ကိးဆၢကိးကတီၢ်ဒဲး, တၢ်ကွဲးတ့ၢ်ဝဲ တၢ်အဲၣ်အလံာ်ပရၢလၢ ဒုးအိၣ်ထီၣ် တၢ်သူၣ်ဟူးသးဂဲၤ, ဒီးတၢ်ကနၢ်ပၢၢ်အီၤကီခဲဝဲဒၣ်တဖၣ်အကျါ, တဘ့ၣ်န့ၣ် ဘၣ်တၢ်ကွဲးတ့ၢ်အီၤလၢ ပှၤကွဲးတၢ်သူၣ်ဝံၣ်သးဆၢ လူဘ့း ဘဲ(န) ဘံၣ်ထိဘ့(န) (Ludwig Van Beethoven), ဒီးဘၣ်တၢ်ဃုထံၣ်န့ၢ်က့ၤအီၤ ဖဲအသံဝံၤအလီၢ်ခံ, ၁၈၂၇ နံၣ်န့ၣ်လီၤ. လံာ်ပရၢန့ၣ် ဘၣ်တၢ်ကွဲးအီၤချ့ချ့လၢစု, အိၣ်ပှဲၤဝဲဒီးလံာ်ကျိၤတဖၣ် လၢအပာ်ဖျါထီၣ်တၢ်အဲၣ်အဒိၣ်အယိာ်, အလီၤသူၣ်ပိၢ်သးဝး, “ယတၢ်အဲၣ်အထူအယိာ်,… မ့မ့ၢ်လၢနၤန့ၣ် ယတၢ်အိၣ်မူလၢထီၣ်ပှဲၤထီၣ် သ့ထဲဒၣ်, မ့တမ့ၢ်ဘၣ်ဒီး, ယအိၣ်မူတသ့ဘၣ်” န့ၣ်လီၤ. တၢ်လၢ အလီၤသးအုးန့ၣ်, လံာ်ပရၢအံၤ ဖျါလၢတၢ်တဆှၢလီၤအီၤနီတဘျီဘၣ်အဃိ, အဝဲအဲၣ်ဒိးဟ့ၣ်လီၤဝဲဒၣ် မတၤတဂၤလဲၣ်န့ၣ် ပှၤတသ့ၣ်ညါလၢၤဘၣ်န့ၣ်လီၤ.
ပှၤဖးလံာ်ဖိတဖၣ်လၢ အသ့ၣ်ညါနၢ်ပၢၢ်ဝဲဒၣ် ဘံၣ်ထိဘ့(န) အတၢ်သးဆၢမိၣ်န့ၢ်တၢ်အဲၣ်ဒိၣ်ဒိၣ်ကလဲာ်အဂ့ၢ်န့ၣ် ပာ်လုၢ်ပာ်ပှ့ၤဝဲ လံာ်ပရၢတဘ့ၣ်အံၤန့ၣ်လီၤ. ပလူၤကွၢ်ဃုတၢ်အဲၣ်, ဒီးတၢ်လၢကမၤလၢပှဲၤ ပသးဆၢမိၣ်န့ၢ်တဖၣ် လၢပှၤကညီတဖၣ်, တၢ်ဖိတၢ်လံၤတဖၣ်, ဒီးတၢ်လဲၤခီဖျိသ့ၣ်တဖၣ်အပူၤ, လၢအတမၤမံသူၣ်မံသးပှၤ လၢလၢပှဲၤပှဲၤဘၣ်န့ၣ်လီၤ. ဘၣ်ဆၣ်, လၢပှၤဟီၣ်ခိၣ်ဖိတဖၣ်ခဲလၢာ်အဂီၢ်, ကစၢ်ယွၤအတၢ်အဲၣ်, အၢၣ်လီၤအီလီၤတ့ၢ်ဝဲဒၣ် ခီဖျိလၢအပှၤဂီၢ်မုၢ်န့ၣ် ဒိၣ်န့ၢ်ယိာ်န့ၢ်ဒံး တၢ်အဲၣ်အဂ့ၢ်အကျိၤလၢ အဟါမၢ်ကွံာ်သ့ဝဲဒၣ်န့ၣ်လီၤ. ခီဖျိဝံယံးရမံယၤန့ၣ် ကစၢ်ယွၤ ဘိးဘၣ်ရၤလီၤဝဲလၢ “ယအဲၣ်တ့ၢ်နၤလၢတၢ်အဲၣ်အထူအယိာ်လီၤ. မၤသးဒ်န့ၣ်ဒီး ယမိၤလံနၤလၢ တၢ်ဘျုးတၢ်ဖှိၣ်” (ယံး ၃၁:၃) န့ၣ်လီၤ. လၢအတၢ်အဲၣ်အဒိၣ်အယိာ်အပူၤန့ၣ်, ကစၢ်ယွၤ အၢၣ်လီၤအီလီၤ ခါဆူညါတၢ်အိၣ်ဘှံးအိၣ်သါ, ဒီးကကွၢ်မဲာ်အဲၣ်လီၤဆီ (:၂) အပှၤဂီၢ်မုၢ်, ဒီးကယဲၢ်တၢ်လၢအဟးဂုာ်ဟးဂီၤတမံၤလၢ်လၢ်န့ၣ် ကဘှီဘၣ်မၤဂ့ၤထီၣ်က့ၤ (:၄) ဝဲဒၣ်န့ၣ်လီၤ. တဘျီဘၣ်တဘျီ, ပှၤဂီၢ်မုၢ်တဖၣ် စူးကွံာ်ညိကွံာ်, ဒီးထီဒါပူထီၣ်အီၤဘၣ်ဆၣ်, ကစၢ်ယွၤအၢၣ်လီၤဝဲသပှၢ်ပှၢ်, ဒ်သိးကဟံးန့ၢ်က့ၤ အပှၤဂီၢ်မုၢ်တဖၣ်ဆူအအိၣ် (:၉) န့ၣ်လီၤ.
အါနံၣ်အါလါလဲၤပူၤကွံာ်ဝံၤ, တချုးလၢပအဲၣ်ဆၢက့ၤအီၤဒံးဘၣ် (ရိ ၅:၈) ဒၣ်လဲာ်, တၢ်အဲၣ်လီၤထူလီၤယိာ် ဒ်သိးအံၤန့ၣ် ထိၣ်ဟူးထိၣ်ဂဲၤဝဲဒၣ် ကစၢ်ယ့ၣ်ရှူး, ဒ်သိးကတူၢ်သံအသးလၢ ပှၤတၢ်ဒဲးဘးဖိတဖၣ်အဂီၢ်န့ၣ်လီၤ. တလိၣ်လၢ ပကဃုထံၣ်န့ၢ်တၢ်အဲၣ်, (မ့) ဂုၢ်ကျဲးစၢးဒိးန့ၢ်ဘၣ် တၢ်အဲၣ်လၢၤဘၣ်. ကစၢ်ယွၤ အဲၣ်ဘၣ်တ့ၢ်လံပှၤလၢတၢ်အဲၣ်လီၤထူလီၤယိာ်အပူၤန့ၣ်လီၤ.