အဲလဲၣ်(န) (Alan) သိၣ်လိဝဲဒၣ် ပှၤလိၣ်ဘိဖိတဖၣ်လၢ ပှၤစးထီၣ်မၤ တၢ်ပနံာ်တၢ်ကၤ အတၢ်မၤတဖၣ်အဂ့ၢ်န့ၣ်ဒီး, ဖဲတၢ်မၤလိအဆိကတၢၢ်တသီန့ၣ်, ပှၤမၤလိတၢ်ဖိတဂၤ
စံးဘၣ်အီၤလၢ “နမ့ၢ်ပှၤခရံာ်ဖိတဂၤ, တမ့ၢ်ဘၣ်ဧါ. ယတဲလီၤတံၢ်သ့ဝဲဒၣ်” န့ၣ်လီၤ. တချုး အဲလဲၣ်(န) စံးဘၣ်အီၤလၢ အဝဲမ့ၢ်ပှၤခရံာ်ဖိတဂၤ, (မ့) အဲၣ်ကူသိးဝဲဒၣ် ခီၣ်ဖျီၣ်, ဒီးကိာ်စၢလၢ အဘၣ်တၢ်ကယၢကယဲယာ်ဒီး ပှၤခရံာ်ဖိအတၢ်ပနီၣ်တဖၣ်အဂ့ၢ်န့ၣ်, ပှၤလိၣ်ဘိဖိအံၤ စံးဘၣ် အဲလဲၣ်(န)လၢ အဝဲထံၣ် ကစၢ်ယ့ၣ်ရှူး ခီဖျိလၢ အဲလဲၣ်(န) အတၢ်ကတိၤ, အတၢ်ဟူးတၢ်ဂဲၤတဖၣ်, ဒီးအတၢ်ပာ်သူၣ်ပာ်သးအပူၤန့ၣ်လီၤ. အဝဲသ့ၣ်စံးကတိၤသကိး တၢ်ဂ့ၢ်ဘၣ်ဃးဒီး အဝဲသ့ၣ် ကဲထီၣ်အါထီၣ် ပှၤအခၢၣ်စးလၢ ကစၢ်ယ့ၣ်ရှူးအဂီၢ်, ဖဲအလဲၤတၢ်တပူၤလၢ်လၢ် ကသ့ဝဲဒၣ်ဒ်လဲၣ်အဂ့ၢ်န့ၣ်လီၤ.
တၢ်တဲဒုးနဲၣ်ဖျါထီၣ် ပမ့ၢ်ပှၤခရံာ်ဖိ, ဒီးတၢ်ကူသိးထီၣ် ဆ့ကူဆ့ကၤလၢအအိၣ်ဒီးပှၤခရံာ်ဖိအတၢ်ကစီၣ်တဖၣ်န့ၣ် မ့ၢ်တၢ်လၢအဂ့ၤန့ၣ်လီၤ. ဘၣ်ဆၣ်, လံာ်စီဆှံ သိၣ်လိပှၤလၢ ဖဲပနီၤဟ့ၣ်တၢ်သးခုကစီၣ်အကတီၢ်, ပတၢ်အိၣ်မူအိၣ်ဂဲၤ, ဒီးပအဲၣ်တၢ်အကျိၤကျဲတဖၣ်န့ၣ် မ့ၢ်ဝဲဒၣ် ပှၤပိာ်ကစၢ်ယ့ၣ်ရှူးအခံတဖၣ် အတၢ်မ့ၢ်တၢ်နီၢ်နီၢ်န့ၣ်လီၤ. တၢ်မၢဖိ စီၤပီလူး, ဒီးပှၤစူၢ်က့ၤနာ်က့ၤတၢ်ဖိလၢ ဝ့ၢ်ကရံၣ်သူး တဖၣ် အသးအိၣ်မၤတၢ်ဘၣ်ယွၤအသး ခီဖျိတၢ်အိၣ်မူလၢ အကွၢ်စိဃီၤဆူ တၢ်လီၤထူလီၤယိာ်, ဖဲလၢတၢ်ဟ့ၣ်ခီလီၤပှၤဂၤလၢ ယွၤအဂ့ၢ် (၂ ကရံၣ် ၅:၉-၁၄) န့ၣ်လီၤ.
တၢ်အိၣ်မူလၢ ပဂီၢ်ဒၣ်ဝဲအလီၢ်န့ၣ်, ပမ့ၢ်ဟ့ၣ်လီၤပတၢ်အိၣ်မူလၢကစၢ်ခရံာ်အဂီၢ် လၢာ်လၢာ်ဆ့ဆ့န့ၣ်ဒီး, သးမုာ်စီဆှံ ကလဲလိာ်ကွံာ် ပတၢ်ထံၣ်, ပသကဲာ်ပဝး, ပတၢ်ဃုထၢမၤဆိတၢ်လၢပဂီၢ်တဖၣ်, ဒီးပတၢ်ရ့လိာ်သးကျိၤကျဲဒီးပှၤဂၤတဖၣ် (:၁၅-၁၇) န့ၣ်လီၤ. ပတၢ်အိၣ်မူအသီလၢ ကစၢ်ယ့ၣ်ရှူးအပူၤန့ၣ် ပညိၣ်ဝဲဒၣ် ဒ်သိးပကမ့ၢ် ကစၢ်ခရံာ် အခၢၣ်စး, ဖဲပဒုးနဲၣ်ပှၤဂၤလၢအီၤ, “ဒ်ကစၢ်ယွၤအနီၢ်ကစၢ်ဒၣ်ဝဲ သကွံာ်ကညးတၢ်ခီဖျိပှၤ” (:၂၀, ခ့ခါ) န့ၣ်လီၤ.
ခီဖျိလၢသးစီဆှံ အတၢ်ဟ့ၣ်စိဟ့ၣ်ကမီၤပှၤန့ၣ်, ဖဲပလဲၤတၢ်တပူၤလၢ်လၢ်, ကစၢ်ယွၤ ဟ့ၣ်ပှၤ တၢ်သူၣ်ခုသးခု, ဒီးမူဒါတၢ်ဖံးတၢ်မၤလၢ ပကကဲထီၣ် ပှၤအခၢၣ်စးတဖၣ်လၢကစၢ်ခရံာ်အဂီၢ်န့ၣ်လီၤ.
