မဲရံၣ် ခိဘၢၣ် (Marie Coble) အိၣ်ဝဲလၢတၢ်ဆါဟံၣ်အလီၢ်မံခိၣ်လိၤ, ဒီးထံၣ်ဝဲဒၣ် ပှၤနီၣ်သိလ့ၣ်လၢ အဆှၢထီၣ်ဆှၢလီၤတၢ်တဂၤ, ဘၣ်သ့ၣ်သ့ၣ်, ကမ့ၢ်ပှၤလၢအမၤစၢၤ, မၤပူၤဖျဲးအသးသမူတဂၤန့ၣ်ဒီး, အသးခုဝဲဒၣ်န့ၣ်လီၤ. အဝဲလီၤဃံၤဝဲဒၣ်, လၢအသိလ့ၣ် နုာ်လီၤဟးထီၣ်အကျဲလိၤအကတီၢ်, အခိၣ်ဘၣ်ဒိဒီးအသွံၣ်တဖၣ်ယွၤလီၤဝဲလၢ အခိၣ်နူာ်ပူၤန့ၣ်လီၤ. ဖဲ ရၣ်ဟံ ခူဖၢၣ် (Raheem Cooper) ထံၣ်ဝဲဒၣ် အတၢ်အိၣ်အသးန့ၣ်ဒီး, ကိးထီၣ် ဂ့ၢ်ဂီၤအူဆူၣ်ချ့ အပှၤမၤတၢ်ဖိတဖၣ်န့ၣ်လီၤ. မဲရံၣ် အဟံၣ်ဖိဃီဖိတဖၣ် ကွဲမုာ် ရၣ်ဟံ လၢကလဲၤဟးအိၣ်သကိးအီၤအဃိ, ရၣ်ဟံ ဟဲစိာ် တၢ်အီၣ်အဆၢတဖၣ်လၢ မဲရံၣ် အီၣ်ဝဲဝံၣ်တဖၣ်, ဒ်သိးကကဲထီၣ်တၢ်မၤစၢၤလၢ ကအိၣ်ဆူၣ်အိၣ်ချ့ထီၣ်က့ၤအဂီၢ်န့ၣ်လီၤ.

ဘၣ်ဃးဒီးအဝဲသ့ၣ်အဂ့ၢ်န့ၣ် ပှၤရှၤမရံဖိ အဂ့ၤတဂၤအဂ့ၢ်, အတၢ်ကတိၤဟ့ၣ်ဒိဖိန့ၣ်ဟဲနုာ်လီၤဆူယသးပူၤန့ၣ်လီၤ. တၢ်ကတိၤဟ့ၣ်ဒိဖိအံၤ မ့ၢ်ဝဲ ကစၢ်ယ့ၣ်ရှူး အတၢ်စံးဆၢဆူ ပှၤသ့လံာ်တၢ်သိၣ်တၢ်သီတဂၤ အတၢ်သံကွၢ်, “ဒ်သိးပကန့ၢ်ဘၣ်သါ တၢ်မူအထူအယိာ်ဒီး, ယဘၣ်မၤမနုၤတမံၤလဲၣ်” န့ၣ်လီၤ. ကစၢ်ယ့ၣ်ရှူး စံးဘၣ်အီၤ, မၤနဲဒ် “လံာ်တၢ်သိၣ်တၢ်သီအပူၤတၢ်ကွဲးအသိးန့ၣ်တက့ၢ်” (လူၤ ၁၀:၂၆), ပာ်ဃုာ်ဒီး, “အဲၣ်ပှၤလၢနဃၢၤ ဒ်နအဲၣ်လီၤနသးဒၣ်နဲအသိးန့ၣ်တက့ၢ်” (:၂၇) န့ၣ်လီၤ. ဘၣ်ဆၣ်, ပှၤသ့လံာ်တၢ်သိၣ်တၢ်သီတဂၤအံၤ သံကွၢ်ကဒီးဆူညါလၢ “ပှၤလၢယဃၢၤန့ၣ် မ့ၢ်မတၤတဂၤလဲၣ်” (:၂၉) န့ၣ်လီၤ.

