ထီး(ဒ) (Todd) ကွဲမုာ်ဝဲဒၣ် အပုၢ် အဲလဲး(စ) (Alex) လၢအဖျိထီၣ် ခီလ့ၣ်ကၠိသီသီတဂၤ, ဒ်သိးကဟဲအိၣ်ဆိးဒီးအီၤ ဖဲအဟံၣ်လၢအဘှီဝဲန့ၣ်လီၤ. အဝဲအဲၣ်ဒိးမၤစၢၤဝဲဒၣ် အပုၢ်ကဒိးန့ၢ် ကျိၣ်စ့အခီၣ်တဃာ်တနီၤ, ခီဖျိလၢဒုးအိၣ်အီၤလၢအဟံၣ်, ဒ်သိးအသုတမၤလၢာ် အကျိၣ်စ့လၢ တၢ်ဒိးလဲဟံၣ်အဂီၢ်န့ၣ်လီၤ. ဃုလါလဲၤပူၤကွံာ်ဝံၤ, ထီး(ဒ) တဲ ဝဲဒၣ် အဲလဲး(စ) လၢကဟ့ၣ်ဟံၣ်လဲန့ၣ်လီၤ. နံၣ်တဖၣ်လဲၤပူၤကွံာ်ဝံၤန့ၣ်ဒီး, အဲလဲး(စ) ပတံထီၣ်ဝဲဒၣ်လၢ ကပှ့ၤဟံၣ် လၢအကစၢ်ဒၣ်ဝဲအဂီၢ်န့ၣ်လီၤ. ဖဲပှၤတူၢ်လိာ် အဲလဲး(စ)ကပှ့ၤဝဲဒၣ် ဟံၣ်န့ၣ်ဒီး, ထီး(ဒ) စံးဘၣ်တဲဘၣ်အပုၢ်, ဟံၣ်လဲကျိၣ်စ့လၢ နဟ့ၣ်တ့ၢ်ယၤတဖၣ်န့ၣ် ယပာ်ဖှိၣ်ဝဲဒၣ်အါနံၣ်အါလါလၢစ့တၢးန့ၣ် မ့ၢ်ဒၣ် နတၢ်လီၤ, ဒီးမၤကမၢ ကမၣ်အပုၢ်န့ၣ်လီၤ. လၢမဲာ်ထံမဲာ်နိအပူၤ, အဲလဲး(စ) ဒိးန့ၢ်ဝဲ ကျိၣ်စ့အါအါဂီၢ်ဂီၢ်န့ၣ်လီၤ.
လံာ် ၃ မိၤရှ့ ၂၅ ပာ်ဖျါဝဲဒၣ်, ကစၢ်ယွၤ ဟ့ၣ်လီၤ တၢ်မၤလိာ်တဖၣ်လၢ ပှၤအံၣ်စရ့လးဖိတဖၣ်အဂီၢ်, ခီဖျိလၢ စီၤမိၤရှ့န့ၣ် ပာ်ဃုာ်ဒီးတၢ်ကပျဲ ပှၤလၢအလိၣ်ဘၣ်တၢ်တဖၣ် “ဒ်သိးအကအိၣ်မူဒီးသုကသ့ဝဲအဂီၢ်” (:၃၅) န့ၣ်လီၤ. “ယူဘလံၣ် နံၣ်ယဲၢ်ဆံအနံၣ်” (:၁ဝ) အဂီၢ်, ကစၢ်ယွၤ ဒုးအိၣ်ထီၣ် တၢ်မၤလိာ်တဖၣ်အကျါ, မ့ၢ်ဝဲတၢ်မၤလိာ်တနီၤ, ဘၣ်ဃးဒီးတၢ်ပျဲပျၢ် ပှၤဂၤအဒ့ၣ်ကမၢ်တဖၣ်, တၢ်မၤဂ့ၤမၤစၢၤ ပှၤဖှီၣ်ဖိယၢ်ဖိတဖၣ်, ဒီးကဘၣ်ဟ့ၣ်ဝဲဒၣ် ကုၢ်သ့ၣ်တဖၣ်လၢ တၢ်သဘျ့ (:၂၃-၂၅) န့ၣ်လီၤ. လၢတၢ်အဲၣ်တၢ်ကွံအပူၤန့ၣ် ကစၢ်ယွၤ ဘိးဘၣ်သ့ၣ်ညါဝဲ တၢ်ဂ့ၢ်လၢအဒုးဟးထီၣ်ကွံာ်အပှၤဂီၢ်မုၢ်, “လၢကီၢ်အဲၤကူပတုးအပူၤ, ဒ်သိးယကဟ့ၣ်လီၤသုလၢ ကီၢ်ကနၤဧၣ်, ဒီးကဲထီၣ်သုကစၢ်” (:၃၈) န့ၣ်လီၤ. ကစၢ်ယွၤ ကတဲာ်ကတီၤန့ၢ် ထံကီၢ်တၢ်အိၣ်ဆိးအလီၢ်အသီတဘ့ၣ်, လၢအပှၤဂီၢ်မုၢ်အဂီၢ်, ဒီးခဲကနံၣ်အံၤ, အပှၤဂီၢ်မုၢ်တဖၣ် ကဘၣ်အိၣ်မူမၤဒိးအီၤ ခီဖျိလၢပာ်ဖျါထီၣ် တၢ်အဲၣ်, ဒီးအိးထီၣ် အဟံၣ်တဖၣ်လၢ ပှၤဂုၤပှၤဂၤအဂီၢ်န့ၣ်လီၤ.
အကတီၢ်လၢခံန့ၣ် ပှၤတၢ်မၢဖိ စီၤယိၤဟၣ် ကွဲးပာ်ဖျါဝဲ “ကွၢ်တက့ၢ်, ပၢ်ဟ့ၣ်လံပှၤလၢ တၢ်အဲၣ်တၢ်ကွံဒ်လဲၣ်ဒ်လဲၣ်, လၢတၢ်ကကိးပှၤလၢယွၤအဖိ” (၁ယိၤ ၃:၁) န့ၣ်လီၤ. မ့ၢ်လၢကစၢ်ယ့ၣ်ရှူး “ပာ်လီၤကွံာ်အသးသမူ လၢပဂီၢ်သတးဒီး, ပသ့ၣ်ညါလံ တၢ်အဲၣ်တၢ်ကွံ” (:၁၆) န့ၣ်လီၤ. ဒ် ကစၢ်ယ့ၣ်ရှူး မၤစၢၤပှၤအသိးန့ၣ်, ပမၤတၢ်ဒိၣ်ဒိၣ် အါအါဆူပှၤဂုၤပှၤဂၤအအိၣ်သ့ဝဲဒၣ်န့ၣ်လီၤ.