ဒ်ပှၤအါဂၤဘၣ်ဂဲၤလိာ်ဝဲလၢ တၢ်သးစဲထီ မုာ်-ခွါအိၣ်ဃုာ်လိာ်သး အတၢ်ဂီၤမူတဖၣ်အသိး, ရၢးစဲၣ် (Russel) တဂၤ, လၢအသးစၢ်လံလံန့ၣ် ဘၣ်ကွၢ်ဆၢၣ်မဲာ်ဝဲဒၣ်စ့ၢ်ကီးန့ၣ်လီၤ. တၢ်သးစဲထီလၢ တၢ်ဂီၤမူဒ်သိးအံၤတဖၣ်န့ၣ် အစိကမီၤဆူၣ်ဒိၣ်မး, ဒီးကဲထီၣ်တၢ်စုၣ်တၢ်ပျၢ်လၢအသးကံၢ်ပူၤန့ၣ်လီၤ. အဝဲကွဲးပာ်ဖျါဝဲလၢ, “ယတၢ်အိၣ်မူန့ၣ် အိၣ်ပှဲၤဝဲဒီးတၢ်သ့ၣ်တဖၣ်အံၤ, လီၤဂာ်ဒီးခဲစၢၣ်အတၢ်ဆါ အဂံၢ်စဲၤလီၤအသးဒိၣ်ဒီၣ်ယိာ်ယိာ်လၢယဖံးယညၣ်အပူၤ” န့ၣ်လီၤ. ဖဲအဝဲဒိးန့ၢ် တၢ်အုၣ်က့ၤခီၣ်က့ၤလၢ ကစၢ်ယ့ၣ်ရှူး, ဒီးအတၢ်အိၣ်မူ ဆီတလဲက့ၤအသးဝံၤ, အကတၢၢ်န့ၣ် ခီဖျိလၢကစၢ်ယွၤအဘျုးအဖှီၣ်အဃိ, အဝဲထူၣ်ဖျဲးထီၣ်က့ၤဝဲဒၣ်လၢ မုာ်-ခွါအိၣ်ဃုာ်လိာ်သး အတၢ်ဂီၤမူတဖၣ် အစိအကမီၤ,ဃူာ်ဒီးတၢ်သးစဲထီအဂုၤအဂၤတဖၣ်န့ၣ်လီၤ. ရၢးစဲၣ် စံးဝဲဒၣ်လၢ, “ကစၢ်ယ့ၣ်ရှူး မ့ၢ်ပှၤလၢအုၣ်က့ၤခီၣ်က့ၤယၤအဃိ, ကယဲၢ်တၢ်ခဲလၢာ်အဂီၢ် ယကမၤလၤကပီၤအီၤ” န့ၣ်လီၤ.
ပှၤအံၣ်စရ့လးဖိတဖၣ်အဂီၢ်, ဝံယံးရမံယၤ စိာ်ဆှၢလီၤဝဲဒၣ် ယွၤအတၢ်ကစီၣ်လၢမုၢ်တနံၤန့ၣ် ယွၤ “ကပာ်အတၢ်သိၣ်တၢ်သီလၢ အဝဲသ့ၣ်အသးကံၢ်ပူၤ” (ယံး ၃၁:၃၃) န့ၣ်လီၤ. တၢ်အၢၣ်လီၤအီၤလီၤအသီအံၤ လၢထီၣ်ပှဲၤထီၣ်ဝဲလၢ ကစၢ်ခရံာ် (ဧ့ၤ ၈:၆-၁၃), ခီဖျိလၢတၢ်နာ်န့ၣ် ကယဲၢ်ပှၤခဲလၢာ် ကဘၣ်တၢ်ဆီတလဲက့ၤဝဲဒၣ်လၢ ယွၤအဘျုးအဖှိၣ်န့ၣ်လီၤ. ခဲကနံၣ်အံၤ, “အသး…. အိၣ်ဝဲဆိးဝဲလၢပပူၤ” (ရိ ၈:၁၁), ဒီးယွၤအတၢ်သိၣ်တၢ်သီတဖၣ်န့ၣ် ဘၣ်တၢ်ကွဲးအီၤလၢ ပသးကံၢ်ပူၤန့ၣ်လီၤ. ဒ်သိးပကဃာ်က့ၤပသးဒီး လုၢ်လၢ်လၢအလီၤဘၣ်ယိၣ်, တၢ်လၢအတဘၣ်ယွၤအသး, ဒီးတၢ်လၢကမၤဟးဂီၤပှၤတဖၣ်အဂီၢ်, တၢ်လၢအလိၣ်ဒီးပှၤတဖၣ်န့ၣ် သးမုာ်စီဆှံအတၢ်စိတၢ်ကမီၤ ကကတဲာ်ကတီၤန့ၢ် ရၢးစဲၣ်, ဒီးကယဲၢ်ပှၤစူၢ်က့ၤနာ်က့ၤတၢ်ဖိတဖၣ်ခဲလၢာ်အဂီၢ်န့ၣ်လီၤ.
တၢ်အိၣ်မူ ဆီတလဲအသးစံးတၢ်န့ၣ် တမ့ၢ်တၢ်မၤအသး တကီၢ်ခါ, ဒီးညီကဒၣ်ဖိန့ၣ်ဘၣ်. ဘၣ်ဆၣ်, မ်ပကသ့ၣ်နီၣ်ထီၣ်က့ၤ, ဖဲပဘၣ်ကွၢ်ဆၢၣ်မဲာ် တၢ်ကီတၢ်ခဲ, လၢအမ့ၢ်တၢ်သးစဲထီလၢ တၢ်ဒဲးဘးအပူၤဒၣ်လဲာ်, ကစၢ်ယွၤ ဆီတလဲၤက့ၤ ပသူၣ်ပသးသ့ဝဲဒၣ် (ယံး ၃၁:၃၃) န့ၣ်လီၤ. ကစၢ်ယွၤ စံးဝဲဒၣ်, “သုကသ့ၣ်ညါယၤ” (:၃၄), ဒီးပကသ့ၣ်ညါယွၤအသးအစိအကမီၤလၢ အဆီတလဲတၢ်စ့ၢ်ကီးန့ၣ်လီၤ.
