ဖဲယစုမုၢ်ဒဲး ဘၣ်ဒိဘၣ်ထံး, ဒီးယဆိကမိၣ် ယစုအတၢ်ဆါန့ၣ် ကယံာ်ဝဲလၢအလါ တဖၣ်, တုၤလၢယစုဟူးဂဲၤတၢ် ကန့ၢ်က့ၤလၢလၢပှဲၤပှဲၤတစုန့ၣ်လီၤ. ဖဲယမၤစုအတၢ်ဟူးတၢ်ဂဲၤတဖၣ် ဒ်ကသံၣ်သရၣ် မၢယၤလၢယကဘၣ်မၤန့ၣ်ဒီး, ယစုမုၢ်ဆၣ်ဖိလၢ အအိၣ်ဘူးဒီးအီၤန့ၣ် စးထီၣ် ဆါဆဲးဖှိးဝဲဒၣ်အဃိ, ယဃ့န့ၢ် တၢ်ဟ့ၣ်ကူၣ်လၢ ယကသံၣ် သရၣ်န့ၣ်ဒီး, စံးဝဲလၢ “တၢ်ဒိသူၣ်ဒိသး အတၢ်ဘၣ်ဒိဆါ” (Sympathy pain) အဃိန့ၣ်လီၤ. စုမုၢ်ဒဲးဒီးစုမုၢ်ဆၣ် အနၢာ်ဘိတဖၣ် ဖးဒ့ထီၣ်အသး အဘၢၣ်စၢၤန့ၣ် ဒုးအိၣ်ထီၣ် တၢ်သန့ၤလိာ်သးကဒဲကဒဲန့ၣ်လီၤ. စုမုၢ်ဖိတဘိ မ့ၢ်ဘၣ်ဒိဆါဝဲဒီး, လၢတၢ်ဒိသူၣ်ဒိသးအပူၤန့ၣ် အဂၤတဘိစ့ၢ်ကီး ဆါထီၣ်ဝဲဒၣ်န့ၣ်လီၤ.

ဒ်သိးဒီး ပှၤတၢ်မၢဖိ စီၤပီလူး ကဒုးနဲၣ်ဖျါထီၣ် ယွၤအပှၤဂီၢ်မုၢ်တဖၣ် အတၢ်မ့ၢ်တၢ် အတၢ်လီၤဆီ, ဒီးအတၢ်မ့ၢ်တၢ်တမံၤဃီ (uniqueness and unity) အဂီၢ်, စူးကါဝဲ ပှၤကညီအနီၢ်ခိက့ၢ်ဂီၢ်န့ၣ်လီၤ. ဖဲ ၁ ကရံၣ် ၁၂:၂၁-၂၆ န့ၣ်, စီၤပီလူး ဟ့ၣ်ဂံၢ်ဟ့ၣ်ဘါ မၤဆူၣ်ထီၣ်ဝဲဒၣ်လၢ ပှၤခဲလၢာ်အတၢ်မၤ ကကဲထီၣ်လိၣ်ထီၣ် ဂ့ၤဂ့ၤဘၣ်ဘၣ်အဂီၢ်, ပှၤတဂၤစုာ်စုာ်န့ၣ် အလုၢ်ဒိၣ်ပှ့ၤဒိၣ်ဝဲဒၣ်ဒ်လဲၣ်အဂ့ၢ်ဝံၤ, စီၤပီလူး ပညိၣ်ပာ်ဖျါထီၣ်ဝဲတၢ်ဒိးန့ၢ် ပတၢ်မ့ၢ်တၢ်တမံၤဃီ, ခီဖျိလၢပမၤဘၣ်ထွဲ ဒုးစဲဘူးလိာ်သးတဂၤဒီးတဂၤ အဂ့ၢ်န့ၣ်လီၤ. အဆၢဖိ ၂၆ စံးဘၣ်ပှၤလၢ “တၢ်အက့ၢ်အဂီၤတမံၤဘၣ် တၢ်နးတၢ်ဖှီၣ်ဒီး, တၢ်အက့ၢ်အဂီၤ ဘၣ်ဃုာ်ခဲလၢာ်စ့ၢ်ကီး” န့ၣ်လီၤ. စီၤပီလူး အတၢ်ပာ်ဖျါ တၢ်အိၣ်ဖှိၣ် အတၢ်ဘၣ်ထွဲ စဲဘူးလိာ်သးကဒဲကဒဲအဂ့ၢ်န့ၣ် ပထံၣ်ဘၣ်က့ၤဝဲလၢ လံာ်စီဆှံအဆၢ “ပှၤလၢအဟီၣ်တဖၣ်န့ၣ်, ဟီၣ်ဃုာ်ဒီးအီၤတက့ၢ်” (ရိမ့ၤ ၁၂:၁၅), ဒီး “ဝံလိာ်သုတၢ်ဝံတၢ်ဃၢသကိးသကိး” (ကလၤ ၆:၂) တက့ၢ်န့ၣ်လီၤ.

တနံၤအံၤ, ဖဲယယူာ်ဃီၤ ယစုလၢ ယကဆၢဂ့ၤဆၢဝါ ဟံးစုကွၢ်မဲာ်ပှၤတဂၤဂၤ (မ့) ဖဲယဟံးဖီၣ်ထီၣ် နီၣ်တၢၤတဘိ, လၢတၢ်ကတဲာ်ကတီၤ တၢ်အီၣ်လၢ ပှၤသမှံၤတဖၣ်အဂီၢ်အဆၢကတီၢ်န့ၣ်, ယပာ်သူၣ်ပာ်သးယဲလၢ ယစုမုၢ်ဒဲးဒီးယစုမုၢ်ဆၣ် ခံဘိလိာ် အတၢ်ဖ့ၣ်ဆၢန့ၣ်လီၤ. ပနီၢ်ခိက့ၢ်ဂီၤ အကလုာ်ကလုာ်တဖၣ်န့ၣ် မၤသကိးတၢ်တပူၤဃီ, လၢတၢ်ပာ်ဖျါထီၣ် ပတၢ်ဘၣ်ဒိဆါ, ဒီးကဟ့ၣ်ဂံၢ်ဟ့ၣ်ဘါလိာ်သကိးသးလၢတၢ်မၤဂ့ၤမၤဘျါက့ၤတၢ်အဂီၢ်န့ၣ်လီၤ. ခီဖျိလၢတၢ်ဒိသူၣ်ဒိသးအတၢ်ဘၣ်ဒိဆါအပူၤန့ၣ် ကစၢ်ယွၤ ဒုးထံၣ်ပှၤလၢ ပလိၣ်ဘၣ် တၢ်ဘၣ်ထွဲ ဒုးစဲဘူးလိာ်သးကဒဲကဒဲ လၢကစၢ်ယွၤအနီၢ်ခိ, လၢအမ့ၢ် တၢ်အိၣ်ဖှိၣ်အဃိ, ယစံးဘျုးဘၣ်ကစၢ်ယွၤန့ၣ်လီၤ.