လၢကီၢ်စဲၣ် ခဲရိၣ်လဲနါ-ကလံၤစိး, ထဲပှၤဝါဖံးဖိတဖၣ်ထီၣ်ဝဲဒၣ် ကၠိတဖျၢၣ်န့ၣ် ပှၤသူဖံးမုၣ်ဖိ ဒီရသံၣ် ခီး (Dorothy Counts) တဂၤ ဒ်သိးဒီးကထီၣ် တီၤထီကၠိအဂီၢ်, ဟဲဆဲးလီၤအမံၤအကတီၢ်, ဝူဒံၣ် ခူပၤ (Woody Cooper) အိၣ်ဆၢထၢၣ်ဝဲဒၣ် ဖဲပှၤဂီၢ်မုၢ်လၢအမၤတၢထီၣ်တၢလီၤတၢ်တဖၣ်အကျါန့ၣ်လီၤ. ဘၣ်ဆၣ်, ဖဲကၠိဖိအပိာ်ခွါတနီၤန့ၣ် ကိးပသူထီဒါဝဲ ဘၣ်ဃးဒီးတၢ်ဆီၣ်သနံး ပှၤသူဖံးဖိတဖၣ်, ဒီးကွံာ်အီၤလၢတၢ်ဘၣ်အၢဘၣ်သီဒၣ်လဲာ်, ဝူဒံၣ် တသိၣ်သီတြီဆၢ အဝဲသ့ၣ်ဘၣ်. မ့မ့ၢ်အိၣ်ဘှ့ၣ်အိၣ်ဘှီၣ်ဝဲတုၤဒၣ်လဲာ် ပိာ်မုၣ်တဂၤကိးပသူထီၣ်ဝဲလၢ, “ပိာ်မုၣ်ဖိသ့ၣ်ဧၢ, ထူးပှဲာ်အီၤလၢပထးခိၣ်ထံန့ၣ်တက့ၢ်” န့ၣ်လီၤ. လၢခံ, ဝူဒံၣ် သံကွၢ်လီၤက့ၤအသးလၢ, အစှၤကတၢၢ်န့ၣ် ဘၣ်မနုၤအဃိ နတအဲးထီၣ် နထးခိၣ်, ဒီးတဲတၢ်တမံၤမံၤလဲၣ်. အဝဲမ့ၢ် ပှၤဟဲထီၣ်ကၠိ ဒ်ကၠိဖိအဂၤတဖၣ်အသိးန့ၣ်လီၤ. ဝူဒံၣ် အတၢ်ကမၣ်လၢ အလီၤတိၢ်, တၢ်လၢကဘၣ်မၤဝဲန့ၣ် တမၤဝဲအဃိ, နံၣ်လၢအဆံတဖၣ်အပူၤန့ၣ် မၤတံာ်တာ်အသး, လီၤဆီဒၣ်တၢ်, ဖဲအထံၣ်က့ၤ အနီၢ်ကစၢ်အဂီၤ, လၢတၢ်ကစီၣ်အတၢ်ဂီၤအပူၤလၢ မုၢ်တနံၤအံၤန့ၣ်လီၤ. လၢခံအကတၢၢ်, လွံၢ်ဆံခွံနံၣ် လဲၤပူၤကွံာ်ဝံၤ, ဒ်သိးကဃ့ကညးအီၤအဂီၢ်, ဝူဒံၣ် ဆဲးကျိးဝဲဒၣ် ဒီရသံၣ်န့ၣ်လီၤ.
