ဖဲပလဲၤတၢ်သးခုကစီၣ် အတၢ်လဲၤတၢ်က့ၤလၢ အံၣ်ကွ့ၣ်ဒီ (Ecuador) အထံကီၢ်န့ၣ်ဒီး, ဖဲပှၤတဂၤ ထုးဖှိၣ်ဝာ်ဖှိၣ်က့ၤ ပသၢသၣ်ဂီၤအကတီၢ်, လၢတၢ်ထုကဖၣ်ဆူၣ်ဆူၣ်အပူၤန့ၣ် ပလဲၤအိၣ်သကိးအီၤန့ၣ်လီၤ. လၢ စပဲန့းရှ် (Spanish) အကျိာ်, တၢ်ကတိၤ တပံာ်တကျါအပူၤန့ၣ် ယတဲဘၣ်အီၤလၢ ယၤဒီးယတံၤသကိးတဖၣ် ပအဲၣ်ဒိးတဲလိာ်သကိးဒီးနၤ ဘၣ်ဃးဒီးလံာ်စီဆှံအဂ့ၢ်ဖုၣ်ကိာ်န့ၣ်လီၤ. ဖဲပအုၣ်ပသးလၢ တၢ်သးခုကစီၣ်အဂ့ၢ်န့ၣ်ဒီး, အဝဲဆိကတီၢ် အတၢ်ဖံးတၢ်မၤ, ဒီးဒိကနၣ်ဝဲဒၣ်န့ၣ်လီၤ. ဝံၤန့ၣ်ဒီး, ပတံၤသကိးအကျါတဂၤန့ၣ် စးထီၣ်ဖးဝဲဒၣ် လံာ်စီဆှံလၢ အဲကလံးအကျိာ်န့ၣ်လီၤ. ဖဲပနၢ်ဟူ တၢ်ဖးဖျါထီၣ် တၢ်သးခုကစီၣ်အဂ့ၢ်လၢ အဲ(န)ဒံး(စ) အကစၢၢ်ကလိ (Andes mountains) တဖၣ် အကျါ, ဒီးပှၤတဂၤအံၤ ဖးပိာ်ထွဲ တၢ်သးခုကစီၣ်အဂ့ၢ်လၢ စပဲန့းရှ် အကျိာ်, ခီဖျိလံာ်ဆံးဆံးဖိလၢ ပဟ့ၣ်အီၤအပူၤန့ၣ် မ့ၢ်တၢ်အကတီၢ်အစီအဆှံဖိလၢ ပဝဲကိးဂၤဒဲးအဂီၢ် န့ၣ်လီၤ. ပကတိၤတၢ်ဒီးအီၤ,ဃုာ်ဒီးအဟံၣ်ဖိဃီဖိ ဖံးတၢ်မၤတၢ်လၢ တၢ်လီၢ်အိၣ်စီၤစုၤဒီးအီၤန့ၣ်ဝံၤ, ပဃ့ထုကဖၣ်တၢ်လၢအဝဲသ့ၣ်အဂီၢ်, ဒီးပလဲၤကဒီးဆူညါတဟံၣ်န့ၣ်လီၤ.

ဖဲပလဲၤ ကစၢၢ်ကလိအတၢ်လဲၤကျဲ, ပဖးလံာ်စီဆှံ, ဒီးစံၣ်တဲၤတဲလီၤ ကစၢ်ခရံာ်အဂ့ၢ်န့ၣ် ယဆိကမိၣ်ထီၣ် ကစၢ်ယ့ၣ်ရှူးဒီးအပျဲၢ်အဘီၣ်တဖၣ်, ဖဲအမၤတၢ်သးခုကစီၣ်လၢ ဟီၣ်ခိၣ်ချၢ, ဒီးလဲၤဟးဝဲလၢ အံၣ်စရ့လး အကစၢၢ်ကလိ, ဒီးကစၢၢ်ကဆူးအဂ့ၢ်န့ၣ်လီၤ.

ယရှါယၤ ၅၂:၇ ပာ်ဖျါဝဲဒၣ်လၢ, “ပှၤလၢအစံၣ်တဲၤတဲလီၤတၢ်သးခုအကစီၣ်, လၢအစံၣ်တဲၤတဲလီၤတၢ်ဃူတၢ်ဖိး, လၢအစံၣ်တဲၤတဲလီၤတၢ်အဂ့ၤ, လၢအဘိးဘၣ်သ့ၣ်ညါပှၤလၢ တၢ်အုၣ်က့ၤခီၣ်က့ၤ, လၢအစံးဘၣ်စံယိၣ်, နကစၢ်ကဲစီၤပၤန့ၣ် အခီၣ်အိၣ်လၢ ကစၢၢ်လိၤန့ၣ် မ့ၢ်အဃံအလၤဆံးဒိၣ်လဲၣ်” န့ၣ်လီၤ. ဝံတဂၤအံၤ ပညိၣ်ပာ်ဖျါဝဲ တၢ်ဆၢကတီၢ်လၢ ယွၤအပှၤဂီၢ်မုၢ်တဖၣ် ကဘၣ်တၢ်စိာ်မၢကဲကုၢ်အါနံၣ်အါလါဝံၤန့ၣ်ဒီး, ကဟဲက့ၤဆူအထံအကီၢ်အဂ့ၢ်န့ၣ်လီၤ. ဘၣ်ဆၣ်, ခ့ခါအဆၢကတီၢ်, ဖဲပဟ့ၣ်ခီနီၤလီၤ ကစၢ်ယ့ၣ်ရှူး အတၢ်သးခုကစီၣ်ဒီးပှၤဂုၤပှၤဂၤတဘျီလၢ်လၢ်န့ၣ် ဝံအတၢ်ကစီၣ်အံၤ ကဘၣ်တၢ်စူးကါစ့ၢ်ကီးဒီးပှၤန့ၣ်လီၤ.

ပကစံၣ်တဲၤတဲလီၤ တၢ်သးခုကစီၣ်အဂီၢ်, ပမ့ၢ်တဒိးန့ၢ် ခွဲးယာ်တဖၣ် ဒ်လၢ အဲ(န)ဒံး(စ) အကစၢၢ်ကလိၤ, လၢတၢ်လီၤကမၢကမၣ်အလီၢ်အကျဲအသိးဘၣ်ဆၣ်, ဖဲကစၢ်ယွၤ ဆှၢလီၤပာ်လီၤပှၤတၢ်လီၢ်တပူၤလၢ်လၢ်န့ၣ် ဒ်သိးပကဟ့ၣ်ခီနီၤ တၢ်အုၣ်က့ၤခီၣ်က့ၤ အတၢ်ကစီၣ်ဆူ ပှၤလၢကစၢ်ယွၤ ပာ်လီၤန့ၢ်ပှၤလၢပကျဲတဖၣ်အဂီၢ်, သးစီဆှံ မၤစၢၤပှၤသ့ဝဲဒၣ် န့ၣ်လီၤ.