လၢကီၢ်အမဲရကၤ တၢ်လီၢ်ကိးပူၤဒဲးန့ၣ်, တၢ်ကတဲာ်ကတီၤန့ၢ် ပှၤမၤပှဲၤသိလ့ၣ် အလီဂံၢ်-သန့ (electric vehicle charging stations) တဖၣ်, ဒ်သိးပှၤနီၣ်သိလ့ၣ်တဖၣ် ကမၤပှဲၤဝဲ သိလ့ၣ်-လီအဂံၢ်ချ့ချ့, ဒီးကလဲၤတၢ်ဆူညါအဂီၢ်န့ၣ်လီၤ. ဘၣ်ဆၣ်, ပှၤနီၣ်သိလ့ၣ်တနီၤ စူးကါဝဲ တၢ်ဆၢကတီၢ် ယံာ်အါတလၢကွံာ်ဝဲ လၢတၢ်မၤပှဲၤလီဂံၢ်-အချ့ (fast-charger) အလီၢ်န့ၣ်အဃိ, ဒ်သိးတၢ်ကဘှါဆှဲ တၢ်မၤ, တၢ်ပာ်သူၣ်ပာ်သးလၢ အတကွၢ်ပှၤဂၤအဂီၢ်အံၤန့ၣ်, တၢ်မၤပှဲၤသိလ့ၣ် အလီဂံၢ်-သန့ အခီပနံၣ် အဒိၣ်ကတၢၢ်တဖၣ်အကျါတခါန့ၣ် ပာ်ပနီၣ် တၢ်ဆၢကတီၢ်-နီၣ်ထိၣ်ဃံး, ဖဲအဝဲသ့ၣ်အတၢ်မၤပှဲၤ သိလ့ၣ် အလီဂံၢ်-သန့ တနီၤ, လၢပှၤစူးကါအီၤ အအါကတၢၢ်တဖၣ်န့ၣ်လီၤ. ဖဲသိလ့ၣ်တခိၣ် မၤပှဲၤအလီဆၣ်ဒၢ (battery) မ့ၢ်တုၤဃီၤ ၈၅ % န့ၣ်ဒီး, ပှၤနီၣ်သိလ့ၣ်အံၤ ကဘၣ်ဟ့ၣ်ဝဲ တၢ်လီၢ်ဆူ သိလ့ၣ် လၢခံတခိၣ်, လၢအလိၣ်တၢ်မၤပှဲၤလီဂံၢ်အဂီၢ်န့ၣ်လီၤ.

ပှၤတၢ်မၢဖိ စီၤပီလူး ဟ့ၣ်သဆၣ်ထီၣ် ပှၤစူၢ်နာ် ကစၢ်ယ့ၣ်ရှူး တဖၣ်လၢ ကအိၣ်ဒီးတၢ်ဆီၣ်လီၤသး, ဒီး “ပာ်ပှၤဂၤဂ့ၤန့ၣ် အကစၢ်ဒၣ်ဝဲ” (ဖံလံး ၂:၃) န့ၣ်လီၤ. အဝဲပာ်ဖျါထီၣ်တၢ်ဂ့ၢ်တမံၤလၢ အမၤဆံးလီၤစှၤလီၤ ဖံလံးပံၤ တၢ်အိၣ်ဖှိၣ်ဖိတဖၣ်- အဝဲသ့ၣ်ဆိကမိၣ်ဒၣ်ထဲလၢအကစၢ်ဒၣ်ဝဲအဂီၢ်န့ၣ်လီၤ. အဝဲသ့ၣ်ဆၢဒိးန့ၢ် တၢ်ပာ်လၤပာ်ကပီၤ, ဒီးပှၤအကါဒိၣ်လီၤဆီတဖၣ်န့ၣ်လီၤ. ဒီးတၢ်တဖၣ်အံၤ တမ့ၢ်လၢ တၢ်ပညိၣ်အဂ့ၤအဝါအဃိဘၣ်, မ့မ့ၢ်လၢ “တၢ်သးဆူၣ်မၤန့ၢ်တၢ်လၢ (အ)ဘျုးအဂီၢ်” (:၃, ခ့ခါ) န့ၣ်လီၤ. စီၤပီလူး သဆၣ်ထီၣ် ပှၤစူၢ်က့ၤနာ်က့ၤတၢ်ဖိတဖၣ် ကအိၣ်ဒီးကစၢ်ခရံာ် အသးတၢ်ဆိကမိၣ်လၢ “ကကွၢ်တၢ်လၢပှၤဂၤအဂီၢ်” (:၄ ခ့ခါ) န့ၣ်လီၤ. ကျိၤကျဲလၢအတကြၢးတဘၣ်အပူၤန့ၣ် တမ့ၢ်လၢအဝဲသ့ၣ် ကဘၣ်သးပ့ၤနီၣ် အနီၢ်ကစၢ် အတၢ်လိၣ်တဖၣ်န့ၣ်ဘၣ်. မ့မ့ၢ်, ကဘၣ်သူၣ်အိၣ်သးအိၣ်ပှၤဂၤအတၢ်လိၣ်တဖၣ်, ဒ်ပှၤအိၣ်ဒီး “သးတမံၤလၢ အအိၣ်လၢ ယ့ၣ်ရှူးခရံာ်အပူၤ” (:၅) အသိးန့ၣ်လီၤ. ပှၤတၢ်မၢဖိ ဟ့ၣ်ဂံၢ်ဟ့ၣ်ဘါ ပှၤဖံလံးပံၤဖိတဖၣ်လၢ ကထုးထီၣ်ကွံာ် တၢ်ပာ်ကဖၢလၢအသး, ဒီးကဟ့ၣ်တၢ်လီၢ်လၢပှၤဂၤအဂီၢ် လၢတၢ်ဆီၣ်လီၤသးအပူၤန့ၣ်လီၤ. ဒ်သိးပကဟ့ၣ်တၢ်လီၢ်အဂီၢ်, တၢ်လၢအထိၣ်ဂဲၤထီၣ်ပသး အဂ့ၤကတၢၢ်န့ၣ် မ့ၢ်ဝဲဒၣ်တၢ်အဲၣ်တၢ်ကွံန့ၣ်လီၤ.

ဒ်ပကွၢ်လိမၤဒိး ကစၢ်ခရံာ်အဒိအတဲာ်ကိးနံၤဒဲး (:၆-၁၁) န့ၣ်ဒီး, ဒ်သိးပကဟ့ၣ်တၢ်လီၢ်လၢပှၤဂၤအဂီၢ်, အဝဲမၤစၢၤပှၤကသ့ဝဲဒၣ် ခီဖျိပထံၣ်အဝဲသ့ၣ်တဖၣ် ဒ်ကစၢ်ခရံာ်အတၢ်အဲၣ်ထံၣ်တၢ်အသိးန့ၣ်လီၤ.