ယဖိဒိၣ်မုၣ် အသးအိၣ်ဒံးဒၣ် သၢနံၣ်ဖိတဂၤ စးထီၣ်နၢ်ပၢၢ်လံ လၢတၢ်အိၣ်အသးမၤအသးတမံၤလၢ်လၢ်အပူၤန့ၣ် ပနာ်သန့ၤ ကစၢ်ယ့ၣ်ရှူး သ့ဝဲအဂ့ၢ်န့ၣ်လီၤ. ဘၣ်မုၢ်တနၤ, ဖဲကလံၤမုၢ်ဖးဒိၣ်လီၤအကတီၢ်, တချုးလဲၤနုာ်လီၤဝဲဆူ အလီၢ်မံဒံးဘၣ်န့ၣ်, ယဖိဒိၣ်မုၣ်ဖိန့ၣ် ဖှိၣ်ထီၣ်အစုခံခီ, ဘံၣ်လီၤအမဲာ်. ဒီးဃ့ဘါထုကဖၣ်ဝဲဒၣ်, “ကစၢ်ယ့ၣ်ရှူးသးဘိဧၢ, ယသ့ၣ်ညါလၢနအိၣ်ဒီးပှၤဖဲအံၤန့ၣ်လီၤ. ယသ့ၣ်ညါလၢ နအဲၣ်ပှၤန့ၣ်လီၤ. ဒ်သိးကလံၤမုၢ်ကအိၣ်ကတီၢ်အဂီၢ်, ဖဲနဟ့ၣ်လီၤ နကလုၢ်န့ၣ်ဒီး, ယသ့ၣ်ညါလၢ ကလံၤမုၢ် ကအိၣ်ကတီၢ်ဝဲဒၣ်န့ၣ်လီၤ.”
ယဆိကမိၣ်, ဖဲတၢ်တယံာ်ဒံးဘၣ်အကတီၢ်န့ၣ် မ့ၢ်ယဖိဒိၣ်မုၣ်ဖိ နၢ်ဟူဝဲဒၣ် ကစၢ်ယ့ၣ်ရှူးဒီးအပျဲၢ်အဘီၣ်တဖၣ် လဲၤခီဂာ် ပီၣ်လဲၣ်ကၤလံၤလါအဂ့ၢ်ဧါန့ၣ်လီၤ. တၢ်ဂ့ၢ်မၤအသး, ဖဲကစၢ်ယ့ၣ်ရှူး မံဘၣ်အသးလၢကဘီအခံ, တချုးလၢကလံၤမုၢ်တပျုာ်တပျီၤ တဖျၢၣ်ဘူးတ့ၢ်မးလၢကမၤလီၤဘျၢကဘီန့ၣ်လီၤ. အပျဲၢ်အဘီၣ်တဖၣ် ကိးပၢၢ်ထီၣ်အီၤဒီးစံးဝဲဒၣ်လၢ “ပကဟးဂီၤန့ၣ် မ့ၢ်နတပာ်ဘၣ်လၢတၢ်နီတမံၤဘၣ်ဧါ.” ကစၢ်ယ့ၣ်ရှူးတစံးဆၢအဝဲသ့ၣ်ဘၣ်. လၢအလီၢ်န့ၣ်, ဟ့ၣ်လီၤအကလုၢ်ဆူ န့ဆၢၣ်ကလံၤမုၢ်, ဒီးစံးဝဲဒၣ် “အိၣ်ဂၢၢ်တပၢၢ်, အိၣ်ဃိကလာ်တက့ၢ်” (မၢ်ကူး ၄:၃၈-၃၉) န့ၣ်လီၤ.
ထံလၢအစံၣ်ပဲပီနုာ်လီၤဆူ ကဘီပူၤန့ၣ် အိၣ်ပတုာ်ဝဲဒၣ်တကီၢ်ခါန့ၣ်လီၤ. ဒီးကလံၤမုၢ်န့ၣ် အိၣ်ဂၢၢ်တပၢၢ်န့ၣ်လီၤ. လၢတၢ်ဘှ့ၣ်တၢ်ဘှီၣ်အပူၤန့ၣ်, ကစၢ်ယ့ၣ်ရှူး ကွၢ်ဃီၤအပျဲၢ်တဖၣ်, ဒီးစံးဝဲဒၣ် “ဘၣ်မနုၤလၢ သုပျံၤတၢ်ဒ်န့ၣ်လဲၣ်. ဘၣ်မနုၤလၢ သုတၢ်နာ်တအိၣ်ဘၣ်လဲၣ်” (:၄၀) န့ၣ်လီၤ. ယထံၣ်မှံဆိကမိၣ်ထီၣ်ယဲလၢ အဝဲသ့ၣ်အမဲာ်ချံ ကအိးထီၣ်အသးဖးလဲၢ်, ကကွၢ်စူၣ်ဝဲဒၣ် ကစၢ်ယ့ၣ်ရှူး, ဖဲထံလီၤစီၤအဖီးဖိတဖၣ် ကယွၤလီၤလၢအမဲာ်သၣ်တဖၣ်, ဒီးကယွၤလီၤစီၤလၢ အဝဲသ့ၣ်အခၣ်ဆူၣ်တဖၣ်အကတီၢ်န့ၣ်လီၤ.
မုၢ်တနံၤအံၤ, ဒ်ကစၢ်ယ့ၣ်ရှူးအပျဲၢ်တဖၣ် ဘၣ်လဲၤခီဖျိ တၢ်လီၤကမၢကမၣ်အကတီၢ်အသိး, ပမ့ၢ်ဘၣ်အိၣ်မူအိၣ်ဂဲၤဝဲဒၣ်န့ၣ်ဒီး, တၢ်ကမၤအသးဒ်လဲၣ်. ပမ့ၢ်ကွၢ် ပတၢ်ဘၣ်ယိၣ်ဘၣ်ဘီကိးမံၤဒဲး, လၢတၢ်ထံၣ်သီသံၣ်ဘှဲ ခီဖျိလၢကစၢ်ယ့ၣ်ရှူး အတၢ်စိတၢ်ကမီၤ, ဒီးအတၢ်ဒိၣ်စိဒိၣ်ကမီၤန့ၣ်ဒီး, တၢ်ကမၤအသးဒ်လဲၣ်. ပတၢ်နာ်လၢအလီၤဂာ်ဒ်သိးဖိသၣ်တဖၣ်အတၢ်နာ်န့ၣ် ကမၤဟးမၢ်ကွံာ် ပတၢ်ပျံၤတၢ်ဖုးတဖၣ်သ့ၣ်သ့ၣ်န့ၣ်လီၤ. အကတီၢ်ဖဲန့ၣ်, ကလံၤမုၢ်တွၤတဖၣ်လၢ ပဘၣ်ကွၢ်ဆၢၣ်မဲာ်တမံၤလၢ်လၢ်န့ၣ် အိၣ်ဝဲဒၣ်လၢယွၤအတၢ်သးကညီၤအပူၤလီၤန့ၣ် ပကနာ်ဝဲဒၣ်သ့ၣ်သ့ၣ်န့ၣ်လီၤ.
