ဒ့ဘ့း အူထဲ(လ) (David Ultal) မ့ၢ် သးအတၢ်သ့ၣ်ညါစဲအ့ၣ် ပှၤကူၣ်သ့ကူၣ်ဘၣ် တဂၤလၢအမၤလိ တၢ်ဃုကျဲလဲၤတၢ်ပီညါအဂ့ၢ်တဂၤဘၣ်ဆၣ်, အဝဲအိၣ်ဒီးတၢ်ဂ့ၢ်ကီ ဘၣ်ဃးဒီး တၢ်လူၤဃုတၢ်လီၢ်တၢ်ကျဲ လၢဟီၣ်ခိၣ်ဂီၤန့ၣ်လီၤ. တၢ်မၤအံၤတမ့ၢ် တၢ်ဂ့ၢ်ကီအသီတမံၤလၢအဂီၢ်ဘၣ်. ဖဲအသးအိၣ်ဝဲဒၣ် တဆံသၢနံၣ်န့ၣ် အကျဲလီၤမၢ်န့ၢ်အီၤ ခံသီဒီးတမုၢ်ထူၣ် လၢအတၢ်လဲၤဟးထီၣ်ကစၢၢ်န့ၣ်လီၤ. အူထဲ(လ) အၢၣ်လီၤဝဲလၢ အဝဲအိၣ်ဒီးတၢ်ပျံၤတၢ်ဖုးအဖၢမုၢ်, လၢသးသမူအတၢ်နဲၣ်ကျဲတဖၣ်အဂီၢ်န့ၣ်လီၤ. ဘၣ်ဆၣ်, ပှၤတနီၤနီၤန့ၣ် အိၣ်ဒီးသးလၢအသ့ၣ်ညါနဲၣ်ကျဲ- အဝဲသ့ၣ်အိၣ်ဖဲလဲၣ်, ဒီးတၢ်လီၢ်လၢအဝဲသ့ၣ်အဲၣ်ဒိးလဲၤန့ၣ် ကဘၣ်လဲၤဝဲဒ်လဲၣ်န့ၣ်သ့ၣ်ညါဝဲဒၣ်လီၤတံၢ်လီၤဆဲးန့ၣ်လီၤ. ဒ် အူထဲ(လ) အသိး, ပှၤဂုၤပှၤဂၤတဖၣ်, တၢ်နဲၣ်ကျဲတဖၣ် ညီညီဖိဒၣ်လဲာ်, ဘၣ်ဂဲၤပျုၢ် ဂဲၤဆှးဃုထံၣ်န့ၣ်ကျဲ, ဒီးအကျဲတဖၣ်လီၤမၢ်ဝဲဒၣ်တလီၢ်လီၢ်န့ၣ်လီၤ.

ပှၤကွဲးထါစံးထီၣ်ပတြၢၤစ့ၢ်ကီး အသးကလၢၢ်ဘၣ် တၢ်လီၤမၢ်လၢ အတၢ်လဲၤဟးဖျိးကျဲအဂ့ၢ်, ဒီးစံးဝဲဒၣ် “ယဟးဖျိးကျဲဒ်သိလၢအဟါမၢ်တဒုအသိးလီၤ. ဃုန့ၢ်နခ့နပှၤတက့ၢ်. အဂ့ၢ်ဒ်အံၤ, ယတသးပ့ၤနီၣ်ဘၣ် နတၢ်မၤလိာ်တဖၣ်ဘၣ်” (စံး ၁၁၉:၁၇၆) န့ၣ်လီၤ. အဝဲပာ်ဖျါထီၣ်အသး ဒ်သိလၢအဟါမၢ်တဒုအသိးန့ၣ်လီၤ. သိသ့ၣ်တဖၣ် မ့ၢ်ဝဲဒၣ် ဆၣ်ဖိကီၢ်ဖိလၢ အလုၢ်ဒိၣ်ပှ့ၤဒိၣ်တဖၣ်အသိး, အမံၤဟူထီၣ်သါလီၤဝဲဒၣ်လၢ အပူထီၣ်တၢ်တကလုာ်, ဒီးဘၣ်တဘျီဘျီန့ၣ် လဲၤဟးဖးဒီးအပှၤကွၢ်သိဆူတၢ်လီၢ်အယံၤအဃိ, အလီၢ်အိၣ်လၢတၢ်ကဃုထံၣ်န့ၢ်က့ၤအီၤန့ၣ်လီၤ. ပှၤကွဲးထါစံးထီၣ်ပတြၢၤ အနီၢ်သးလၢအသ့ၣ်ညါဃုလဲၤတၢ် အတၢ်သ့တၢ်ဘၣ်တဖၣ်န့ၣ် ဟးဂီၤနးထီၣ်အၢထီၣ်, ဒီးအနီၢ်သးလၢအသ့ၣ်ညါဃုနဲၣ်ကျဲန့ၣ် အဂံၢ်အဘါဆံးလီၤစၢ်လီၤဝဲအဃိ, လိၣ်ဘၣ် ဝဲဒၣ် ကစၢ်ယွၤ အတၢ်နဲၣ်ကျဲ, ဒ်သိးဒီးကဘၣ်တၢ်လူၤပိာ်ထွဲဃုန့ၢ်အီၤ, ဒီးဟ့ၣ်လီၤအီၤ “သးလၢအသ့ၣ်ညါပဲာ်ထံနီၤဖးတၢ်” (:၁၆၉) အဂီၢ်န့ၣ်လီၤ.

ဖဲပလဲၤဟးဖျိးကျဲအိၣ်ယံၤဒီးကစၢ်ယွၤအတၢ်ကဟုကယာ်န့ၣ်ဒီး, အတၢ်အဲၣ်လၢပဂီၢ်န့ၣ် အိၣ်ဝဲဒၣ်လၢလၢပှဲၤပှဲၤ, ဒ်သိးကဃုထံၣ်န့ၢ်က့ၤပှၤ, ဒီးကနဲၣ်ဆှၢက့ၤပှၤဆူ
အအိၣ်ဒၣ်ဝဲန့ၣ်လီၤ. ဒ်သိးပကနၢ်ပၢၢ် အကလုၢ်ကထါ, ဒီးလူၤပိာ်ထွဲ “ယွၤအတၢ်မၤလိာ်ခဲလၢာ်” (:၁၇၂) အဂီၢ်, ကစၢ်ယွၤ မၤစၢၤပှၤအဃိ, ပနီၢ်သးအတၢ်လဲၤကျဲအတၢ်လီၤမၢ်န့ၣ် ပတြီဆၢမၤနၢၤအီၤသ့ဝဲဒၣ်” န့ၣ်လီၤ.