ဖဲ ကဲး (Kat) သ့ၣ်ညါဝဲဒၣ်လၢ အဟုးအသးအိၣ်ဝဲလံန့ၣ်ဒီး, ဒ်သိးကအံးထွဲကွၢ်ထွဲ အဖိမုၣ်ဖိအဂီၢ်, ဟးထီၣ်ဝဲလၢတီၤထီကၠိန့ၣ်လီၤ. တဆံယဲၢ်နံၣ်လဲၤပူၤကွံာ်ဝံၤ, ကဲး တဂၤ ကဲထီၣ်ဝဲဒၣ် ဖိသၢဂၤအမိၢ် လၢအဖံးတၢ်မၤတၢ်တဂၤ ဒီးအတၢ်မံမီၢ်အိၣ်ဝဲဒၣ် ဒ်သိး ကကဲထီၣ် ပှၤကယၢကယဲ မၤဃံမၤလၤတၢ်တဂၤ, လၢအဖိးမံသဲစး (Licensed beautician) န့ၣ်လီၤ. လၢတၢ်ဆီၣ်လီၤသး, ဒီးလၢတၢ်ပာ်သးစွံကတုၤအပူၤန့ၣ်, အဝဲ ကဲထီၣ်ကဒီး ကၠိဖိတဂၤ, ခီဖျိလၢ GED တၢ်ဆီၣ်ထွဲမၤစၢၤအတၢ်ရဲၣ်တၢ်ကျဲၤလၢ
တလိၣ်ဟ့ၣ် ကျိၣ်စ့ဘၣ်န့ၣ်လီၤ. တၢ်ဆၢကတီၢ်လဲၤပူၤကွံာ်ဖးယံာ်ဝံၤမး, တၢ်ထီၣ်ကဒါက့ၤကၠိန့ၣ် မ့ၢ်တၢ်လၢ အလီၤသူၣ်ဆံးသးဆံးတမံၤန့ၣ်လီၤ. အဝဲစံးဝဲဒၣ်လၢ “တၢ်ရဲၣ်တၢ်ကျဲၤအံၤ ဆီတလဲကွံာ် ယတၢ်အိၣ်မူန့ၣ်လီၤ. ယသရၣ်န့ၣ် လီၤကမၢကမၣ်ဒိၣ်မး, ဒီးဟ့ၣ်ဂံၢ်ဟ့ၣ်ဘါယၤဒိၣ်ဒိၣ်အါအါ” န့ၣ်လီၤ.

တၢ်သးအိၣ် သိၣ်လိန့ၢ်တၢ်အဖၢမုၢ်န့ၣ် တၢ်လၢပမၤသ့တဖၣ်အကျါ, ကမ့ၢ်တၢ်မၤအကီကတၢၢ်တမံၤသ့ၣ်သ့ၣ်န့ၣ်လီၤ. လံာ်စီဆှံ စံးကတိၤဝဲ တၢ်အိၣ်ဒီးသးလၢ အမၤလိန့ၢ်တၢ်န့ၣ်, မ့ၢ်ဝဲဒၣ်တၢ်အိးထီၣ်ပသးဆူ ယွၤအတၢ်ကူၣ်သ့န့ၣ်လီၤ. လံာ်ကတိၤဒိ တ့ခဲၣ် ပာ်ဖျါ ပိာ်မုၣ်လၢ အကူၣ်တၢ်သ့, ဒီးပိာ်မုၣ်လၢအဟးဂီၤ ခံဂၤ, လၢအကိးသတြီထီၣ်ဆူ ပှၤလဲၤတၢ်က့ၤတၢ်တဖၣ် (၉:၁-၆, ၁၃-၁၈) အဂ့ၢ်န့ၣ်လီၤ. ပှၤဒိကနၣ် တၢ်ကူၣ်သ့န့ၣ် ကဒိးန့ၢ်ဝဲ တၢ်ဘှီဘၣ်က့ၤအီၤ, လၢတၢ်ဘျုးတၢ်ဖှိၣ်အပူၤန့ၣ်လီၤ. အဝဲသ့ၣ် “ကဒိးန့ၢ်အါထီၣ်တၢ်ကူၣ်သ့,” ဒီးကကူၣ်တၢ်သ့ဒိၣ်ထီၣ်ဝဲဒၣ် (:၉) န့ၣ်လီၤ. အဝဲသ့ၣ် ညီနုၢ် “လဲၤပိာ်စၢၢ်ဆၢ တၢ်ကူၣ်တၢ်ဆးအကျဲ,” ဒ်သိးဒီးကမၤလိန့ၢ်တၢ်ကူၣ်သ့အဂီၢ်, ဆ့ၣ်နီၤဝဲလၢ
တၢ်ကူၣ်သ့အစီၢ်နီၤခိၣ် (:၆) န့ၣ်လီၤ. အဝဲသ့ၣ် ဒိကနၣ်တၢ်န့ၣ် နဲၣ်ဆှၢအဝဲသ့ၣ်ဆူ “သးသမူအနံၣ် ကအါထီၣ်” အဂီၢ် (:၁၁) န့ၣ်လီၤ. မ့မ့ၢ်လၢအဂၤတကပၤန့ၣ်, ပှၤလၢအဒိကနၣ် ပှၤဟးဂီၤဖိန့ၣ် သးဟ့တၢ်သိၣ်ဃီၣ် (မ့) တၢ်စံၣ်ညီၣ်ပဲာ်ဖးအဝဲသ့ၣ်န့ၣ်လီၤ. ပှၤလၢအဂုၢ်ကျဲးစၢးသိၣ်ဃီၣ်အဝဲသ့ၣ်တဖၣ်န့ၣ် မၤတရီတပါဝဲဒၣ် (:၇-၈) န့ၣ်လီၤ.တၢ်ဆီၣ်လီၤသးန့ၣ် အိၣ်ဟဲဝဲလၢ တၢ်ပျံၤယွၤ, တၢ်သ့ၣ်ညါ ယွၤလၢအမ့ၢ် “တၢ်စီဆှံတဂၤ,” ဒီးပတမ့ၢ်ပှၤစီဆှံဘၣ် (:၁၀) န့ၣ်လီၤ. ပကမ့ၢ် ပှၤဒိးသိၣ်လိန့ၢ်တၢ်တဂၤအဂီၢ်န့ၣ် တမ့ၢ်တၢ်အဘီၣ်အညီဘၣ်ဆၣ်, တၢ်ဒိးသိၣ်လိန့ၢ်တၢ်န့ၣ် ဟဲစိာ်စ့ၢ်ကီး တၢ်သဘျ့, ဒ်သိးပကအၢၣ်လီၤပသးလၢ ပတသ့ၣ်ညါတၢ်ခဲလၢာ်ဘၣ်, ဒီးပလိၣ်ဘၣ်ဒံးတၢ်မၤစၢၤအဖၢမုၢ်န့ၣ်လီၤ. တၢ်ကူၣ်သ့ ကိးထီၣ်ပှၤ, ဒီးပကစံးဆၢမၤဆၢအီၤဒ်လဲၣ်.