“မ့ၢ်ပဟဲစိာ် တၢ်သးဝံၣ်မုာ်န့ၢ်ဒံး ခရံာ်အိၣ်ဖျဲၣ်အတၢ်သးဝံၣ်လၢ ပကသးဝံၣ် ပမူခိၣ်စီၤပၤ အတၢ်အိၣ်ဖျဲၣ်အဂီၢ် ကသ့ဝဲဒ်လဲၣ်.” “What Sweeter Music” လံာ်ကျိၤဖိအံၤ လၢနံၣ်ကယၤတဆံနွံ အထါတယုၢ်, ဘၣ်တၢ်ကွဲးအီၤလၢ ရီဘၢး ဟါရ့း(ခ) (Robert Herrick), ဒီးဘၣ်တၢ်ထံၣ်ဆိကမိၣ်မှံက့ၤအီၤလၢ ခ့ခါ ပှၤကွဲး ခရံာ်အိၣ်ဖျဲၣ်တၢ်သးဝံၣ် ကၠီ(န) ရၢးထၢၣ် (John Rutter), ဒီးကဲထီၣ်ဝဲဒၣ် တၢ်သူၣ်ဝံၣ်သးဆၢတယုၢ်လၢ ပှၤအဲၣ်သးဝံၣ်အီၤ ဖဲခရံာ်အိၣ်ဖျဲၣ်အဆၢကတီၢ်န့ၣ်လီၤ. အတၢ်ဒ့ကပုာ်လုးဖိအံၤ ပာ်ဖျါထီၣ် တၢ်အိၣ်ခိးကွၢ်လၢ် ကစၢ်ယ့ၣ်ရှူးအတၢ်ဟဲ, တၢ်ဆၢကတီၢ်လၢအယံာ်, ဒီးအခုၣ်အံၤန့ၣ် ဘၣ်တၢ်ဆီတလဲအီၤ လၢတၢ်ကိၢ်ထီၣ်သီအကတီၢ်န့ၣ်လီၤ. ပှၤသးဝံၣ်တၢ်တဖၣ် ဟဲစိာ်န့ၢ် ကစၢ်ယ့ၣ်ရှူး ခီဖျိလၢခရံာ်အိၣ်ဖျဲၣ်အတၢ်သးဝံၣ်, ဒီးပှၤဒိကနၣ်တၢ်ဖိတဖၣ် ဘၣ်တၢ်ကွဲမုာ်အဝဲသ့ၣ် ဒ်သိးကဟဲစိာ် အသူၣ်အသးန့ၣ်လီၤ.

ရၢးထၢၣ် သုးကျဲၤကွဲးဝဲ တၢ်သးဝံၣ်အံၤ ဒီးမၤဘၣ်ဘျီဘၣ်ဒါက့ၤဝဲဒီးခရံာ်တၢ်အိၣ်ဖှိၣ်အတၢ်ဖးခီဆၢလံာ်စီဆှံဘၣ်ထွဲဒီး ပှၤမၢ်ကူးတဖၣ် ဟဲစိာ်ဝဲ ထူ, လီၢ်ဘၣ်, ဒီးမူရၣ်ဆူ ကစၢ်ယ့ၣ်ရှူးအအိၣ်န့ၣ်လီၤ. ဒ်သိးကဘူၣ်ထီၣ်ဘါထီၣ် ဖိသၣ်ယ့ၣ်ရှူးအဂီၢ်, ပှၤမၢ်ကူးသ့ၣ်တဖၣ် ဘၣ်ဟဲဝဲဒၣ် လၢတၢ်လီၢ်အယံၤ (မး ၂:၁-၂) န့ၣ်လီၤ. ဖဲပှၤမၢ်ကူးတဖၣ် ထံၣ်ဘၣ် ဖိသၣ်ယ့ၣ်ရှူးန့ၣ်ဒီး, “သူၣ်ခုသးခုဒီးတၢ်သးခုဒိၣ်ဒိၣ်ကလဲာ်,” ဒီးလၢတၢ်ယူးယီၣ်အပူၤန့ၣ် ထိၣ်လီၤပှီၤအသး, ဒီးအိးထီၣ် အတၢ်လုၢ်ဒိၣ်ပှ့ၤဒိၣ်လၢ အခီၣ်ထံး (:၁၀-၁၁) န့ၣ်လီၤ. တၢ်ဟ့ၣ်ပလီၢ် ပှၤမၢ်ကူးတဖၣ်လၢ တၢ်မံမီၢ်အပူၤ, ဒ်သိးအသုတက့ၤကဒါဆူ ပှၤအၢပှၤသီ စီၤပၤဟ့ၤရိာ် အအိၣ်, ဒီးဟးထီၣ် ဝဲဒၣ်လၢကီၢ်ပူၤ, လၢကျဲအဂၤတဘိ (:၁၂) န့ၣ်လီၤ.

ခရံာ်အိၣ်ဖျဲၣ် အကတီၢ်န့ၣ် တကြၢးလၢ ပကပညိၣ်ပာ်ဖှိၣ်ပတၢ်သးစၢၢ်ဆၢတဖၣ်ထဲလၢ တၢ်ဟ့ၣ်ကနၢၤတဖၣ်ဧိၤဘၣ်. ဘၣ်ဆၣ်, တၢ်အကတီၢ်အံၤ မ့ၢ်တၢ်ဟ့ၣ်ဒီးတၢ်ဒိးန့ၢ် တၢ်ဟ့ၣ်တဖၣ်အကတီၢ်န့ၣ်လီၤ. ဟီၣ်ခိၣ်လၢအဟးဂီၤဝဲန့ၣ် ဒ်သိးကမၤဘျါက့ၤဝဲအဂီၢ်, ကစၢ်ယွၤ ဟ့ၣ်လီၤဝဲ အဖိခွါန့ၣ်လီၤ. ပမ့ၢ်တဟ့ၣ်ဘၣ် ကစၢ်ယ့ၣ်ရှူးလၢ ပသူၣ်ပသးဒံးဘၣ်န့ၣ်, မုၢ်တနံၤအံၤ မ့ၢ်မုၢ်နံၤအဂ့ၤကတၢၢ်တနံၤလၢ ပကဟ့ၣ်အီၤန့ၣ်လီၤ. ကစၢ်ယ့ၣ်ရှူး မ့ၢ်ပၢဆှၢတ့ၢ်လံနသူၣ်နသးန့ၣ်ဒီး, မ်ပကဟ့ၣ်ထီၣ်အီၤ ခရံာ်အိၣ်ဖျဲၣ်အတၢ်သးဝံၣ်လၢအမုာ်, လၤအပှဲၤဒီးတၢ်ဃူတၢ်ဖိး, ဒီးတၢ်သူၣ်ခုသးခု ဖဲပဆိကမိၣ်ထီၣ်အတၢ်ဟဲလၢ အပူၤကွံာ် နံၣ်တဖၣ်လၢဝ့ၢ်ဘ့ၤသလ့ၤဃ့ၣ်, ဒီးအိၣ်ခိးကွၢ်လၢ် အတၢ်ဟဲက့ၤကဒီးတဘျီအဂီၢ်န့ၣ်တက့ၢ်.