ဖဲပဆိကမိၣ်ထီၣ် နံၣ်ထီၣ်သီ ပတၢ်ပာ်လီၤသးတဖၣ်န့ၣ်ဒီး, ဘၣ်သ့ၣ်သ့ၣ်, တၢ်ကဟဲနုာ်လီၤလၢပသးပူၤတဖၣ် ကမ့ၢ်ဝဲဒၣ် တၢ်ကွၢ်စိတဖၣ်လၢ အဒိၣ်ဝဲထီဝဲ, ဒီးပမၤန့ၢ်အီၤကီခဲဝဲတဖၣ် အစရီ (တၢ်ပာ်လီၤသးတဖၣ် ၈၀ မျးကယၤအံၤ ပစူးကွံာ်ညိကွံာ်အီၤဖဲ လါဖ့ၤဘြူၤအါရံၤ တဝာ်) န့ၣ်လီၤ. ပှၤကွဲးလံာ် အ့ၣ်မံၣ် ဝ့(လ)စၢၣ် (Amy Wilson) ဟ့ၣ်ကူၣ်ဝဲ တၢ်ထံၣ်ဆိကမိၣ်အဂ့ၤတမံၤန့ၣ် ဘၣ်ဃးဒီးတၢ်ထံၣ်ဆိကမိၣ် လၢအမ့ၢ် “ဒ်သိးပတၢ်အိၣ်မူကဂ့ၤထီၣ်ဝဲအဂီၢ်, ပကဘၣ်မၤဂ့ၤဘှီဘၣ်က့ၤပသး” န့ၣ် ဘၣ်သ့ၣ်သ့ၣ်ပကဘၣ်စူးကွံာ်ညိကွံာ်လၢာ်လၢာ်ဆ့ဆ့န့ၣ်လီၤ. ဝ့(လ)စၢၣ် အတၢ်ဟ့ၣ်ကူၣ် မ့ၢ်ဝဲဒၣ်, လၢတၢ်မၤအါထီၣ် တၢ်ပာ်လီၤသးတဖၣ်အလီၢ်န့ၣ်, ပကထံၣ် နံၣ်အသီ ဒ်ခွဲးယာ် တမံၤ, လၢပကမၤစှၤလီၤ မူဒါတၢ်ဖံးတၢ်မၤတဖၣ်, ဒီးအကတၢၢ်န့ၣ် “ပကစးထီၣ်စူးကွံာ်ညိကွံာ်” ပတၢ်ပာ်လီၤသးတနီၤလၢ “အဒိၣ်အသွါ, ဒီးပတၢ်ပာ်လီၤသးတဖၣ်လၢအဟံးန့ၢ် ပတၢ်ဆၢကတီၢ်, ဒီးပဂံၢ်ပဘါတဖၣ်, လၢအတဟ့ၣ်က့ၤပှၤတၢ်အဘျုးဒိၣ်ဒိၣ်အါအါတဖၣ်” န့ၣ်လီၤ.
ဟီၣ်ခိၣ်လၢအဆီၣ်သနံးပှၤထီဘိ, ဒ်သိးပကဘၣ်မၤ, ဒီးပကဘၣ်မၤအါထီၣ်တၢ်န့ၣ်, တဒံးသိးလိာ်အသးဒီးတၢ်အိၣ်မူအိၣ်ဂဲၤလၢ ကစၢ်ယ့ၣ်ရှူး ကွဲမုာ်ဝဲဒၣ် အပျဲၢ်အဘီၣ်တဖၣ် ကအိၣ်ကဆိးလၢအပူၤအဂ့ၢ်န့ၣ် ပလဲၤပူကွံာ်သ့ဝဲညီကဒၣ်ဖိန့ၣ်လီၤ. ဖဲယိၤဟၣ် ၁၅ အပူၤန့ၣ်, ကစၢ်ယ့ၣ်ရှူး ပာ်ဖျါထီၣ်အသး, ဒ် “စပံးအမုၢ်နီၢ်နီၢ်” (:၁), ဒီးပာ်ဖျါဝဲ အပျဲၢ်အဘီၣ်တဖၣ် ဒ် “အဒ့” တဖၣ် (:၅) အသိးန့ၣ်လီၤ.
ခီဖျိလၢတၢ်ဂုာ်ကျဲးစၢၤမၤတၢ်ဆူၣ်ဆူၣ်အဃိ, စပံးမုၢ်အဒ့တဖၣ်န့ၣ် တဒိၣ်ထီၣ်ဝဲဘၣ်. မ့မ့ၢ်ဒိးန့ၢ်ဝဲတၢ်အီၣ်တၢ်အီလၢ စပံးအမုၢ်အဃိန့ၣ်လီၤ. ဒ်န့ၣ်အသိး, တၢ်ဒိၣ်ထီၣ်အါထီၣ်လၢ ပအဲၣ်ဒိးမၤန့ၢ်ဝဲတဖၣ်န့ၣ် ပကဒိးန့ၢ်သ့ဝဲဒၣ် ဖဲပစူးကွံာ်ညိကွံာ် တၢ်သန့ၤလီၤပသး, ဒီးလၢအလီၢ်န့ၣ် ပနာ်သန့ၤ, ဒီးဃုထံၣ်န့ၢ် ဂံၢ်ဘါလၢ ကစၢ်ခရံာ်အပူၤန့ၣ်လီၤ. “အဂ့ၢ်ဒ်အံၤ, မ့တမ့ၢ်ဘၣ်လၢ (အီၤ) ဒီးသုမၤတၢ်တသ့ဘၣ်နီတမံၤဘၣ်” (:၅) န့ၣ်လီၤ.
တၢ်အိၣ်မူလၢ တၢ်သူၣ်ကိၢ်သးဂီၤအဆံးအစှၤအဂီၢ်, ပအိၣ်ဒီးတၢ်မုၢ်လၢ် ခီဖျိလၢကစၢ်ယ့ၣ်ရှူးန့ၣ်လီၤ. မၤစှၤလီၤတၢ်ဂဲၤပျုၢ်ဂဲၤဆှးတဖၣ်, ဒီးမၤအါထီၣ် တၢ်အိၣ်ဘှံးလၢ ကစၢ်ယွၤ အတၢ်အဲၣ်အပူၤ, ဒီးပကပျဲယွၤလီၤအတၢ်အဲၣ်ဆူ ပှၤလၢပခိၣ်ပဃၢၤတဖၣ်အအိၣ် (:၁၂,၁၇) န့ၣ်တက့ၢ်.
