ပှၤလဲၤဟးဆူထံဂုၤကီၢ်ဂၤ အဆိကတၢၢ်တဘျီအဂီၢ်, တၢ်ဘိၣ်ထီၣ်လဲၤစိာ် ပိးလီတဖၣ်အါအါဂီၢ်ဂီၢ်န့ၣ် မ့ၢ်တၢ်ညီနုာ်မၤအသးတမံၤန့ၣ်လီၤ. မ့ၢ်လၢအပျံၤတၢ်ဘၣ်ယိၣ်တၢ်လၢ တၢ်ဘၣ်အိၣ်ယံၤဒီးဟံၣ်ဃီ, ဒီးတၢ်မ့ၢ်လိၣ်ဘၣ်ဖုးတမံၤမံၤအဃိန့ၣ်လီၤ. ဘၣ်ဆၣ်, တၢ်တယံာ်ဒံးဘၣ်န့ၣ် တၢ်ကွဲးဖှိၣ်ရၤတထံၣ် ပာ်ဖျါထီၣ် တၢ်ဂ့ၢ်ကီခဲဘၣ်ထွဲဒီးတၢ်စိာ်ပိးလီအါအါဂီၢ်ဂီၢ်အဂ့ၢ်န့ၣ်လီၤ. ဒီးဟ့ၣ်ကူၣ်ဝဲဒၣ်လၢ အသုတလဲၤစိာ် တၢ်ပှံၢ်ခိၣ်အထံ, ဒီးကဟၣ်မၤဃ့ခိၣ်သူ (အါတက့ၢ်န့ၣ် မ့ၢ်လၢသမှံၤဟံၣ်ဒွဲတဖၣ် ကတဲာ်ကတီၤပာ်ဝဲ), ဒီးပှၤသုတလဲၤစိာ် ခီၣ်ဖံး အါစူၣ်, ဒီးလံာ်လဲၢ်, တၢ်လၢအဃၢတဖၣ်, မ့ၢ်လၢတၢ်စိာ်ထီၣ်စိာ်လီၤအီၤ, ကီဝဲခဲဝဲအဃိန့ၣ်လီၤ. ပှၤကွဲးလံာ်န့ၣ် ဟ့ၣ်ပလီၢ်ဝဲဒၣ်လၢ, ယူၤရပၤ ထံကီၢ် အကျဲမုၢ်ဖိတဖၣ်အလိၤန့ၣ်, ဖဲလၢနစိာ်ထီၣ်စိာ်လီၤ, တွံၢ်ထီၣ်တွံၢ်လီၤ, နတၢ်ဘိၣ်တဖၣ်အကတီၢ်, နကဆၢမုၢ်လၢ်လၢ ယမ့ၢ်တဟဲစိာ်ဘၣ် ပိးလီအါမးန့ၣ် ကဂ့ၤဒိၣ်ဝဲန့ၣ်လီၤ.

ပသးသမူ အတၢ်လဲၤအဂီၢ်, ပှၤတၢ်မၢဖိ စီၤပီလူး ဟ့ၣ်ကူၣ်ပှၤလၢ “ပတဟဲစိာ်တၢ်ဆူဟီၣ်ခိၣ်နီတမံၤဘၣ်. ပက့ၤစိာ်တၢ်တသ့စ့ၢ်ကီးဘၣ်နီတမံၤဘၣ်” (၁ တံၤ ၆:၇) န့ၣ် မ့ၢ် တၢ်ကတိၤဟ့ၣ်ဒိ လၢကျဲအဂၤတဘိန့ၣ်လီၤ. စီၤပီလူး မၤဘၣ်ထွဲတၢ်ဂ့ၢ်အံၤလၢ တၢ်ဂ့ၢ်ကီဘၣ်ဃးဒီးတၢ်ပာ်ဖှိၣ် တၢ်စုလီၢ်ခီၣ်ခိၣ်အါအါဂီၢ်ဂီၢ်, “မ့မ့ၢ်ပှၤလၢအသါကကဲထီၣ်ပှၤအထူးအတီတဖၣ်န့ၣ် လီၤဘၣ်လၢပတၢ်လ့ပစီ, ဒီးဟ့ၣ်ပလီၢ်ဝဲဒၣ်လၢ တၢ်စိာ်တၢ်အါန့ၢ်ဒံး တၢ်လၢအလိၣ်န့ၣ် မ့ၢ် “ပျံၤသကွီၤ,” ဒီးကဆှၢဝဲဒၣ်ဆူ “တၢ်ဟးဂူာ်ဟးဂီၤ, ဒီးတၢ်ဟါမူၤဟါမၢ်” (:၉) န့ၣ်လီၤ. ပှၤစူၢ်က့ၤနာ်က့ၤတၢ်ဖိတဖၣ် တိာ်ပာ်လဲၤဝဲဒၣ်ဆူ တၢ်လီၢ်လီၤဆီတတီၤ, “လၢအဒုးအိၣ်ထီၣ်ပတၢ်ခဲလၢာ်ထူးထူးတီၤတီၤ လၢပကမုာ်လၤလၢအပူၤ” (:၁၇) အဂီၢ်, ကစၢ်ယွၤ ကတဲာ်ကတီၤန့ၢ်ဝဲ ကယဲၢ်တၢ်လၢအလိၣ်တဖၣ်ခဲလၢာ်န့ၣ်လီၤ.

မုၢ်တနံၤအံၤ, ပတၢ်အိၣ်မူအပူၤ, တၢ်ထူးတၢ်တီၤလၢပဟံးဃာ်ပာ်ဖှိၣ်အါအါဂီၢ်ဂီၢ်စံးတၢ်န့ၣ် မ့ၢ်တၢ်ကလီကလီလီၤန့ၣ် ပမ့ၢ်သ့ၣ်နီၣ်ထီၣ်က့ၤန့ၣ်ဒီး, ကဂ့ၤဝဲဒၣ်လၢပဂီၢ်န့ၣ်လီၤ. တၢ်သ့ၣ်တဖၣ်န့ၣ် ပက့ၤစိာ်အီၤတန့ၢ်တသ့ဘၣ်. ခီဖျိလၢ “တၢ်ဟ့ၣ်တၢ်ညီ, ဒီး ဟ့ၣ်တၢ်မၤစၢၤလၢပှၤဂၤ” (:၁၈) အပူၤန့ၣ်, စီၤပီလူး စံးဘၣ်ပှၤ “ဒီးပာ်ဖှိၣ်လၢအဂီၢ်ဒၣ်ဝဲတၢ်ခီၣ်ထံးဂ့ၤလၢ ခဲကိာ်တဃၣ်အဂီၢ်” န့ၣ်လီၤ. တၢ်ပာ်ဖျါအံၤ မ့ၢ်သးသမူအတၢ်လဲၤအတၢ်ဟ့ၣ်ကူၣ် အဂ့ၤကတၢၢ်, “ဒ်သိးအကဂုာ်ဟံးန့ၢ် တၢ်မူအထူအယိာ်” (:၉) အဂီၢ်, အတၢ်ခူသူၣ်န့ၣ်လီၤ.