ဖဲ ၁၈၄၈ နံၣ်, အ့ကၠ့နံယၢၢ် ခၠါ(လ) အဲလဲး(ထ) ကၠူနယၢၣ် (Charles Ellet Jr.) တဂၤ, အသးတံာ်တာ်ဝဲဒၣ်လၢ တၢ်ကစးထီၣ် တ့ထီၣ်ဘှီထီၣ် တိၤအဆိကတၢၢ်လၢ နဲၣ်ကရၣ်ထံလီၤဆူ (Niagara Falls) တြီၤလာ်အဖီခိၣ် ဒ်လဲၣ်န့ၣ်လီၤ. မ့ၢ်တၢ်ကစိာ်ခီ ထးပျံၤဖးဒိၣ်တဘိဆူ ထံကျိဝၢ်ဘးခီန့ၣ်ဒ်လဲၣ်. လၢအတၢ်မံမီၢ်တမံၤအံၤ ထိၣ်ဟူးထိၣ်ဂဲၤအီၤအပူၤန့ၣ် ခၠါ(လ) ဆၢတဲာ်ဝဲလၢ ကမၤတၢ်ဒုးယူၤထိၣ်လံာ်လ့ (kite) အတၢ်ပြၢန့ၣ်လီၤ. ပှၤအမဲရကၤ ခွါလိၣ်ဘိဖိ ဟိမဲ(န) ဝီ(လ)(ရှ) တဂၤ မၤနၢၤတၢ်, ဒီးဒိးန့ၢ်ခိၣ်ဖး စ့ယဲၢ်ဒီလၣ်, မ့ၢ်လၢအလံာ်ထိၣ်လ့န့ၣ် စးထီၣ်ဒုးယူၤဝဲလၢ ကီၢ်ခဲနဒၣ်တကပၤ, ဒီးလဲၤတုၤဃီၤဝဲဆူ ကီၢ်အမဲရကၤ အထံကျိကၢၢ်ခိၣ်အဃိန့ၣ်လီၤ. အလံာ်ထိၣ်လ့အပျံၤန့ၣ် ဘၣ်တၢ်စၢတံၢ်လၢ သ့ၣ်တထံး, ဒ်သိးတၢ်ကတွံၤစိာ်ခီ ပျံၤအဒိၣ်ဒီးအဖှံတဘိဆူ ထံကျိဝၢ်ဘးခီ, ဝံၤန့ၣ်ဒီး, ထးပျံၤအဒိၣ် အဃၢတဖၣ် တဆီဘၣ်တဆီ, တုၤဒၣ်လဲာ် ထးပျံၤဖးဒိၣ် အဃၢကတၢၢ်လၢ ပှၤကတ့ တိၤအဂီၢ်န့ၣ် တုၤဃီၤဝဲဆူ အလီၢ်ဘၣ်အကျဲဘၣ်တစုန့ၣ်လီၤ. တၢ်မၤအံၤ မ့ၢ်တၢ်စးထီၣ်မၤတၢ်ဆံးဆံးဖိ, လၢတၢ်ကတ့သူၣ်ထီၣ် နဲၣ်ကရၣ် ထံလီၤဆူ အထးပျံၤတိၤန့ၣ်လီၤ.
တိၤတဘိအံၤ ကကဲထီၣ်ဝဲအဂီၢ်, တၢ်ဂ့ၢ်ကီတဖၣ်, ဒီးတၢ်အိၣ်အသးတဖၣ် ဖျါလၢတၢ်တမၤန့ၢ်မၤနၢၤတၢ်န့ၣ်, ဒုးနဲၣ်ဖျါထီၣ် ပှၤအံၣ်စရ့လးဖိတဖၣ် အတၢ်ကီတၢ်ခဲ, ဖဲအတ့သူၣ်ထီၣ်က့ၤ ယွၤအတၢ်လုၢ်ဟံၣ်, လၢဘၤဘူၤလိၣ်တၢ်စိာ်မၢကဲကုၢ်ဝံၤန့ၣ်လီၤ. တၢ်လၢကတြီဆၢ ကစၢ်ယွၤ အတၢ်မၤအဂီၢ်, တၢ်တအိၣ်နီတမံၤအဂ့ၢ်န့ၣ် ကလူးတဂၤ ထိၣ်ဂဲၤဝဲ ဝံစကၤရယၤ လၢတၢ်ကစီၣ်, “မ့ၢ်လၢယသး(ယွၤ)” (စကၤ ၄:၆) ကမၤဝံၤမၤလၢပှဲၤ ကစၢ်ယွၤ အတၢ်မၤတဖၣ်ခဲလၢာ်န့ၣ်လီၤ. ပှၤအိၣ်ဝဲတနီၤလၢ အထံၣ်ဘၣ်တ့ၢ်လံ အပူၤကွံာ် ယွၤအတၢ်လုၢ်ဟံၣ်, လၢအအိၣ်ပှဲၤဒီးတၢ်လၤတၢ်ကပီၤန့ၣ် တၢ်မ့ၢ်ထိၣ်သတြီန့ၣ်ဒီး, ဘၣ်ယိၣ်ဝဲဒၣ်လၢ ခ့ခါယွၤအတၢ်လုၢ်ဟံၣ်, လၢတၢ်ကသူၣ်ထီၣ်အီၤတဖျၢၣ် အတၢ်လၤတၢ်ကပီၤန့ၣ် ကဆံးစှၤန့ၢ်ဒံး အခီၣ်ထံးတဖျၢၣ် (ဧ့ၤ ၃:၁၂) န့ၣ်လီၤ. ဖဲယွၤထံၣ်န့ၢ် တၢ်မၤတဖၣ် စးထီၣ်ဝဲန့ၣ်ဒီး, ကစၢ်ယွၤ “ကသူၣ်ခုကသးခု” (:၁၀) ဝဲအဃိ, ဒ်သိးပှၤဂီၢ်မုၢ်တဖၣ် အသု “တပးကဲဘၣ်တၢ်အဆံးတဖၣ်အမုၢ်နံၤ” အဂီၢ်, ကလူးန့ၣ် ဟ့ၣ်ဂံၢ်ဟ့ၣ်ဘါ ဝံ စကၤရယၤန့ၣ်လီၤ.
တၢ်ဖံးတၢ်မၤတဖၣ်လၢ ကစၢ်ယွၤ ဟ့ၣ်လီၤပှၤန့ၣ် ကဖျါဝဲဒၣ် ဒ်တၢ်အဆံးအစှၤ, အကါတဒိၣ်တမံၤအသိးဒၣ်လဲာ်, ပန့ၢ်ဂံၢ်န့ၢ်ဘါသ့ဝဲဒၣ် ခီဖျိလၢပသ့ၣ်ညါ ကစၢ်ယွၤ ကမၤဝံၤမၤလၢပှဲၤ အတၢ်မၤဖးဒိၣ်တဖၣ်အဂီၢ်, စူးကါဝဲဒၣ် တၢ်အဆံးဖိတဖၣ်ဒ်လံာ်ထိၣ်လ့အပျံၤဖိတဖၣ်အသိးန့ၣ်လီၤ.