လၢအပူၤကွံာ်အနံၣ် ၃၅၀၀, တိၢ်ဘီအစိၤဆၢကတီၢ် ကတံၤထံကိတဖျၢၣ်, လၢအဘၣ်တၢ်ဒုးနဲၣ်အီၤ ဖဲအံၣ်စရ့လးအကီၢ် တၢ်ပာ်ကွၢ်ကီအလီၢ်န့ၣ် ဖိသၣ်ပိာ်ခွါလၢ အသးအိၣ်ဒံးဒၣ် လွံၢ်နံၣ်ဖိတဂၤ မၤသ့ၣ်ဖးဘၣ်ဝဲဒၣ်န့ၣ်လီၤ. ဖိသၣ်အံၤ ဒိးန့ၢ်ဝဲ တၢ်မၤဆၢအီၤ လၢတၢ်သးကညီၤ, ဒီးလၢတၢ်လီၤကမၢကမၣ်အပူၤန့ၣ်လီၤ. တၢ်ပာ်ကွၢ်ကီလီၢ် အပှၤ
မၤတၢ်ဖိန့ၣ် ပျဲပျၢ်အတၢ်မၤကမၣ်တၢ်, ဒီးကွဲမုာ်အီၤ ဒ်သိးကဟဲကဒီးတဘျီအဂီၢ် န့ၣ်လီၤ. “ဟဲး(ခၠဲး) တၢ်ကွၢ်ကီလီၢ်” (Hecht Museum) အဂီၢ်, “ရိအံၣ် ရှဖံအၤ” (Roee Shafir), စံးကတိၤပာ်ဖျါဝဲလၢ အတၢ်မၤန့ၣ် မ့ၢ်တၢ်မၤအါထီၣ် ဟီၣ်ခိၣ်ဒီဘ့ၣ် အတၢ်သးစဲ လၢတၢ်မၤဂ့ၤထီၣ်က့ၤကျိၤကျဲ, ဒီးကမ့ၢ် တၢ်ဟ့ၣ်ဂံၢ်ဟ့ၣ်ဘါ ဖိသၣ်ပိာ်ခွါဖိအတၢ်သးစဲသ့ၣ်သ့ၣ်လၢ တၢ်စံၣ်စိၤတဲစိၤ, ဒီးတၢ်မၤလိဃုသ့ၣ်ညါ တၢ်ခူၣ်ထုးထီၣ်က့ၤ လၢပျၢၤတၢ်ဖိတၢ်လံၤသ့ၣ်တဖၣ်န့ၣ်လီၤ. ကမ့ၢ်ဝဲဒၣ် တၢ်အစၢတမံၤ, လၢအအိၣ်ဒီး
တၢ်ယါဘျါဂ့ၤထီၣ်က့ၤတၢ်, ဒီးတၢ်ကဲဘျုးလၢအဂ့ၤတကပၤန့ၣ်လီၤ.
တၢ်ဂ့ၢ်ဖိအံၤ ဒုးသ့ၣ်နီၣ်ထီၣ်ယၤ, ဖဲပှၤအံၣ်စရ့လးဖိ ပူထီၣ်အီၤဝံၤအလီၢ်ခံ, ကစၢ်ယွၤ အတၢ်ပာ်ဖျါ လၢအထုးန့ၢ်သူၣ်န့ၢ်သး, ဘၣ်ဃးဒီးအတၢ်ပျၢ်တၢ်ကမၣ်အဂ့ၢ်န့ၣ်လီၤ. ပှၤဂီၢ်မုၢ်တဖၣ် ပူထီၣ်ကစၢ်ယွၤ ခီဖျိလၢဃ့ကညးဝဲ စီၤမိၤရှ့ အဝဲၢ်ခွါ စီၤအၤဟရိၣ်လၢ ကတ့ထီၣ် ကျီၢ်ထူဖိတဒု လၢအဝဲသ့ၣ်အဂီၢ်, ဒ်သိးကဘါဝဲအဂီၢ် (၂ မိၤ ၃၂:၁) န့ၣ်လီၤ. ဖဲ စီၤမိၤရှ့ ဟဲတုၤဘူးထီၣ် “ပှၤသူၣ်ဒဲအလီၢ်ဒီးတၢ်မၤအသးလၢ အထံၣ်ဘၣ်ဂီၤဖံးဖိ, ဒီးပှၤဂဲၤကလံၣ်, ဒီးစီၤမိၤရှ့အသးထီၣ်ကဲၤထီၣ်, ဒီးတ့ၢ်လီၤကွံာ် တၢ်ဘ့ၣ်ဘၣ်လၢအစုပူၤ, ဒီးမၤကၢ်ကွံာ်ဝဲလၢ ကစၢၢ်အခီၣ်ထံး” (:၁၉) န့ၣ်လီၤ.
ဒ်ကစၢ်ယွၤ မၢဝဲအသိး, စီၤမိၤရှ့ “စိးပျၤလၢၢ်ဘ့ၣ်ဘၣ်ခံဘ့ၣ် ဒ်အခီၣ်ထံးအသိးန့ၣ်လီၤ. ဒီးမုၢ်ဆ့ၣ်ထီၣ်န့ၣ် စီၤမိၤရှ့ ဂဲၤဆၢထၢၣ်ဂီၤဂီၤ, ဒီးလဲၤထီၣ်လၢ ကစၢၢ်စံၤနါအလိၤ” (၃၄:၄) န့ၣ်လီၤ. ကစၢ်ယွၤ ဟဲလီၤဝဲ, ဒီးယွၤလဲၤပူၤလၢအမဲာ်ညါ, ဒီးကိးထီၣ်, “ယွၤ, ကစၢ်ယွၤလၢအသးအိၣ်တၢ်, ဒီးသးကညီၤတၢ်, သးထီၣ်ကီ, ဒီးအဘျုးအဖှိၣ်ဒီးအမ့ၢ်အတီ အိၣ်ဝဲအါမးလီၤ. ဟံးဃာ်တၢ်ဘျုးတၢ်ဖှိၣ်လၢ ပှၤကထိတဖၣ်အဂီၢ်, ပျၢ်တၢ်အၢတၢ်သီ, ဒီးတၢ်သရူးကမၣ်, ဒီးတၢ်ဒဲးတူာ်တၢ်ဒဲးဘး” (:၆-၇) န့ၣ်လီၤ.
မ့ၢ်တၢ်လၢအဒုးသ့ၣ်နီၣ်ပှၤ အဒိၣ်အယိာ်ကဆှီဒီဖိန့ၣ်လီၤ. ပအိၣ်ဒီးတၢ်ဒဲးဘးအၢအၢသီသီဒၣ်လဲာ်, ကစၢ်ယွၤ ပျၢ်ပတၢ်ကမၣ်အဖၢမုၢ်န့ၣ်လီၤ. ကစၢ်ယွၤ အသးအိၣ်မၤဂ့ၤထီၣ်က့ၤပှၤန့ၣ်လီၤ.