ခီဖျိလၢတၢ်ကျဲးစၢးဂဲၤလိာ်, ဒီးဃ့ထုကဖၣ်ကိးထီၣ် ကစၢ်ယွၤ တဘျုးနံၣ်ဝံၤ, ဖရဲး (Frank) ဆိကတီၢ်ကွံာ်ဝဲ တၢ်အီသံးအီဂာ်န့ၣ်လီၤ. မ့ၢ်လၢကစၢ်ယွၤ မၤတၢ်လၢအသးသမူအပူၤအဃိ, အဝဲတအီသံးလၢၤဘၣ်န့ၣ်လီၤ. ဘၣ်ဆၣ်, အဝဲမၤ တၢ်ဆီတလဲတနီၤလၢ အကါဒိၣ်တဖၣ်န့ၣ်လီၤ. လၢအဟံၣ်ပူၤန့ၣ် တပာ်ဝဲဒၣ်သံးလၢၤဘၣ်, ပလီၢ်သူၣ်ပလီၢ်သးဝဲဒၣ် တၢ်ဟ့ၣ်ပလီၢ် အတၢ်ပနီၣ်တဖၣ်လၢ အတၢ်ဆိကမိၣ်, ဒီးအတၢ်ပာ်သူၣ်ပာ်သးအပူၤ, ဒီးပလီၢ်ပဒီအသး လၢတၢ်အိၣ်အသးတမံၤမံၤအပူၤန့ၣ်လီၤ. အဝဲသန့ၤအသးလၢယွၤ, ဒီးဒ်သိးအသုတဟ့ၣ် ခွဲးယာ်လၢ တၢ်လ့ပစီ (မ့) တၢ်ဒဲးဘးအဂီၢ် သ့ၣ်ညါဝဲဒၣ်န့ၣ်လီၤ.

ပှၤတၢ်မၢဖိ စီၤပ့းတရူး ဟ့ၣ်ပလီၢ်တ့ၢ်ဝဲလၢ “ကီၤသုသးတက့ၢ်, ဆိးသီတက့ၢ်. အဂ့ၢ်ဒ်အံၤ, ဒ်ခ့ယုၢ်ကညီၤရုၢ်ရုၢ်အသိးန့ၣ်, သုဒုၣ်သုဒါမုၣ်ကီၤလံၢ် ဟးဝ့ၤဝီၤဃု ပှၤလၢအကယူၢ်လီၤဝဲ” (၁ပ့း ၅:၈) န့ၣ်လီၤ. မ့ၢ်လၢတၢ်တပာ်သူၣ်ပာ်သးအပူၤန့ၣ် မုၣ်ကီၤလံၢ် ကဟဲဒုးပှၤတလီၢ်လီၢ်- ဖျါလၢပတၢ်အိၣ်မူ ကဂ့ၤဒိၣ်အါထီၣ်တသ့လၢၤဘၣ်, (မ့) ပဆိကမိၣ်တမ့ၢ်လၢတၢ်လ့ပစီကလီၤဘၣ်ပှၤ နီတဘျီဘၣ်လၢ ပတၢ်အိၣ်မူ လီၢ်ကဝီၤတတီၤတီၤအဃိ, အလီၢ်အိၣ်လၢ ပကဘၣ်ပလီၢ်သူၣ်ပလီၢ်သးန့ၣ် စီၤပ့းတရူး သ့ၣ်ညါဝဲဒၣ်န့ၣ်လီၤ.

စီၤယၤကိာ်စ့ၢ်ကီး, ဟ့ၣ်ပလီၢ်ဝဲ အပှၤဖးလံာ်ဖိတဖၣ်လၢ “မ်ဒ်န့ၣ်ဒီးပာ်သုသးလၢယွၤအဖီလာ်တက့ၢ်, ထီဒါမုၣ်ကီၤလံၢ်တက့ၢ်, ဒီးကဃ့ၢ်ထီၣ်ကွံာ်လၢသုအိၣ်” (ယၤ ၄:၇) န့ၣ်လီၤ. တၢ်ကတြီဆၢထီဒါ မုၣ်ကီၤလံၢ်အဂီၢ်, ကျဲအဂ့ၤကတၢၢ်န့ၣ် မ့ၢ်တၢ်အိၣ်ဘူးဘူးတံၢ်တံၢ်ဒီးယွၤ, ခီဖျိလၢတၢ်ထုကဖၣ်, ဒီးဟံးန့ၢ်တၢ်ဆၢကတီၢ်လၢယွၤအကလုၢ်ကထါအပူၤလီၤ. ပမ့ၢ်မၤဒ်န့ၣ်ဒီး, ကစၢ်ယွၤ ကသုးဘူးအသးဆူပအိၣ် (:၈) ခီဖျိ အသးစီဆှံ (ရိ ၅:၅) န့ၣ်လီၤ. စီၤယၤကိာ် ဟ့ၣ်လီၤစ့ၢ်ကီး, တၢ်ဟ့ၣ်ဂံၢ်ဟ့ၣ်ဘါတမံၤ, “ဆီၣ်လီၤသုသးလၢကစၢ်အမဲာ်ညါတက့ၢ်, ဒီးကပာ်ထီထီၣ်သု” (ယၤ ၄:၁ဝ) န့ၣ်လီၤ.

လၢပတၢ်အိၣ်မူအပူၤ, ဖဲတၢ်လ့ပစီလီၤဘၣ်ပှၤ, ဒီးပကျဲးစၢးဂဲၤလိာ်တၢ် အကတီၢ်, ပဝဲကိးဂၤဒဲး ပဘၣ်ကွၢ်ဆၢၣ်မဲာ်ဒီးတၢ်အကတီၢ်လၢ အတၤပှၤတဖၣ်န့ၣ်လီၤ. ပသ့ၣ်ညါလၢ ကစၢ်ယွၤ အဲၣ်ဒိးဝဲဒၣ် ပတၢ်ဖံးတၢ်မၤ ကကဲထီၣ်လိၣ်ထီၣ်, ဒီးပကမၤနၢၤလဲၤခီဖျိတၢ်အဃိ, ပပာ်ပသးမုာ်မုာ် သ့ဝဲဒၣ်န့ၣ်လီၤ. လၢပတၢ်ကီတၢ်ခဲတဖၣ်အပူၤန့ၣ် ကစၢ်ယွၤ အိၣ်ဒီးပှၤန့ၣ်လီၤ.