လၢတၢ်ဂီၤမူကၢစိၤ စ့းတံၢ်စၢၣ် က့ (Citizen Kane) အပူၤန့ၣ်, ခၠါ(စ) ဖီးစတၣ် က့(န) (Charles Foster Kane) ဟံးဃာ်ပာ်ဖှိၣ် တၢ်ထူးတၢ်တီၤ, ဒီးတၢ်စိတၢ်ကမီၤ ဒိၣ်ဒိၣ်အါအါ, ခီဖျိလၢအဒုးအိၣ်ထီၣ် တၢ်ပရၢပစၢၢ် ပနံာ်တၢ်ကၤကရၢဖးဒိၣ်န့ၣ်လီၤ. က့(န) မုာ်လၤသးခုဝဲဒၣ် ကယဲၢ်တၢ်လၢအမၤမုာ်မၤမံအသးတဖၣ်, ဒီးဘှီထီၣ်တိာ်ထီတဖျၢၣ်, အိၣ်ဒီးတၤသၣ်လီၢ်လီၤဘီလီၤမုၢ်တဖၣ်လၢ အပှဲၤဒီးဒွဲလၤကူၣ်သ့အတၢ်လုၢ်ဒိၣ်ပှ့ၤဒိၣ်တဖၣ်အဂ့ၢ်န့ၣ် ဒုးသ့ၣ်နီၣ်ထီၣ်က့ၤပှၤ လံာ်ပှၤစံၣ်တဲၤတဲလီၤတၢ် ၂:၄-၁၁ အဂ့ၢ်န့ၣ်လီၤ.
ဒ်ပှၤထူးပှၤတီၤဖးဒိၣ်တဖၣ်အသိး, တၢ်လၢ က့(န) မိၣ်န့ၢ်သးလီဝဲနီၢ်နီၢ်န့ၣ် မ့ၢ်ဝဲဒၣ် တၢ်ယူးဃီၣ်ပးကဲအီၤဒိၣ်ဒိၣ်မုၢ်မုၢ်န့ၣ်လီၤ. အဝဲဟ့ၣ်မၤစၢၤဆီၣ်ထွဲ ကျိာ်စ့တဖၣ်ဆူ အနီၢ် ကစၢ် ထံဂ့ၢ်ကီၢ်ဂ့ၢ် အတၢ်ဖံးတၢ်မၤ, ဒီးဖဲတၢ်မၤမ့ၢ်တကဲထီၣ်လိၣ်ထီၣ်ဘၣ်န့ၣ်ဒီး, ဒ်သိး ကဟးဆှဲး တၢ်လီၤမဲာ်ဆှးအဂီၢ်န့ၣ် ပာ်ဒ့ၣ်ပာ်ကမၣ်ဝဲဒၣ်လၢ တၢ်ဟ့ၣ်တၢ်ဖးတဖၣ် တတီတလိၤအဃိန့ၣ်လီၤ. ဒ်သိးကမျၢၢ်တဖၣ် ကထံၣ်ဂ့ၤအီၤအဂီၢ်, အဝဲတ့ထီၣ်ဘှီထီၣ် အီးပြၢၢ်ဘျီၣ်မုာ်တဖျၢၣ်လၢအမါအဂီၢ်, ဒီးမၢဆူၣ်မၤဆူၣ်အမါလၢ ကကဲထီၣ် ပှၤသးဝံၣ်တၢ်ဖိတဂၤ, တၢ်မၤတမံၤလၢ အတကြၢးတဘၣ်ဒီးအမါအဂီၢ်ဘၣ်န့ၣ်လီၤ. ဖဲအံၤစ့ၢ်ကီး, က့(န) အဂ့ၢ်အကျိၤန့ၣ် ဒုးသ့ၣ်နီၣ်ထီၣ်က့ၤပှၤလၢ လံာ်ပှၤစံၣ်တဲၤတဲလီၤတၢ် ၅:၁၀-၁၅ အဂ့ၢ်, ဖဲတၢ်ထူးတၢ်တီၤ မၤဟးဂီၤ ပှၤလၢအလူၤပိာ်အခံ, ဒီးဟံးဃာ်ပာ်ဖှိၣ်တၢ်ထူးတၢ်တီၤတဖၣ်, “အမုၢ်နံၤခဲလၢာ် အီၣ်တၢ်လၢတၢ်ခံးကျါစ့ၢ်ကီး, ဒီးဘၣ်တၢ်သူၣ်ကိၢ်သးဂီၤနးမး” (၅:၁၇) န့ၣ်လီၤ. လၢအတၢ်အိၣ်မူအကတီၢ် လၢခံအကတၢၢ်န့ၣ်, ခၠၣ်လံၣ် က့(န) အိၣ်ဝဲဒၣ်ထဲ တဂၤဧိၤ, လၢအတိာ်ထီ လၢအတ့ဝဲဒၣ်အပူၤ, ဘၣ်အိၣ်သယုၢ်သညိ, ဒီးလၢတၢ်သူၣ်ဒိၣ်သးထီၣ်အပူၤန့ၣ်လီၤ.
တၢ်ဂီၤမူ စ့းတံၢ်စၢၣ် က့, ကတၢၢ်ဝဲဒၣ်လၢ တၢ်ဒုးနဲၣ်ဖျါထီၣ်က့ၤ ခၠါ(စ) အတၢ်ကျဲးစၢးလူၤပိာ်ထွဲတဖၣ်, ဒ်သိးဒီး ခၠါ(စ) ကမၤလၢပှဲၤ တၢ်လီၤဟိဖိလၢအသးကံၢ်ပူၤ, တဒိးန့ၢ်ဘၣ်ဝဲမိၢ်ပၢ်အတၢ်အဲၣ် လၢအမ့ၢ်ဖိသၣ်လံၤလံၤအဂ့ၢ်န့ၣ်လီၤ. ယဆိကမိၣ် ပှၤကွဲးလံာ်ပှၤစံၣ်တဲၤတဲလီၤတၢ်န့ၣ် ကအၢၣ်လီၤတူၢ်လိာ်တၢ်ဂ့ၢ်အံၤန့ၣ်လီၤ. ပပၢ်ကစၢ်ယွၤန့ၣ် “ပာ်တၢ်အထူ အယိာ်လၢအသးကံၢ်ပူၤ” (၃:၁၁), ဒီးပအိၣ်မူမုာ်လၤသးခုသ့ဝဲဒၣ်ဒီးယွၤ (၂:၂၅) န့ၣ်လီၤ. ခၠၣ်လံၣ် က့(န) အတၢ်ဟ့ၣ်ပလီၢ် တၢ်တဲပူၤဖိအံၤ ကတိၤတၢ်ဒီးပဝဲနၤယၤခဲလၢာ်, ဒ်သိးဒီး ပသုတဃုနီၢ်သးအတၢ်လၢတၢ်ပှဲၤ ခီဖျိတၢ်ထူးတၢ်တီၤ, ဒီးတၢ်အစိတၢ်ကမီၤန့ၣ်တဂ့ၤ, မ့မ့ၢ်ပကဃုထံၣ်န့ၢ် ခီဖျိကစၢ်ယွၤ, လၢအလူၤလီၤဂၢ်လီၤအတၢ်အဲၣ်ဆူ ပသးကံၢ်ပူၤ (ရိမ့ၤ ၅:၅) တဂၤအအိၣ်န့ၣ်လီၤ.
