ယဖိမုၣ်တဂၤ, လၢအနီၣ်ဆံးအကတီၢ် အတၢ်လဲၤခီဖျိတဖၣ်အကျါ, သ့ၣ်နီၣ်ထီၣ်က့ၤဝဲဖျိဖျိဖျါဖျါန့ၣ် မ့ၢ်မုၢ်နံၤလၢ အပၢ်စးထီၣ်သိၣ်လိအီၤ တၢ်ဒိးလ့ၣ်ယီၢ်ခီၣ်, လၢအတအိၣ်ဒီးတၢ်ဒိးလိပၣ်တဖၣ် (trainig wheels) အဂ့ၢ်န့ၣ်လီၤ. ဘၣ်တဘျီ, ဖဲလၢတၢ်သိၣ်လိ လ့ၣ်ယီၢ်ခီၣ်လၢ တၢ်ချၢအကတီၢ်, ယဝၤပာ်လီၤဝဲအခီၣ်ခံခီ လၢလ့ၣ်ယီၢ်ခီၣ်အလီၢ်ခံ အပၣ်ခံကပၤ, မ့မ့ၢ်ယဖိမုၣ်ဖိန့ၣ်, ယီၢ်ဝဲအလ့ၣ်ယီၢ်ခီၣ်, ဒီးအဒီဖိပၢ်ခံဂၤလိာ် ဖီၣ်ဃာ်ဝဲ လ့ၣ်ယီၢ်ခီၣ် အစုဖီၣ်, ဒ်သိးကယီၢ်စံၣ်လီၤသကိး လ့ၣ်ယီၢ်ခီၣ် ကယီကယီဆူ ကျဲလီၤဘံဖိန့ၣ်လီၤ. အဝဲသ့ၣ်နီၣ်ထီၣ် တၢ်အကတီၢ်ဖိန့ၣ်, လၢတၢ်သးခုအပူၤ အပၢ်နံၤသီၣ်အဂ့ၢ်, မ့မ့ၢ်ယဖိမုၣ်တဂၤန့ၣ် ပျံၤတၢ်ဒိၣ်မးန့ၣ်လီၤ. မ့ၢ်လၢတၢ်ဒိးလ့ၣ်ယီၢ်ခီၣ်အကတီၢ်ဖိန့ၣ် မ့ၢ်တၢ်တစိၤဖိ, ဒီးတၢ်မၤအသးချ့သဒံးအဃိ, ပၢ်တဂၤ ကဆိကတီၢ်ပာ်ဖျါထီၣ် အတၢ်ဒိသူၣ်ဒိသး, သ့ၣ်ညါလၢအဖိမုၣ် အတၢ်ပျံၤတၢ်ဖုးအဂီၢ်, တချုးလၢၤဘၣ်န့ၣ်လီၤ. မုၢ်တနံၤအံၤ, အဝဲသ့ၣ် စံးကတိၤလိာ်သးလၢ အပူၤကွံာ်တၢ်လဲၤခီဖျိန့ၣ်ဒီး, လၢတၢ်မၤလီၤတံၢ်က့ၤ အဖိမုၣ်အသးအဂီၢ်, လၢတၢ်ကတိၤကပုာ်လုာ်ဖိန့ၣ် ယဝၤစံးဘၣ်အီၤ, မ့ၢ်လၢအဝဲသ့ၣ်ညါ တၢ်ကိးမံၤဒဲးန့ၣ် ကဘၣ်လိာ်ဘၣ်စးအဃိန့ၣ်လီၤ.

လၢပသးသမူအပူၤ, ဖဲပဘၣ်လဲၤခီဖျိကွၢ်ဆၢၣ်မဲာ် ပတၢ်ပျံၤတၢ်ဖုးအကတီၢ်ဖိအဂီၢ်, အဒီဖိပၢ်ခံဂၤအဂ့ၢ်န့ၣ် မ့ၢ်တၢ်အဒိအကြၢးအဘၣ်န့ၣ်လီၤ. ပမ့ၢ်အိၣ်ကွၢ်စိလီၤလၢ “တၢ်လူၢ်ခိၣ်တဖၣ်” အလိၤန့ၣ် တၢ်လၢပထံၣ်တဖၣ် ကဖျါဒိၣ်ဖျါသွါ, ဒီးကလီၤပျံၤလီၤဖုး, ဒီးတၢ်ကဘၣ်ဒိဘၣ်ထံး အလီၢ်အိၣ်ထီၣ်နီၢ်နီၢ်သ့ဝဲဒၣ်န့ၣ်လီၤ. ဘၣ်ဆၣ်, စံး ၁၁၈:၆ န့ၣ် ယွၤ အကလုၢ်ကထါ မၤဂၢၢ်မၤကျၢၤပှၤ, မ့ၢ်လၢ “ယွၤအိၣ်လၢယအိၣ်တခီလီၤ” အဃိ, ပကဘၣ် “ပျံၤဘၣ်ယိၣ်တၢ်” အလီၤတအိၣ်ဘၣ်န့ၣ်လီၤ.ပှၤဟီၣ်ခိၣ်ဖိ အတၢ်မၤစၢၤပှၤန့ၣ် မ့ၢ်လီၤတူၢ်လီၤကာ်ဝဲဘၣ်ဆၣ်, ခီဖျိလၢပတၢ်ဂုာ်ကျဲးစၢး ဟူးဂဲၤတၢ်တဖၣ် ဒိၣ်စိလုၢ်ဘၢပှၤအကတီၢ်, ကစၢ်ယွၤ မ့ၢ် ပတၢ်ပူၤဖျဲးအလီၢ် လၢပနာ်န့ၢ်အီၤသ့တဂၤ (:၈-၉) န့ၣ်လီၤ.

ယွၤမ့ၢ်ပှၤလၢ “အမၤစၢၤတၢ်” (:၇) တဂၤ, ဒီးအခီပညီ မ့ၢ်ဝဲဒၣ်, ဖဲပဘၣ်ဂုာ်ကျဲးစၢးဂဲၤလိာ်တၢ်ဆူၣ်ဆူၣ်, ဒီးတၢ်ပျံၤတၢ်ဘၣ်ယိၣ် အကတီၢ်တဖၣ်န့ၣ် ဒ်သိးကကဟုကယာ်ပှၤအဂီၢ် ပနာ်န့ၢ် ကစၢ်ယွၤ သ့ဝဲဒၣ် လၢပတၢ်အိၣ်မူအပူၤန့ၣ်လီၤ. ပမ့ၢ်ဘၣ်ကွၢ်ဆၢၣ်မဲာ် ကယဲၢ်တၢ်လၢကမၤလီၤဃံၤပှၤတဖၣ်, တၢ်ဘၣ်ဒိဘၣ်ထံးဆါအပူၤလီၢ်ပူၤကျဲၤတဖၣ်, ဒီးတၢ်တူၢ်ဘၣ်တၢ်နးတၢ်ဖှီၣ်တဖၣ်ဘၣ်ဆၣ်, ကစၢ်ယွၤ အတၢ်အိၣ်ဒီးပှၤန့ၣ် မ့ၢ်ဝဲဒၣ် “ပဂံၢ်ပဘါ” ဒီး “ပတၢ်ပူၤဖျဲးအလီၢ်” (:၁၄) န့ၣ်လီၤ.