ဖဲယနီၣ်လီၤသိလ့ၣ်ဆူ ပှၤပာ်သိလ့ၣ်အလီၢ်န့ၣ်ဒီး, ယသးပူၤပှဲၤလုၣ်ကွံာ်ဝဲဒီးတၢ်သူၣ်ကိၢ်သးဂီၤန့ၣ်လီၤ. အပူၤကွံာ်န့ၣ်, တၢ်လီၢ်တတီၤအံၤ ယဟဲတုၤယဲတဘျီ, ဒီးယကျဲလီၤမၢ်
ဝဲဒၣ်န့ၣ်လီၤ. ဘၣ်ဆၣ်, ခဲကနံၣ်အံၤ, ဖဲယစးထီၣ်လဲၤယဲဆူ ကဟၣ်စိာ်ထီၣ်စိာ်လီၤတၢ်အကပၤ တြဲၤတဘ့ၣ်န့ၣ်ဒီး, ယသးကလၢၢ်ဘၣ် တၢ်သးမုာ်သးခုၣ် လုာ်ဘၢကွံာ်ယသး
န့ၣ်လီၤ. ယသ့ၣ်ညါ တၢ်လဲၤကျဲလံန့ၣ်လီၤ. ယလဲၤနုာ်လီၤဆူ တြဲၤအိၣ်အလီၢ်, ဒီးယထံၣ် ကဟၣ်စိာ်ထီၣ်စိာ်လီၤတၢ်တဖၣ်, ဒီးယဒိးထီၣ်ဝံၤ, တယံာ်ဘၣ်န့ၣ် ယလဲၤတုၤတၢ်လီၢ်လၢ ယကဘၣ်လဲၤအလီၢ်န့ၣ်လီၤ.

လၢတၢ်ပာ်သိလ့ၣ်အလီၢ်ကျဲတဖၣ် လၢအိၣ်သဘံၣ်ဘုၣ်အသးတဖၣ်အကျါတၢ်ဃုထံၣ်န့ၢ်ကျဲအဘၣ် အတၢ်လဲၤခီဖျိန့ၣ်, ဒုးသ့ၣ်နီၣ်ထီၣ်ယၤလၢ ဘၣ်တဘျီဘျီ, တၢ်လီၤမၢ်ကျဲန့ၣ် မၤစၢၤပှၤသ့ဝဲဒၣ်လၢ တၢ်ဃုထံၣ်န့ၢ်က့ၤ ပတၢ်လဲၤကျဲလၢအဘၣ်န့ၣ်လီၤ. ဖဲယလဲၤအဆိကတၢၢ်တဘျီန့ၣ် မ့ၢ်လၢယကျဲလီၤမၢ်တ့ၢ်လံတဘျီအဃိ, တၢ်လၢယမၢကမၣ်အီၤ တဖၣ်န့ၣ် ယဆိကမိၣ်ထီၣ်က့ၤ, ဒီးသ့ၣ်နီၣ်ထီၣ်က့ၤ တြဲၤလၢအကဆှၢယၤဆူ ယတၢ်လဲၤကျဲအကတၢၢ်န့ၣ်လီၤ.

တၢ်ဃုထံၣ်န့ၢ် ပတၢ်လဲၤကျဲန့ၣ် မ့ၢ်တၢ်သးခုဖးဒိၣ်တမံၤ, ဒီးတၢ်ဂ့ၢ်အံၤ မ့ၢ်ဝဲတီဝဲန့ၣ်, ပကထံၣ်ဘၣ်လၢ တနံၤအံၤ, တၢ်ကတိၤပူဟ့ၣ်ဒိ “ဖိလၢအလီၤမၢ်” အဂ့ၢ် ဖျါဝဲလၢ လူၤ ၁၅:၂၄ အပူၤန့ၣ်လီၤ. သးစၢ်လၢ အကျဲကမၣ်, ဒီးလီၤထွံလီၤယွၤ ဝဲလၢ ဟီၣ်ခိၣ်တဂၤအံၤ “သ့ၣ်နီၣ်လီၤက့ၤအသး” (:၁၇), ဒီးသ့ၣ်ညါက့ၤ အတၢ်က့ၤကျဲဆူအဟံၣ်န့ၣ်လီၤ. တၢ်အိၣ်လီၤတဲာ်တ့ၢ်ဝဲလၢ အလီၢ်ခံတဖၣ်န့ၣ် သးစၢ် တဂၤအံၤ သ့ၣ်နီၣ်ထီၣ်က့ၤဝဲ, ဒီးက့ၤက့ၤဝဲဆူအဟံၣ်, တၢ်လီၢ်လၢ အဒိးန့ၢ်ဝဲ အပၢ် အတၢ်အဲၣ်, “အတၢ်သးအိၣ်” (:၂၀) န့ၣ်လီၤ. ပူတယုၢ်အံၤ ပာ်ဖျါထီၣ် ပၢ်တဂၤ လၢအသးပူၤန့ၣ် ပှဲၤလုၢ်ကွံာ်ဝဲဒီးတၢ်သးခု ခီဖျိလၢအဒိးန့ၢ်က့ၤ ဖိလၢအလီၤမၢ်တဂၤ, ဒီးတူၢ်လိာ်မုာ် အဖိခွါအတၢ်ဟဲက့ၤဆူဟံၣ်, ဒီးစံးဝဲဒၣ်လၢ “ယဖိခွါလၢအသံတ့ၢ်တဂၤအံၤ, မူထီၣ်က့ၤလံ, ဒီးဟါမၢ်တ့ၢ်, ဒီးဘၣ်တၢ်ထံၣ်န့ၢ်က့ၤအီၤလံ” (:၂၄) န့ၣ်လီၤ.

လၢပသူၣ်ဂ့ၢ်သးကျိၤအတၢ်လဲၤကျဲန့ၣ်, ပမ့ၢ်ဟးကမၣ်ကျဲန့ၣ်ဒီး, မ်ပကဃုထံၣ်န့ၢ် တၢ်က့ၤဆူဟံၣ်အကျဲ, ကျဲလၢပသ့ၣ်ညါအီၤ, လၢအဘၣ်တၢ်ကတဲာ်ကတီၤန့ၢ်ပှၤ, ခီဖျိလၢ ကစၢ်ယွၤန့ၣ်တက့ၢ်. ကစၢ်ယွၤ နဲၣ်ဆှၢပှၤဆူ အတၢ်အဲၣ် အတၢ်ကပီၤ, တၢ်လီၢ်လၢ ပကြၢးအိၣ်ဆိးဝဲဒၣ်န့ၣ်လီၤ.