လၢလါအီးကထိဘၢၣ် န့ၣ် ကီၢ် ခဲနဒၢ် (Canada) ဒီး ကီး စ့း လူစံၣ်ယၤ (St.Lucia) တဖၣ် ပာ်ပနီၣ်ဝဲ ဒ်တၢ်စံးဘျုးစံးဖှိၣ် အနံၤသဘျ့န့ၣ်လီၤ. ကီၢ် လဲၣ်ဘ့ရံယၢၤ (Libaria) ပာ်လီၤဆီဝဲ လါနိၣ်ဝ့ဘၢၣ် အခီၣ်ထံးတသီ လၢတၢ်စံးဘျုးစံးဖှိၣ်အဂီၢ် မ့မ့ၢ်ကီၢ်အမဲရကၤ, ဒီးကီၢ်အီးစထရ့လယၤ န့ၣ် ပာ်ပနီၣ်ဝဲဒၣ် လါနိၣ်ဝ့ဘၢၣ်အကတၢၢ်အနွံအပူၤန့ၣ်လီၤ. ထံကီၢ်အဂၤတဖၣ်, လၢအပာ်ဃုာ်ဒီး ကီၢ် အဲကလံး, ကီၢ် ဘရၣ်စ့, ကီၢ် ရဝၣ်ဒၣ်, ဒီးကီၢ် ဖံးလံးပံၤ တဖၣ်န့ၣ် ပဒိၣ်တဖၣ်တပာ်ပနီၣ်မုၢ်နံၤလီၤဆီဘၣ်ဆၣ်, မုၢ်နံၤတဖၣ် အိၣ်ဝဲဒၣ် လၢတၢ်ဟ့ၣ်ဂံၢ်ဟ့ၣ်ဘါ တၢ်စံးဘျုးစံးဖှိၣ်အဂီၢ်န့ၣ်လီၤ.
ထံကီၢ်တဘ့ၣ်, အပှၤထံဖိကီၢ်ဖိတဖၣ် ပာ်ဖှိၣ်ထီၣ်အသးကိးဂၤဒဲး, ဒီးပာ်ဖျါထီၣ် တၢ်စံးဘျုးစံးဖှိၣ်န့ၣ် အိၣ်ဒီးအစိအကမီၤန့ၣ်လီၤ. မ့ၢ်လၢ ကစၢ်ယွၤအိၣ်ဒီး အဝဲသ့ၣ်, ဒီတဒၢကဟုကယာ်, ဒီးအတၢ်အၢၣ်လီၤတဖၣ်အဃိ, ပကထံၣ်ဘၣ် စီၤပၤ ဒၤဝံး ကိးဖှိၣ်ရိဖှိၣ် ပှၤအံၣ်စရ့လးဖိတဖၣ် လၢတၢ်စံးဘျုးစံးထီၣ်ပတြၢၤ ကစၢ်ယွၤအဂီၢ်န့ၣ်လီၤ. တၢ်စံးဘျုးစံးဖှိၣ်အမူးသးဖှံ ပာ်ပနီၣ်ဝဲဒၣ် တၢ်ဟဲက့ၤစိာ် “ယွၤအတလါ” (၁ ကွဲး ၁၆:၁) န့ၣ်လီၤ. ပှၤဂီၢ်မုၢ်တဖၣ် သူၣ်ဖှံသးညီဝဲ လၢယွၤအတလါစီဆှံ, တၢ်ပနီၣ် လၢအမ့ၢ်ယွၤအတၢ်အိၣ်ဒီးအဝဲသ့ၣ်, လၢဝ့ၢ်ယရူၤရှလ့ၣ်အပူၤန့ၣ်လီၤ.
ဖဲစီၤဒၤဝံး နဲၣ်ဆှၢပှၤအံၣ်စရ့လးဖိတဖၣ် လၢတၢ်စံးထီၣ်ပတြၢၤယွၤအကတီၢ်န့ၣ်, ဒုးသ့ၣ်နီၣ်ထီၣ် ပှၤဂီၢ်မုၢ်လၢ, ဖဲအဝဲသ့ၣ်မၤန့ၢ်မၤနၢၤကီၢ်ကနၤဧၣ်အကတီၢ်, ကစၢ်ယွၤအတၢ်ဒီတဒၢ (:၁၈-၂၂) အဂ့ၢ်, ဒီးတၢ်စံးဘျုးမၤလၤကပီၤ ကစၢ်ယွၤလၢ အမၤလၢပှဲၤ အတၢ်အၢၣ်လီၤတဖၣ်အဃိ (:၁၅) န့ၣ်လီၤ.
နမ့ၢ်မၤတၢ်စံးဘျုးစံးဖှိၣ်အနံၤသဘျ့ လၢနတံၤသကိး, ဒီးနပှၤဟံၣ်ဖိဃီဖိတဖၣ်န့ၣ်, ကွၢ်ဆိကမိၣ်က့ၤ နံၣ်လၢအပူၤကွံာ်, ဒ်နလဲၤခီဖျိကလၢၢ်ဘၣ် ကစၢ်ယွၤအတၢ်အိၣ်ဒီးနၤ, အတၢ်ဒီတဒၢနၤ, ဒီးအတၢ်အၢၣ်လီၤတဖၣ်, ဒီးဒုးကဲထီၣ်အီၤလၢ တၢ်ပာ်ဖှိၣ် စံးဘျုးစံးဖှိၣ်သကိး, ဒီးလၢတၢ်ကွၢ်ထံဆိကမိၣ်သကိးအပူၤန့ၣ်တက့ၢ်. ဖဲထံကီၢ်လၢ အပာ်ပနီၣ် နံၤလီၤဆီနံၤသဘျ့ လၢတၢ်စံးဘျုးစံးဖှိၣ်အဂီၢ်အပူၤ နမ့ၢ်အိၣ်ဆိးဘၣ်မ့ၢ်ဂ့ၤ, တအိၣ်ဆိးဘၣ် မ့ၢ်ဂ့ၤန့ၣ်, ဒ် (၁ ကွဲး ၁၆:၃၄) ပာ်ဖျါဝဲ “စံးထီၣ်ပတြၢၤယွၤတက့ၢ်, အဂ့ၢ်ဒ်အံၤဂ့ၤဝဲလီၤ. အဂ့ၢ်ဒ်အံၤ, အဘျုးအဖှိၣ် အိၣ်ဝဲလီၤစိလီၤထီလီၤ” အသိး, ပဝဲတဂၤစုာ်စုာ် ပဟံးန့ၢ် တၢ်ဆၢကတီၢ်, ဒီးစံးထီၣ်ပတြၢၤယွၤသ့ဝဲဒၣ်န့ၣ်လီၤ.
