ယတံၤသကိး ဘူး(ခၠ) ဘရံး(စ) (Butch Briggs) မ့ၢ် လီၢ်ကဝီၤတီၤထီကၠိ ပှၤသိၣ်လိနဲၣ်လိ ပှၤပှီၢ်ထံအကရူၢ်ဖိတဖၣ်န့ၣ်, ယံာ်တ့ၢ်လံ ယဲၢ်ဆံတနံၣ်, ဒီးပှၤအဲၣ်ဘၣ်အီၤဒိၣ်မးန့ၣ်လီၤ. လၢတၢ်သးအိၣ်သ့ၣ်ညါတၢ်နီၢ်နီၢ်အပူၤန့ၣ်, ယသံကွၢ်အီၤ လၢနံၣ်ယဲၢ်ဆံအတီၢ်ပူၤ, မ့ၢ်အမၤန့ၢ်မၤနၢၤ ကီၢ်စဲၣ်အပတီၢ်, တၢ်ပှီၢ်ထံစဲၣ်နီၤခိၣ်ဖး ပှံၤဘျီလံလဲၣ်န့ၣ်လီၤ. ဒ်အတၢ်ပနီၣ် တမံၤ, လၢအကလုၢ်ကပုာ်လုးဖိန့ၣ် စံးဆၢယၤ “မ့ၢ်လၢယတနုာ်လီၤ တၢ်ပှီၢ်ထံအတၢ်ပြၢ နီတဘျီအဃိ, ယတမၤန့ၢ်မၤနၢၤ ခိၣ်ဖးနီတမံၤဘၣ်” န့ၣ်လီၤ. ယသံကွၢ်ကဒီးအီၤ တဘျီ, “မ့ၢ်နပျဲၢ်တဖၣ် မၤန့ၢ်မၤနၢၤ တၢ်ပှီၢ်ထံစဲၣ်နီၤခိၣ်ဖးပှံၤဘျီလဲၣ်” န့ၣ်ဒီး, လၢတၢ်သးခုအပူၤန့ၣ် စံးဆၢယၤလၢ “သၢဆံခွံဘျီ” န့ၣ်လီၤ.
ဘူး(ခၠ) သိၣ်လိန့ၢ်ယၤ တၢ်မၤလိလုၢ်ဒိၣ်ပှ့ၤဒိၣ်တမံၤန့ၣ်လီၤ. ပှၤနဲၣ်လိတၢ်တဂၤ ဘၣ်ဟံးထီၣ်ဖီၣ်ထီၣ် မူဒါအလီၢ်အလၤလၢအကါဒိၣ်ဘၣ်ဆၣ်, လၢအပျဲၢ်ပှၤပှီၢ်ထံဖိတဖၣ် ကမၤန့ၢ်မၤနၢၤတၢ်အဂီၢ်, တအဲၣ်ဒိး တၢ်ဟ့ၣ်ပာ်လၤကပီၤအီၤဘၣ်. ဘူး(ခၠ) အတၢ်ဆီၣ်လီၤသးန့ၣ် ဒုးသ့ၣ်နီၣ်ထီၣ်က့ၤယၤလၢ ဘျၢတၢ်စီၤယိၤဟၣ်ထံၣ်က့ၤ အလီၢ်အလၤဒ်လဲၣ်န့ၣ်လီၤ. စီၤယိၤဟၣ် အမူဒါန့ၣ် ကဘၣ်နဲၣ်ဃီၤပှၤဂီၢ်မုၢ်တဖၣ်ဆူ ကစၢ်ယ့ၣ်ရှူး- ဒ်အမ့ၢ် မ့းရှံအၤ, ကမၤလၢပှဲၤ ကစၢ်ယွၤ အတၢ်အၢၣ်လီၤလၢ ကဆှၢလီၤပှၤအုၣ်က့ၤခီၣ်က့ၤတၢ်တဂၤန့ၣ်လီၤ. ဘၣ်ဆၣ်, ပှၤပညိၣ်ပာ်သူၣ်ပာ်သးဘၣ် စီၤယိၤဟၣ် ဒိၣ်ဒိၣ်အါအါအဃိ, တၢ်ဘူၣ်တၢ်ဘါခိၣ်နၢ်တဖၣ် အဲၣ်ဒိးဃုသ့ၣ်ညါအဂ့ၢ်လီၤတံၢ်လီၤဆဲးလၢ အဝဲမ့ၢ်မတၤတဂၤလဲၣ်န့ၣ်လီၤ. လၢတၢ်စံးဆၢအဂီၢ်, လံာ်စီဆှံ ကွဲးနီၣ်ပာ်ဖျါဝဲ စီၤယိၤဟၣ် န့ၣ် “အုၣ်အသးဒီးတသမၢဘၣ်ဝဲဘၣ်, ဒီးအုၣ်အသး, လၢယဲဒၣ်အံၤ, ယတမ့ၢ်ဘၣ်ခရံာ်ဘၣ်” (ယိၤ ၁:၂ဝ) န့ၣ်လီၤ. ဖဲပှၤဆီၣ်တံၢ်မၤအၢ မၤသီအီၤဒၣ်လဲာ်, စီၤယိၤဟၣ် သ့ၣ်ညါအလီၢ်အလၤဆှဲဆှဲဖိ လၢကဘၣ်စံၣ်တဲၤတဲလီၤ ကစၢ်ယ့ၣ်ရှူး အတၢ်ဟဲ (:၂၁-၂၃) အဂ့ၢ်န့ၣ်လီၤ. ကစၢ်ယ့ၣ်ရှူး မ့ၢ်ပှၤလၢ ပှၤဂီၢ်မုၢ်တဖၣ် ဆၢမုၢ်လၢ်အိၣ်ခိးဝဲဒၣ် (:၂၇) န့ၣ်လီၤ.
တၢ်ဆီၣ်လီၤသးက့ၢ်ဂီၤဒ်သိးအံၤ, လၢအတဒိးတၢ်ပာ်လၤပာ်ကပီၤ အါန့ၢ်ဒံးတၢ်လၢအကြၢးဒိးန့ၢ်ဝဲန့ၣ် မ့ၢ်ကျိၤကျဲလၢပဟံးဃာ်အီၤသ့, လၢအမ့ၢ် တၢ်ထံၣ်အဂ့ၤအဘၣ် ဘၣ်ဃးဒီးတၢ်လၢပမၤန့ၢ်မၤနၢၤတၢ်တဖၣ်အဂီၢ်, ဒီးတကတီၢ်ဃီန့ၣ် ပကသ့ၣ်ညါပာ်ပနီၣ် ပှၤဂၤအမူဒါ (မ့) အလီၢ်အလၤ လၢယွၤ ဟ့ၣ်လီၤအဝဲသ့ၣ်န့ၣ်လီၤ.
