣ်လီၤ. အဝဲသ့ၣ်အကျါ, ပှၤဆံတဂၤန့ၣ် ဘၣ်စီၣ်လၢထံ, ဒီးလၢတၢ်ကနိးကစုာ်အပူၤန့ၣ် လဲၤအိၣ်ကဒုဝဲလၢ ကၠီး အဒဲန့ၣ်လီၤ. ကၠီး ဟ့ၣ်ဝဲဒၣ် တၢ်အိၣ်ဒီးအီၤခဲလၢာ်, ထံ, တၢ်နုၢ်ထံ, သအ့လၣ်ဖးထံ, ဒီးတၢ်အိၣ်ကဒုလီၢ်တဖၣ်န့ၣ်လီၤ. ဖဲ ၁၉၃၈ နံၣ် ကလံၤမုၢ် ဟၣ်ရံၣ်က့ မၤဟးဂီၤတၢ်ဝံၤ, ပှၤဝ့ၢ်ဖိတဖၣ် အတၢ်ထံၣ် ကၠီး ခၠး့(စ) န့ၣ် ဆီတလဲအသးန့ၣ်လီၤ.
ဖဲပမ့ၢ်စံၣ်ညီၣ်တဲာ် ပှၤဂၤအတၢ်အိၣ်ဖျါလၢခိတဖၣ်န့ၣ်ဒီး, တၢ်လီၤသးအုး အိၣ်ထီၣ်ဝဲ ဘၣ်ဆၣ်, မ့ၢ်ဒၣ် ပှၤဟီၣ်ခိၣ်ဖိအန့ဆၢၣ်န့ၣ်လီၤ. ပစံၣ်ညီၣ်တဲာ် ကစၢ်ယ့ၣ်ရှူး ဒ်သိးအံၤန့ၣ်လီၤ. ခါလၢအပူၤကွံာ် တၢ်တ့ခဲၣ်တၢ်ဂီၤတဖၣ်အပူၤန့ၣ်, ပတ့ခဲၣ်ပာ်ဖျါ ကစၢ်ယ့ၣ်ရှူးဒ်ပှၤဒိၣ်တၢ်ဂ့ၤဒိၣ်တၢ်ဝါတဂၤန့ၣ်လီၤ. ဘၣ်ဃးဒီး မ့းရှံအၤအဂ့ၢ်န့ၣ် ဝံယရှါယၤ ပာ်ဖျါဝဲလၢ “တအိၣ်ဘၣ်ဒီးအက့ၢ်အဂီၤဘၣ်, ဒီးတအိၣ်ဘၣ်ဒီးအဃံအလၤဘၣ်, ဒီးတုၤပထံၣ်အီၤဒီး, အဃံအလၤလၢ အဘၣ်ပမဲာ်န့ၣ်တအိၣ်ဘၣ်. ပှၤကညီမၤအီၤတရီတပါ, ဒီးလဲၤသဒၣ်အီၤလီၤ. မ့ၢ်ဝဲလၢပှၤတၢ်သူၣ်အုးသးအုး, ဒီးသ့ၣ်ညါတၢ်နးတၢ်ဖှီၣ်, ဒ်ပှၤတဂၤလၢ ပှၤမၤဘၢအမဲာ်လၢအီၤအသိး, ပှၤမၤအီၤတရီတပါ, ဒီးပတပာ်ဘၣ်အလီၢ်ဘၣ်” (ယရှါ ၅၃:၂-၃) န့ၣ်လီၤ. တၢ်အိၣ်ဒီးအီၤခဲလၢာ်န့ၣ် ဟ့ၣ်လီၤပှၤန့ၣ်လီၤ.“မ့ၢ်မးစိာ်ဝဲ ပတၢ်ဆူးတၢ်ဆါ, ဒီးဝံ ပတၢ်သူၣ်အုးသးအုး” (:၄) န့ၣ်လီၤ. အဝဲဟ့ၣ်လီၤအသးသမူလၢပဂီၢ်န့ၣ်လီၤ.
ဖဲပတနၢ်ဟူ, ပတထံၣ်ချုးန့ၢ် ပဝဲပှၤဟီၣ်ခိၣ်ဖိကဒဲကဒဲအန့ဆၢၣ်န့ၣ်ဒီး, ကမ့ၢ်တၢ်လီၤသူၣ်အုးသးအုးန့ၣ်လီၤ. ပမ့ၢ်တနၢ်ဟူ, တထံၣ်ချုးန့ၢ်ဘၣ် ကစၢ်ယွၤ, ပှၤလၢပသးဘၣ်အၢအီၤတဂၤန့ၣ်ဒီး, တၢ်သူၣ်အုးသးအုးအလီၢ် ကဒိၣ်ဝဲဒၣ်ထဲလဲၣ်.