ကစၢ်ခရံာ် အတၢ်စံးဆၢပာ်ဖျါထီၣ်ဝဲဒၣ် တမျိးတမျာ်တဖၣ် ဒိတီၢ်ဝဲပှၤတဂၤတုၤအကသံတ့ၢ်, ဒီးလဲၤသဒၣ်အီၤလီၤ. ဒီးပှၤလုၢ်တၢ်အဒိၣ်ဒီးပှၤလ့ၤဝံဖိခံဂၤ ထံၣ်အီၤဘၣ်ဆၣ်, လဲၤပူၤကွံာ်အီၤန့ၣ်လီၤ. “မ့မ့ၢ်ပှၤရှၤမရံဖိတဂၤန့ၣ် ထံၣ်အီၤ.. သးကညီၤအီၤ.., ဒီးဘိၣ်ဘံဝဲ အပူၤလီၢ်တဖၣ်,… ဒီးအံးက့ၤကွၢ်က့ၤအီၤ” (:၃၃-၃၄) န့ၣ်လီၤ. ဖဲပှၤရှၤမရံဖိတဂၤ ထံၣ်ဝဲဒၣ် ပှၤဘၣ်ဒိဘၣ်ထံးတဂၤအတၢ်လိၣ်အဂီၢ်, အတၢ်မၤစၢၤန့ၣ် မ့ၢ်တၢ်လၢအကဘၣ်မၤဝဲနီၢ်နီၢ်, ဒီးကဘၣ်မၤဝဲတကီၢ်ခါ, လၢတၢ်ကွၢ်မဲာ်တအိၣ်ဝဲဒၣ်လၢအပူၤကွံာ် ကလုာ်ဒူၣ် အတၢ်ထီဒါလိာ်သး, (မ့) တၢ်သိၣ်တၢ်သီ အခိၣ်သ့ၣ်လၢပနာ်အီၤအဃိ, ဒ်သိးကမၤစၢၤပှၤတဂၤဂၤအဂီၢ်, အဝဲတကြၢးလဲၤကပာ်ကွံာ်အီၤဘၣ်န့ၣ်လီၤ.

ဒီးကစၢ်ယ့ၣ်ရှူး သံကွၢ်အီၤ, “လၢပှၤသၢဂၤအကျါန့ၣ် မ့ၢ်အကဲလၢပှၤတဂၤန့ၣ် အပှၤလၢအဃၢၤဖဲလဲၣ်တဂၤလဲၣ်.” ဒီးပှၤသ့လံာ်တၢ်သိၣ်တၢ်သီတဂၤ စံးဆၢဝဲဒၣ် “မ့ၢ်ပှၤလၢအသးကညီၤအီၤတဂၤ” န့ၣ်လီၤ. ကစၢ်ယ့ၣ်ရှူး စံးဘၣ်အီၤ “လဲၤမၤနဲ ဒ်န့ၣ်အသိးတက့ၢ်” (:၃၆,၃၇) န့ၣ်လီၤ. လၢတၢ်လဲၤကပာ်ကွံာ် ပှၤဘၣ်ဒိဘၣ်ထံးတဂၤအလီၢ်န့ၣ် ဒ်သိးပကမၤစၢၤအီၤအဂီၢ်, ပဃုထံၣ်န့ၢ် တၢ်သးကညီၤသ့ဝဲဒၣ် လၢကစၢ်ခရံာ်အပူၤန့ၣ်လီၤ. တၢ်ဟ့ၣ်နီၤ ကစၢ်ယ့ၣ်ရှူး အတၢ်အဲၣ်အဂီၢ်, မ့ၢ်တၢ်မၤလိလၢ ပဝဲခဲလၢာ်အဂီၢ်န့ၣ်လီၤ.