တၢ်လဲၤဟးထီၣ် ထံလီၤဆူ ဒါန် (Dunn) လၢကီၢ်ကၠၢၢ်မ့ကၤ (Jamaica) န့ၣ် မ့ၢ်တၢ်လဲၤခီဖျိတမံၤ, လၢအလီၤသူၣ်ပိၢ်သးဝး, သူၣ်ခုသးခုဒိၣ်မးန့ၣ်လီၤ. ထံလီၤဆူဝဲ တဆီဘၣ်တဆီ လၢလၢၢ်လ့ဘျ့တဖၣ်အလိၤ, ဒီးယွၤနုာ်လီၤဝဲဆူ ကရံးဘံၤယၢၣ် (Caribbean) ပီၣ်လဲၣ်ပူၤန့ၣ်လီၤ. မ့ၢ်တၢ်တၤတမံၤလၢ ပှၤလဲၤထီၣ်တၢ်ဖိတဖၣ်အဂီၢ်, ဒ်အဝဲသ့ၣ်ဂဲၤလိာ်လဲၤထီၣ်ဖျိ ထံယွၤလီၤအကျါ, ဒ်သိးကတုၤဃီၤဆူ တၢ်ခိၣ်ထိးအဂီၢ်န့ၣ်လီၤ. ပှၤလိၣ်ဘိဖိကၠ့ၣ်ဒဘလူၣ် (JW), လၢအမဲာ်ချံ အတၢ်ထံၣ်တဂ့ၤ, ဒီးထံၣ်ဝဲထဲ ထးကမိာ်ခံ အပူၤဖိဧိၤ တဂၤအဂီၢ်န့ၣ်, တၢ်မၤအံၤ တမ့ၢ်လၢမၤအသးကသ့ဘၣ်န့ၣ်လီၤ.

ဘၣ်ဆၣ်, ကၠ့ၣ်ဒဘလူၣ် န့ၣ် ပာ်လီၤအသးကျၢၤမုဆှုလၢ ကထီၣ်ဝဲ, ဒီးအတံၤသကိး ကၠိၣ်စဲအၤ (Josiah) န့ၣ် အသူၣ်အိၣ်သးအိၣ် ထီၣ်သကိးဝဲဒီးအီၤန့ၣ်လီၤ. ကၠိၣ်စဲအၤ ကဲထီၣ် ကၠ့ၣ်ဒဘလူၣ် အမဲာ်ချံ, ဒီးတဲဘၣ်အီၤလၢ ကဘၣ်ပဒ့ၣ်ဟးဆှဲး လၢၢ်ဘိၣ်ဘျ့တဖၣ် ဖဲလဲၣ်, ဒီးကဘၣ်ပာ် အစုဒီးအခီၣ်ဖဲလဲၣ်တတီၤလဲၣ်န့ၣ်လီၤ. ဒီး ကၠ့ၣ်ဒဘလူၣ် မ့ၢ်ဝဲဒၣ် ကၠိၣ်စဲအၤ အသး, လၢအဒုးနဲၣ်ဖျါ တၢ်သူၣ်ဒူသးဒူ စံးတၢ်န့ၣ် မ့ၢ်တၢ်ဒ်လဲၣ်န့ၣ်လီၤ.

လၢတၢ်အိၣ်မူအပူၤ အါစုအါဘျီန့ၣ် လီၤဂာ်ဝဲဒီး တၢ်လဲၤဟးထီၣ် တၢ်လီၢ်လၢအလီၤပျံၤလီၤဘၣ်ယိၣ်အဃိ, ပတကြၢးလဲၤတၢ်ထဲတဂၤဧိၤဘၣ်န့ၣ်လီၤ. စီၤပၤ စီၤရှလိၤမိၤ ဒုးနဲၣ်ပှၤတၢ်မ့ၢ်တၢ်တီအံၤ, လၢလံာ်ပှၤစံၣ်တဲၤတဲလီၤတၢ် ၄:၉ အပူၤ, ဒီးစံးဝဲဒၣ် “ပှၤခံဂၤဂ့ၤန့ၢ် ပှၤတဂၤတက့ၢ်လီၤ. အဂ့ၢ်ဒ်အံၤ, အဘူးအလဲဂ့ၤအိၣ်ဝဲလၢ အမၤတၢ်အဂီၢ်” န့ၣ်လီၤ. ကၠိၣ်စဲအၤဒီးကၠ့ၣ်ဒဘလူၣ် ခံဂၤလိာ်န့ၣ် ကျဲးစၢၤမၤတၢ်လီၤဆီတမံၤ, ဒီးအဝဲသ့ၣ် မၤဝဲန့ၢ် ထဲဒၣ်, ဖဲလၢအဝဲသ့ၣ် ပာ်ဖှိၣ်မၤသကိးတၢ်တပူၤဃီအကတီၢ်န့ၣ်လီၤ. စံးကဒီးဝဲဒၣ်ဆူညါ, “တဂၤမ့ၢ်လီၤဃံၤဒီး, ပှၤတဂၤကဝံၣ်ဆၢထၢၣ်အသကိး” (:၁၀) န့ၣ်လီၤ. ဘၣ်ဆၣ်, အဝဲသ့ၣ် တလီၤဃံၤနီတဂၤဘၣ်, ဒီးတဃၣ်ကွံာ်အသးနီတဂၤဘၣ်.
တၢ်လၢအဝဲသ့ၣ်ပညိၣ်တိာ်ပာ်ဝဲန့ၣ် တုၤဃီၤဝဲဒၣ်တပူၤဃီန့ၣ်လီၤ.

ယွၤအတၢ်တိာ်ပာ်လၢ ပှၤကညီအဂီၢ်, တၢ်လၢပကမၤသကိးတၢ်အဂ့ၢ်န့ၣ် စီၤရှလိၤမိၤ ပာ်ဖျါထီၣ်ဝဲဆှဲဆှဲဖိ, ဒီးဘၣ်တၢ်အိၣ်မူဒုးနဲၣ်ဝဲ ဖျိဖျိဖျါဖျါ ခီဖျိလၢပှၤလိၣ်ဘိဖိခံဂၤန့ၣ်လီၤ. တၢ်မၤလၢ ကစၢ်ယွၤ မၢပမၤတဖၣ်န့ၣ် ပမ့ၢ်မၤသကိးတၢ်ဒီးပှၤဂုၤပှၤဂၤတဖၣ်န့ၣ်ဒီး, ကမ့ၢ်တၢ်အဂ့ၤကတၢၢ်န့ၣ်လီၤ. ပှၤတဂၤစုာ်စုာ်န့ၣ် ကဘၣ်စူးကါဝဲ အတၢ်သ့တၢ်ဘၣ်, ဒီးအသးကလၢၢ်ဘၣ်တၢ်တဖၣ် လၢယွၤဟ့ၣ်လီၤအီၤ, ဒ်သိးဒီးကဒုးအိၣ်ထီၣ် တၢ်အစဲလၢ အနဲၣ်ဃီၤဝဲဒၣ်ဆူ ကစၢ်ယွၤအအိၣ်န့ၣ်လီၤ.