လၢဝ့ၢ်နယူယီး ကျဲတဘိန့ၣ် ပှၤသးပှၢ်ပိာ်ခွါတဂၤ ဃ့ၢ်ဝဲဒၣ်ကယီၤကယီၤဖိအကတီၢ်, ဒီးထံၣ်ဝဲ ပှၤလၢအဟံၣ်ဃီတအိၣ်တဂၤ ပာ်လီၤဝဲ ခီၣ်ဖံးအလီၢ်လံၤဖိတစူၣ်လၢ အကပၤ, ဒ်အမ့ၢ် တၢ်ဃ့တၢ်မၤစၢၤ အတၢ်ပနီၣ်န့ၣ်ဒီး, အိၣ်ပတုာ်ဝဲဒၣ်တစိၢ်ဖိန့ၣ်လီၤ. ဘၣ်ဆၣ်, ပှၤဃ့ၢ်တၢ်ဖိတဂၤအံၤ သ့ၣ်ညါဝဲလၢ အဝဲသ့ၣ်ခံဂၤလိာ် ဒိးဝဲဒၣ်ခီၣ်ဖံးအနီၣ်ဂံၢ်န့ၣ် ဒ်သိးလိာ်သးအဃိ, တချုးဟ့ၣ်လီၤဝဲ အခီၣ်ဖံးဃုာ်ဒီး,အခီၣ်ဖျီၣ်ဆူ ပှၤဟံၣ်ဃီတအိၣ်လၢအသးစၢ်န့ၢ်အီၤတဂၤဒံးဘၣ်န့ၣ်, တဲနၢ်ပၢၢ်အီၤ, “ယတၢ်အိၣ်မူတစိၤသးန့ၣ်, ကစၢ်ယွၤ ဂ့ၤတ့ၢ်ဝဲလၢယဂီၢ်ဒိၣ်မး, ဒီးဆိၣ်ဂ့ၤတ့ၢ်ဝဲဒၣ်ယၤအဃိ, ယသးကလၢၢ်ဘၣ်ယဲလၢ ယဂ့ၤမၤဘျုးမၤဖှိၣ်စ့ၢ်ကီးနၤ,” ဝံၤန့ၣ်ဒီး, က့ၤဝဲဆူအဟံၣ် လၢအခီၣ်လၢကျဲန့ၣ်လီၤ.
မ့ၢ်လၢကစၢ်ယွၤ ဂ့ၤတ့ၢ်ဝဲလၢအဂီၢ်အဃိ, ဒ်ပှၤသးပှၢ်ပိာ်ခွါတဂၤအံၤ ဒုးနဲၣ်ပာ်ဖျါ တၢ်သးကညီၤဆူ ပှၤအဂၤတဂၤအသိး, ပှၤလၢအစူၢ်က့ၤနာ်က့ၤ ကစၢ်ယ့ၣ်ရှူးတဖၣ်ကိးဂၤဒဲးန့ၣ် ကစၢ်ယွၤအဲၣ်ဒိးဝဲလၢ ပကကူထီၣ်သိးထီၣ် “တၢ်သးကညီၤ” (ကလီး ၃:၁၂) န့ၣ်လီၤ. နီၢ်နီၢ်န့ၣ်, ကယဲၢ်ပမၤတၢ်န့ၣ် လၢတၢ်ကတိၤမ့ၢ်ဂ့ၤ, လၢတၢ်မၤမ့ၢ်ဂ့ၤ, ပကဘၣ်မၤတၢ်ခဲလၢာ်လၢ “ကစၢ်ယ့ၣ်ရှူးအမံၤ” (:၁၇) အပူၤန့ၣ်လီၤ. တၢ်လၢအပိာ်ထွဲထီၣ်အခံဒီး “တၢ်သးကညီၤ” န့ၣ်, ပကဘၣ်ဒုးနဲၣ်ဖျါထီၣ်စ့ၢ်ကီး, ပတၢ်အိၣ်မူသကဲာ်ပဝးလီၤဆီ လၢအမ့ၢ် “တၢ်သးကညီ,… တၢ်ဆီၣ်လီၤသး, တၢ်သးစူၤ, ဒီးတၢ်ဝံသးစူၤ” တဖၣ် (:၁၂) န့ၣ်လီၤ. မ့ၢ်လၢသးစီဆှံ အိၣ်ဂၢၢ်ဆိးကျၢၤလၢ ပသးကံၢ်ပူၤအဃိ, သးအတၤသၣ် (ကလၤ ၅:၂၂-၂၃) တဖၣ် မဲထီၣ်ဝဲလၢပပူၤ, ဒီးတၤသၣ်တဖၣ်အံၤ ကကဲထီၣ် တၢ်အုၣ်သး, လၢအမ့ၢ် ယွၤအတၢ်အဲၣ်လၢပဂီၢ်, ဒီးကယွၤလီၤဝဲဆူ ပှၤဂၤတဖၣ်အအိၣ်, ဒီးတၢ်ကပာ်ဖှိၣ်တၢ်ဂ့ၤတၢ်ဝါတဖၣ်ခဲလၢာ်ဆူ “တၢ်လၢတၢ်ပှဲၤအပျံၤစၢဃာ်တၢ်” အသိး (ကလီး ၃:၁၄) န့ၣ်လီၤ.
ဒ်ပှၤဃ့ၢ်တၢ်ဖိတဂၤအံၤအသိး, တၢ်ကန့ၢ်ခွဲးန့ၢ်ယာ်လၢတၢ်သးကညီၤအတၢ်မၤ တဖၣ်အဂီၢ်, မ်ပကအိၣ်ကတဲာ်ကတီၤပသး လၢတၢ်စံးကတိၤ ဟ့ၣ်ဂံၢ်ဟ့ၣ်ဘါတၢ်, တၢ်ဆိကမိၣ်မၤဂ့ၤတၢ်လၢပှၤဂၤအဂီၢ်, (မ့) ပမ့ၢ်ဘၣ်ဟ့ၣ်လီၤကွံာ် ပခီၣ်ဖံးဒၣ်လဲာ်န့ၣ်လီၤ. ဖဲပမၤအီၤန့ၣ်ဒီး, မ်ပကပညိၣ်နဲၣ်လိၤတၢ်ဆူ ကစၢ်ယ့ၣ်ရှူးအအိၣ် (:၁၇) န့ၣ်တက့ၢ်.
