လါလၢအကဟဲဆူညါတဖၣ်န့ၣ် မ့ၢ်လၢယအိၣ်ဒီးတၢ်ဆၢကတီၢ် အဘျဲၣ်အစဲၢ်တဖၣ်အဃိ, ယရဲၣ်ကျဲၤအီၤလၢ ယကမၤဂ့ၤမၤစၢၤပှၤဂုၤပှၤဂၤတဖၣ် တသ့ဖဲအသ့န့ၣ်လီၤ. ဘၣ်ဆၣ်, ဖဲယမၤစၢၤ တံၤသကိးအသီတဂၤအကတီၢ်, ယလဲၤတၢ်ယခီၣ်ဘၣ်တိၢ်, ယလီၤဃံၤ, ဒီးယစုကၢ်ဝဲဒၣ်လၢ တၢ်လီၢ်သၢတီၤန့ၣ်လီၤ. ယမ့ၢ်ယဲဒၣ် ပှၤတဂၤလၢ အလိၣ်ဘၣ်တၢ်မၤစၢၤသတူၢ်ကလာ်န့ၣ်လီၤ. ကစၢ်ယွၤ အပှၤဂီၢ်မုၢ်တဖၣ် ကွၢ်ထွဲကဟုကယာ်ယၤ, ခီဖျိလၢတၢ်ဟဲအိၣ်သကိး, တၢ်ဟ့ၣ်ဆၢဂ့ၤဆၢဝါလံာ်က့ဖိတဖၣ်, ဖီတဖၣ်, တၢ်ကိးသံကွၢ်ယၤ လၢကွဲၤဒီနၢ်, တၢ်ကွဲးဆှၢလီၤ လီလံာ်ပရၢတဖၣ်, တၢ်ထုကဖၣ်, တၢ်အီၣ်တၢ်အီ (ဃုာ်ဒီးခၠီးကလဲး ဘိၣ်တဘိၣ်ဒၣ်လဲာ်), ဒီးတၢ်ဟဲမၤန့ၢ် တၢ်စုထံးခီၣ်ထံးလၢယဂီၢ်န့ၣ်လီၤ. ယဟံၣ်ဖိဃီဖိ, ယတံၤသကိး, ဒီးယတၢ်အိၣ်ဖှိၣ်ဖိတဖၣ် ဂ့ၤဒိၣ်မးလၢ ယဂီၢ်န့ၣ် ယနာ်လီၤယသးတသ့လၢၤဘၣ်န့ၣ်လီၤ. တၢ်မၤအသးတဖၣ်န့ၣ် ဖျါဝဲဒၣ်ဒ် ကစၢ်ယွၤ စံးဝဲဒၣ်, “ဆ့ၣ်နီၤတက့ၢ်. နလိၣ်ဘၣ် တၢ်မၤစၢၤန့ၣ်လီၤ. တၢ်ကဟုကယာ်တၢ်စံးတၢ်န့ၣ် မ့ၢ်တၢ်ဒ်လဲၣ်န့ၣ်နကထံၣ်ဘၣ်နဲန့ၣ်လီၤ.” မ့ၢ်လၢတၢ်သ့ၣ်တဖၣ်အံၤအဃိ, ယသ့ၣ်ညါအါထီၣ်ယဲလၢ တၢ်မၤဂ့ၤတၢ်လၢသူၣ်လၢသးအဂ့ၢ်, ဒီးတၢ်သးကလၢၢ်ဘၣ် တၢ်စံးဘျုးစံးဖှိၣ် ကစၢ်ယွၤ လၢပှၤဂၤအဂီၢ်န့ၣ်လီၤ.
ယတံၤသကိး ပှၤစူၢ်က့ၤနာ်က့ၤတၢ်ဖိတဖၣ် မၤစၢၤယၤ ဒ်ကျိၤကျဲလၢ စီၤပီလူး သိၣ်လိဝဲဒၣ် ရိမ့ၤ အတၢ်အိၣ်ဖှိၣ်ဖိတဖၣ် ကအိၣ်မူမၤထွဲဝဲ (ရိမ့ၤ ၁၂) အဂီၢ်န့ၣ်လီၤ. စီၤပီလူး ဟ့ၣ်သဆၣ်ထီၣ် အဝဲသ့ၣ်လၢ ကျိၤကျဲအါဘိ,ဃုာ်ဒီးတၢ်အဲၣ်ပှၤဂၤလၢတၢ်သးတီ, တၢ်အဲၣ်လိာ်ကွံလိာ်သးကဒဲကဒဲ, ဒ်ဒီပုၢ်ဝဲၢ်တံၢ်နီၢ်အသိး, လၢတၢ်ယူးယီၣ်န့ၣ်, လဲၤလၢညါလိာ်သုသး, ဒီးဟ့ၣ်နီၤတၢ်လၢ ပှၤလိၣ်ဘၣ်တၢ်မၤစၢၤ (:၉-၁၃) န့ၣ်လီၤ. စီၤပီလူး သိၣ်လိအဝဲသ့ၣ်လၢ တၢ်စူၢ်တၢ်နာ်အတၢ်သိၣ်မိၢ်ပှၢ်လၢ အလံာ်ပရၢအပူၤန့ၣ်လီၤ. အဝဲနီၤဟ့ၣ်စ့ၢ်ကီးဝဲလၢ တၢ်အိၣ်မူလၢခရံာ်ပူၤန့ၣ် တမ့ၢ်ထူဂ့ၢ်ယွၤဂ့ၢ်လၢအမိၢ်လံၤမိၢ်ပှၢ်တအိၣ်န့ၣ်ဘၣ်. မ့ၢ်ဝဲဒၣ်လၢ ပကဘၣ်အိၣ်မူပာ်ဖျါထီၣ်နီၢ်နီၢ် ကိးမုၢ်နံၤဒဲး (အဆၢဒိၣ် ၁၂-၁၆) န့ၣ်လီၤ. ကစၢ်ယွၤ အကျဲအကပိၤန့ၣ် မ့ၢ်တၢ်အဲၣ်တၢ်ကွံန့ၣ်လီၤ. ပဒိးန့ၢ်ကစၢ်ယွၤအတၢ်အဲၣ်ဝံၤ, တၢ်ဟ့ၣ်နီၤလီၤတၢ်အဲၣ်အံၤဆူ ပှၤဂၤအအိၣ်န့ၣ် မ့ၢ်တၢ်ပာ်ဖျါယွၤအတၢ်အဲၣ်လၢပဂီၢ်, ကျိၤကျဲအိၣ်ဝဲဒၣ်အါထံၣ်အကျါတထံၣ်န့ၣ်လီၤ.
ကိးမုၢ်နံၤဒဲး, ဖဲပဃုထံၣ်န့ၢ် ကျိၤကျဲတဖၣ်လၢ တၢ်မၤဂ့ၤမၤစၢၤပှၤဂုၤပှၤဂၤတဖၣ် လၢပတၢ်အိၣ်ဖှိၣ်ပူၤ (မ့) လၢပပှၤတဝၢအပူၤန့ၣ်ဒီး, အဝဲသ့ၣ် ကန့ၢ်ဂံၢ်န့ၢ်ဘါ, ပကဒိးန့ၢ်တၢ်ဆိၣ်ဂ့ၤ, ဒီးကစၢ်ယွၤ ကဘၣ်တၢ်စံးထီၣ်ပတြၢၤအီၤန့ၣ်လီၤ.
