ဒီလၣ်ခံဆံတဘ့ၣ်, ဒီးလံာ်က့နီၤလီၤခံဘ့ၣ် လၢအပာ်ဖျါကစၢ်ယ့ၣ်ရှူးအဂ့ၢ်န့ၣ် ဘၣ်တၢ်ထၢနုာ်ဃာ်အီၤလၢ လံာ်ဒၢတဖျၢၣ်, ဒီးအလိၤန့ၣ် တၢ်ကွဲးအိၣ်ဝဲ “သးပှၢ် ကၠီ(န) ဒဲနယၢၣ် (John Daniels) အဒူၣ်ဖိထၢဖိ အတၢ်မၤသတူၢ်ကလာ် (လၢတၢ်တပညိၣ်ဆိပာ်ဝဲ) လၢတၢ်သးအိၣ် သးကညီၤအမုၢ်နံၤ” အိၣ်ဝဲတထံၣ်န့ၣ်လီၤ. ဖဲယလဲၤဆူ ပှၤတဝၢဖိ ခီလ့ၣ်ကၠိကရၢၢ်ပူၤအကတီၢ်, ပိာ်မုၣ်တဂၤဟ့ၣ်ယၤန့ၣ်လီၤ. အပူၤကွံာ်တနံၣ်န့ၣ်, ဖဲ ကၠီ(န) မၤစၢၤဝဲဒၣ် ပှၤလၢအဟံၣ်တအိၣ်တဂၤ, ဒီးဟ့ၣ်နီၤလီၤအီၤလၢ ကစၢ်ခရံာ်အဲၣ်အီၤအဂ့ၢ်ဝံၤန့ၣ်ဒီး, သိလ့ၣ်တခိၣ် နုာ်လီၤဘျၢၣ် ကၠီ(န) နးနးကျံးကျံးအဃိ, သံဝဲဒၣ်န့ၣ်လီၤ. ကၠီ(န) ပာ်လီၤတဲာ်တ့ၢ်ဝဲဒၣ် တၢ်အုၣ်အသးလၢ ကစၢ်ခရံာ်အဂ့ၢ် ခီဖျိလၢတၢ်ကတိၤ, ဒီးအတၢ်ဖံးတၢ်မၤန့ၣ် ဘၣ်တၢ်စိာ်မူစိာ်ဂဲၤဝဲဒၣ်လၢ မုၢ်တနံၤ, ဖဲယထံၣ် ပိာ်မုၣ်,ဃုာ်ဒီး, ကၠီ(န) အဒူၣ်ဖိထၢဖိတဖၣ်အတၢ်အိၣ်မူအပူၤန့ၣ်လီၤ.

ဖဲလံာ်မးသဲ ၂၆:၁၃ အပူၤန့ၣ်, ကစၢ်ယ့ၣ်ရှူးအတၢ်ကတိၤ, “ယစံးဘၣ်တဲဘၣ်သုတီတီအံၤ, ဖဲဒၣ်တၢ်သးခုအကစီၣ်အံၤ ဘၣ်တၢ်စံၣ်တဲၤတဲလီၤအီၤလၢ ဟီၣ်ခိၣ်ချၢ ဒီဘ့ၣ်ညါန့ၣ်ဒီး, တၢ်လၢပိာ်မုၣ်မၤတၢ်အံၤ, ကဘၣ်တၢ်စံၣ်တဲၤဝဲလၢ တၢ်သ့ၣ်နီၣ်ထီၣ်က့ၤအီၤအဂီၢ်” န့ၣ် ဒုးသ့ၣ်နီၣ်ထီၣ်က့ၤပှၤလၢ ပိာ်မုၣ်တဂၤအဂ့ၢ်န့ၣ်လီၤ. ဒ်သိးပိာ်မုၣ်တဂၤအံၤ ကလူလီၤဝဲသိနၢမူ လၢအလုၢ်ဒိၣ်ပှ့ၤဒိၣ်န့ၣ် လၢကစၢ်ခရံာ်အခိၣ်အဂီၢ်, အတၢ်သူၣ်ဂ့ၤသးဝါန့ၣ် ထိၣ်ဂဲၤထီၣ်အီၤ (:၇) န့ၣ်လီၤ. ပှၤဂုၤပှၤဂၤသ့ၣ်တဖၣ် အတၢ်နၢ်ပၢၢ်ကမၣ်အီၤ, ဒီးဒုၣ်ဒွဲၣ်အီၤလၢ အမၤလၢာ်ဂီၤတၢ် (:၈-၉) န့ၣ် ကစၢ်ယ့ၣ်ရှူး စံးပတြၢၤဝဲဒၣ်လၢ “တၢ်မၤအဂ့ၤ” (:၁ဝ)န့ၣ်လီၤ. မုၢ်တနံၤအံၤ, လၢအတၢ်ပညိၣ်သ့ၣ်တဖၣ်အဂီၢ်, ဒ်ကစၢ်ယွၤစူးကါဝဲ ပတၢ်ဖံးတၢ်မၤတဖၣ်အသိး, ပိာ်မုၣ်အတၢ်လုၢ်လၢ အလုၢ်ဒိၣ်ပှ့ၤဒိၣ်တမံၤအံၤ ဘၣ်တၢ်စူးကါအီၤလၢ ကစၢ်ယွၤ လၢကျဲလီၤဆီအပူၤန့ၣ်လီၤ.

လံာ်ဒၢဖိလၢယဒိးန့ၢ်ဝဲန့ၣ် မၤဂၢၢ်မၤကျၢၤ ယသးဆၢမိၣ်န့ၢ်တၢ်, လၢအမ့ၢ်ယသးအိၣ်ဟ့ၣ်နီၤလီၤ တၢ်လၢပှၤသူအီၤသ့တဖၣ်ဆူ ပှၤအိၣ်ဆိးလၢယဝ့ၢ်ပူၤ အကျဲအသနၢၣ်တဖၣ်အဂီၢ်န့ၣ်လီၤ ဘၣ်ဆၣ်, လၢတၢ်မၤလၤကပီၤ ကစၢ်ယ့ၣ်ရှူး အဂီၢ်န့ၣ်, ကျိၤကျဲကအိၣ်ဝဲဒၣ် အါကလုာ်န့ၣ်လီၤ. မ်ပကစံးဘၣ်တဲဘၣ် ပှၤဂုၤပှၤဂၤလၢ ကစၢ်ယ့ၣ်ရှူးအဂ့ၢ်, ဒီးပာ်ဖျါထီၣ်အတၢ်အဲၣ် ခီဖျိလၢပတၢ်အိၣ်မူပတၢ်ဖံးတၢ်မၤအပူၤန့ၣ်တက့ၢ်.