ကီၣ်ရ့ ဘရိး(စ) (Corey Brooks) န့ၣ်, ပှၤသ့ၣ်ညါအီၤလၢ “တၢ်အိၣ်ဖှိၣ်သရၣ်လၢ တၢ်ဘါသရိာ်အခိၣ်ဒုး” တဂၤ, ဒ်သိးကထိၣ်ဟူးထိၣ်ဂဲၤ ပှၤတဝၢအတၢ်ဆီတလဲအဂီၢ်, အိၣ်ဆိးဝဲ ၃၄၃ သီ, ဖဲဝ့ၢ် ခၠံၣ်ကၤကိၣ် ကလံၤထံးတကပၤ, အတၢ်ဘါသရိာ် အခိၣ်ဒုးလိၤန့ၣ်လီၤ. လၢတၢ်စံးဘျုးစံးဖှိၣ်ဆၢက့ၤ အတီၤဖုၣ်ကၠိသရၣ်, ကၠိ စတိး(စ), (Joe Stokes) လၢအသိၣ်လိန့ၢ်အီၤ တၢ်မၤလိလွံၢ်ထံၣ် လၢအသးပ့ၤနီၣ်ဝဲတန့ၢ်န့ၣ်လီၤ. တၢ်သ့ၣ်တဖၣ်အံၤမ့ၢ်ဝဲဒၣ် တၢ်ပာ်သးကျၢၤမုဆှုအတၢ်စိတၢ်ကမီၤ, တၢ်ပာ်သူၣ်ပာ်သးအတီအလိၤ လၢအမ့ၢ်တၢ်အကါဒိၣ်အဂ့ၢ်, တၢ်ပာ်ဖှိၣ်မၤသကိးတၢ်လၢ ပပှၤတဝၢအပူၤ အလုၢ်အပှ့ၤ, ဒီးတၢ်ကူၣ်ဘၣ်ကူၣ်သ့ အတၢ်ကဲဘျုးအဂ့ၢ်တဖၣ်န့ၣ်လီၤ.

ခီဖျိလၢတၢ်ဟံးဃာ်ဂၢၢ်ကျၢၤ စီၤရှလိၤမိၤ အတၢ်ကူၣ်သ့ လၢလံာ်ကတိၤဒိ အဆၢဒိၣ် ၃ အပူၤန့ၣ် ပကျဲးစၢးအိၣ်မူကဲဘျုး ပပှၤတဝၢသ့ဝဲဒၣ်န့ၣ်လီၤ. ပှၤလၢအနာ်သန့ၤ ကစၢ်ယွၤတဖၣ် ဒ်သိးကမ့ၢ်ပှၤလၢအထိၣ်ဟူးထိၣ်ဂဲၤထီၣ် ပှၤဂုၤပှၤဂၤအဂီၢ်, စီၤရှလိၤမိၤ သိၣ်လိနဲၣ်လိဝဲ တၢ်မၤလိ လွံၢ်ထံၣ်, လၢအမ့ၢ် “တၢ်သန့ၤလီၤသးလၢယွၤ” (:၅), “ပျံၤယွၤ, ဒီးဟးထီၣ်ကွံာ်လၢတၢ်အၢ” (:၇), “မၤလၤကပီၤယွၤလၢနစုလီၢ်နခီၣ်ခိၣ်” (:၉), ဒီး “ယွၤသိၣ်ဃီၣ်တၢ်န့ၣ် သုတမၤတရီတဂ့ၤ” :၁၁) န့ၣ်လီၤ. ဒ်သိးပကပညိၣ်ပာ်ဖှိၣ်ပသးလၢ ကစၢ်ယွၤအဂီၢ်, တၢ်သ့ၣ်ညါဒ်သိးအံၤ ဟ့ၣ်သဆၣ်ထီၣ်ပှၤဘၣ်ဆၣ်, ပတၢ်စူၢ်တၢ်နာ်န့ၣ် ထိၣ်ဟူးထိၣ်ဂဲၤထီၣ် ပှၤဂုၤပှၤဂၤအသူၣ်အသးစ့ၢ်ကီးန့ၣ်လီၤ.

မးသဲ ၅:၃-၁၂ အပူၤန့ၣ် ကစၢ်ယ့ၣ်ရှူး လၢအမ့ၢ် တၢ်ကူၣ်သ့အခိၣ်ကျၢၢ်တဂၤ ပာ်ဖျါထီၣ် ပှၤလၢအစူၢ်က့ၤနာ်က့ၤအီၤတဖၣ် အသူၣ်ကံၢ်သးလဲအဂ့ၢ်, အဂ့ၤကတၢၢ်န့ၣ်လီၤ. တကးဒ်ဘၣ်န့ၣ်, ပှၤလၢအစူၢ်က့ၤနာ်က့ၤအီၤတဖၣ်န့ၣ် မ့ၢ်ပှၤလၢအိၣ်မူကဲဘျုး ပှၤဂုၤပှၤဂၤ အဒိၣ်အထီကတၢၢ်အဂ့ၢ်န့ၣ် ကစၢ်ယ့ၣ်ရှူး ဒုးသ့ၣ်နီၣ်ထီၣ်က့ၤ ပှၤဂီၢ်မုၢ်တဖၣ်လၢ “သုဝဲဒၣ်အံၤ သုမ့ၢ်ဟီၣ်ခိၣ်အအံသၣ်,” ဒီး “သုမ့ၢ်ဟီၣ်ခိၣ်အတၢ်ကပီၤ” (:၁၃၊ ၁၄) န့ၣ်လီၤ. ဒ်န့ၣ်အသိး, ပဒိးဘၣ်တၢ်မၤလၤကပီၤ, ခီဖျိလၢ “သု (ပ) ဒုးကပီၤထီၣ် သု (ပ) တၢ်ကပီၤလၢ ပှၤကညီအမဲာ်ညါ, ဒ်သိးအကထံၣ်ဘၣ်သု (ပ) မၤတၢ်ဂ့ၤ, ဒီးကစံးထီၣ်ပတြၢၤ သု (ပ) ပၢ်အိၣ်လၢမူခိၣ်” (:၁၆) အဂီၢ်န့ၣ်လီၤ.