ဒ် ဝူဒံၣ် မၤလိန့ၢ်ဝဲအသိး, တၢ်ဒုးနဲၣ်ဖျါထီၣ်တၢ်အဲၣ်, ဒီးဆီၣ်ထွဲမၤစၢၤ ပှၤဂၤန့ၣ် တမ့ၢ်ထဲပမၤတၢ်သူၣ်ဒူသးဒူအတၢ်မၤဘၣ်, မ့ၢ်စ့ၢ်ကီးပတၢ်ဃုထၢ, ဒ်သိးပကလီၤဂာ်ဒီးကစၢ်ယ့ၣ်ရှူးအဂီၢ်န့ၣ်လီၤ. တၢ်အိၣ်ဖှိၣ်တဖၣ် ဘၣ်အိၣ်ဆိးဝဲလၢ တၢ်ဝံဃၢအဖီလာ်ဘၣ်ဃးဒီး တၢ်သိၣ်ကမၣ်သီကမၣ် ကစၢ်ယ့ၣ်ရှူးခရံာ်, ဒီးအတၢ်အဲၣ်တၢ်ကွံအဂ့ၢ် အဃိ, ပှၤတၢ်မၢဖိ စီၤယိၤဟၣ် သိၣ်လိနဲၣ်လိဝဲ တၢ်ဂ့ၢ်အံၤန့ၣ်လီၤ.
စီၤယိၤဟၣ် ကွဲးပာ်ဖျါဝဲ “ပအဲၣ်တၢ်ကွံတၢ်လီၤ. အဂ့ၢ်ဒ်အံၤ, အဝဲဒၣ်အဲၣ်ဆိပှၤလီၤ. ပှၤမ့ၢ်စံး, ယအဲၣ်ယွၤ, ဒီးမ့ၢ်သးဟ့အဒီပုၢ်ဝဲၢ်ဒီး, မ့ၢ်ပှၤကတိၤတၢ်ကဘျံးကဘျၣ်” (၁ ယိၤ ၄:၁၉-၂ဝ) န့ၣ်လီၤ. စီၤယိၤဟၣ် ဟံးန့ၢ်က့ၤ ကစၢ်ယ့ၣ်ရှူး အတၢ်မၤလိာ်ဖးဒိၣ်တထံၣ် ဒီးပာ်ဖျါဝဲ “ပှၤလၢအအဲၣ်ယွၤန့ၣ်, ကအဲၣ်စ့ၢ်ကီးအဒီပုၢ်ဝဲၢ်” (:၂၁) န့ၣ်လီၤ.
ဒ် ဝူဒံၣ်ဒီးဒီရသံၣ် ကဲထီၣ် တံၤသကိး ဘူးဘူးတံၢ်တံၢ်အသိး, အဝဲသ့ၣ်ဆဲးကပီၤဖျါက့ၤ တၢ်ဒီပုၢ်ဝဲၢ်မုာ်ခွါအတၢ်အဲၣ်န့ၣ်လီၤ. အဝဲသ့ၣ် နီၤဟ့ၣ်ခီ တၢ်ဂ့ၢ်တဖၣ် လၢသရိာ်ဒီးကၠိတဖၣ်န့ၣ်လီၤ. ဖဲ ဝူဒံၣ် ကသံဝဲဒၣ် မုၢ်နၤအကတီၢ်န့ၣ် ဒီရသံၣ် ဟဲကွၢ်အီၤ, ဒီးစံးဝဲဒၣ် “ယအဲၣ်ဘၣ်အီၤ,ဒီးယသ့ၣ်ညါလၢအဝဲအဲၣ်ယၤ”န့ၣ်လီၤ. တၢ်အဲၣ်အံၤ မ့ၢ်ဝဲကစၢ်ယ့ၣ်ရှူးအကျဲန့ၣ်လီၤ. ခီဖျိအတၢ်အဲၣ်လၢ အဆီတလဲမၤသီထီၣ်က့ၤတၢ်အပူၤ, ယွၤဟံးဃာ်ပာ်ဖှိၣ်ပှၤအဃိ, တၢ်အဲၣ်အံၤ မ့ၢ်စ့ၢ်ကီးကျိၤကျဲလၢပဂီၢ်သ့ဝဲဒၣ်န့ၣ်လီၤ.