ဘၣ်တဘျီဘျီ, လၢတၢ်တဆိကမိၣ်အပူၤန့ၣ် သးအတၢ်ကူၣ်သ့တဖၣ် အိၣ်ဟဲဟးထီၣ် ဝဲဒၣ်န့ၣ်လီၤ. တယံာ်ဒံးဘၣ်န့ၣ် တၢ်မၤအသးဒ်သိးအံၤ ဟဲအိၣ်ထီၣ် ဖဲယဖးဘၣ် တၢ်ကွဲးဖှိၣ်ရၤ ဘၣ်ဃးဒီး ပှၤလိာ်ကွဲ အမဲရကၤဖျၢၣ်ထူ ထရၣ်ဘ့း(စ) ခဲ(လ)(စ) အဂ့ၢ်န့ၣ်လီၤ. ဘၣ်တဘျီ, သရၣ်နဲၣ်လိတၢ် လၢအသးဟးဂီၤအီၤတဂၤန့ၣ် စံးဘၣ်အီၤ, “လၢဟီၣ်ခိၣ်ချၢ, ကယဲၢ်ပှၤလၢနထံၣ်ဘၣ်အီၤတဂၤဂၤန့ၣ် ကမ့ၢ် ထံကဆှီ (မ့) ထံဘၣ်အၢအကျိၤတမံၤမံၤန့ၣ်လီၤ.” ခဲ(လ)(စ) ကမ့ၢ်ပှၤဒ်လဲၣ်တဂၤလဲၣ်န့ၣ် နထံၣ်မှံ ကသ့ဝဲဒၣ်သ့ၣ်သ့ၣ်န့ၣ်လီၤ.

ပဝဲကိးဂၤဒဲးစ့ၢ်ကီး, တၢ်ခံမံလိာ်န့ၣ် ကအိၣ်သ့ၣ်သ့ၣ်လၢပပူၤန့ၣ်လီၤ. တၢ်အကတီၢ် ကအိၣ်ဝဲဒၣ်တဘျီဘျီလၢ, ပကအိၣ်မူအိၣ်ဂဲၤဘၣ် ဒ်ထံအကဆှီ, (မ့) ဒ်ထံဘၣ်အၢအသိးန့ၣ်လီၤ. ကစၢ်ယွၤ ကိးပှၤလၢ ပကပိာ် ကစၢ်ယ့ၣ်ရှူးအခံ, အခီပညီစံးတၢ်န့ၣ် ပကဘၣ်မ့ၢ် ထံကဆှီလၢအယွၤလီၤအါန့ၢ်ဒံး ထံဘၣ်အၢန့ၣ်လီၤ.

လံာ်ဖံလံးပံၤ ၂ အပူၤန့ၣ် ယနၢ်ဟူဘၣ်ယဲ တၢ်ထံၣ်ဆိကမိၣ်ဒ်သိးအံၤ, လၢတၢ်ကွၢ်လိ ကစၢ်ယ့ၣ်ရှူး အတၢ်ဆီၣ်လီၤသး, ဒီးပညိၣ်ပာ်ဖှိၣ်ပသး လၢပှၤဂုၤပှၤဂၤအဂီၢ်န့ၣ်, စီၤပီလူး တၤဝဲဒၣ်ပှၤန့ၣ်လီၤ. ပှၤဂုၤပှၤဂၤအသးသမူ လၢတၢ်ဘၣ်အၢအိၣ်ဟဲယွၤလီၤဝဲတဖၣ် အိၣ်ပှဲၤဒီးတၢ်တဂ့ၤတဝါအဂ့ၢ်န့ၣ် စီၤပီလူး ထိၣ်သတြီၤပာ်ဖျါထီၣ်ဝဲ “လၢတၢ်အ့ၣ်လိာ်ဆိးက့ဒီး တၢ်ဟူထီသါလီၤကလီကလီန့ၣ် မၤတၢ်နီတမံၤတဂ့ၤ. မ့မ့ၢ်လၢတၢ်ဆီၣ်လီၤသုသးသတးဒီး, မ်ပှၤပာ်ပှၤဂၤဂ့ၤန့ၢ်အကစၢ်ဒၣ်ဝဲတက့ၢ်. သုတကွၢ်တဂၤလၢအကစၢ်ဒၣ်ဝဲ, တဂၤလၢ အတၢ်ဒၣ်ဝဲတဂ့ၤ. မ်အကွၢ်တဂၤလၢပှၤဂၤအတၢ်, တဂၤလၢ ပှၤဂၤအတၢ်စ့ၢ်ကီးတက့ၢ်” (:၃-၄) န့ၣ်လီၤ. အဆၢဖိ ၁၄ န့ၣ် စီၤပီလူး ကွဲးပာ်ဖျါအါထီၣ်ဝဲဖျိဖျိဖျါဖျါလၢ “တၢ်ကဒူးကဒ့ၣ်တၢ်ဒီးတၢ်ဂ့ၢ်လိာ်ဘှီလိာ်တအိၣ်ဘၣ်ဒီး, မၤသုတၢ်ခဲလၢာ်” န့ၣ်လီၤ.

တၢ်အိၣ်မူလၢအလီၤဂာ်ဒီးထံဘၣ်အၢအပီၤဘိန့ၣ် ကမ့ၢ်တၢ်မနုၤလဲၣ်. တၢ်ကွၢ်ထဲဒၣ်အနီၢ်ကစၢ်ဒၣ်ဝဲအဂီၢ်, ဒီးတၢ်ပာ်ထီၣ်ထီသး, တၢ်ကဒူးကဒ့ၣ်, ဒီးတၢ်ဂ့ၢ်လိာ်ဘှီလိာ်တၢ်န့ၣ်လီၤ. ဒီးတၢ်အိၣ်မူ လၢအမ့ၢ်ထံကဆှီ အပီၤဘိန့ၣ်, ကမ့ၢ်တၢ်မနုၤလဲၣ်. စီၤပီလူး စံးဘၣ် တဲဘၣ် စီၤတံၤမသ့းလၢ “ပှၤလၢအသးဒ်သိးဒီးအီၤ, လၢအကအံးကကွၢ်သု, ဒ်အဝဲဒၣ်အသိးန့ၣ် တအိၣ်ဘၣ်ဒီးယၤနီတဂၤဘၣ်” (:၂၀) န့ၣ်လီၤ.

ဖဲပဃုထံၣ်န့ၢ် တၢ်ဆိၣ်ဂ့ၤအကျိၤအကျဲလၢပှၤဂုၤပှၤဂၤအဂီၢ်န့ၣ်ဒီး, တၢ်သံကွၢ်လၢ ပဂ့ၢ်ဆိကမိၣ်ကွၢ်ထံလီၤက့ၤပသးတမံၤန့ၣ် “မ့ၢ်ပလီၤဂာ်အါဝဲဒၣ်လၢ ထံကဆှီ (မ့) ထံဘၣ်အၢအပီၤဘိဧါ” န့ၣ်လီၤ.