လၢဝ့ၢ်မနံၣ်လၣ်, ဒဲ(န) တံၢ် (Dante) အိၣ်ဆိးတၢ်အလီၢ်ဟီၣ်ကဝီၤတဖၣ်န့ၣ် ညီနုၢ်ထံဒိၣ်ထံလုၣ်ဘၢဝဲဒၣ်န့ၣ်လီၤ. ဖဲတၢ်ဟဲစူၤလီၤအမုၢ်နံၤတဖၣ်န့ၣ်, ဖိသၣ်ဆံးဖိတဖၣ်, လဲၤဆူကၠိန့ၣ် ဘၣ်လဲၤခီဂာ် တိၤတစိၢ်တလီၢ်တဘိ, လၢအဘၣ်တၢ်တ့အီၤ ခီဖျိပှၤအိၣ်ဆိးလၢအခိၣ်အဃၢၤတဂၤန့ၣ်လီၤ. ဒဲ(န) တံၢ် ပာ်ဖျါထီၣ်ဝဲလၢ “မ့း(စ)ထၢၣ် ထီမၢး(စ) (Mr. Tomas) မၤစၢၤဝဲ ပှၤတဝၢဖိတဖၣ်လီၤ. အဝဲနဲၣ်ဆှၢယတၢ်လဲၤ လၢတိၤအလိၤ, ဒီးဒီဒၣ် ဒီတဒၢန့ၢ်ယၤလၢမူခိၣ်ထံ” န့ၣ်လီၤ.

နံၣ်တဖၣ်လဲၤပူၤကွံာ်ဝံၤ, ဒဲ(န) တံၢ် ပာ်ဖှိၣ်မၤသကိးတၢ်ဒီးတၢ်အိၣ်ဖှိၣ်တဖု, အိၣ်လၢ ဝ့ၢ် မနံၣ်လၣ်န့ၣ်လီၤ. ခိၣ်နၢ်လၢ အသိၣ်လိအီၤလံာ်စီဆှံန့ၣ် လံၣ်ယိၣ် (Leo), မ့ၢ်ပှၤလၢကွၢ်ထွဲနဲၣ်ယုၤအီၤ လၢအသူၣ်ဂ့ၢ်သးကျိၤအဂီၢ်န့ၣ်လီၤ. ဖဲလၢတၢ်စံးကတိၤလိာ်သကိး အဝဲသ့ၣ်အနီၢ်ဆံးဖိသၣ်အကတီၢ်အဂ့ၢ်န့ၣ်ဒီး, ဒဲ(န) တံၢ် သ့ၣ်ညါထွဲဝဲလၢ, လံၣ်ယိၣ် တဂၤ မ့ၢ်ဝဲ သးပှၢ် ထီမၢး(စ) အဖိခွါန့ၣ်လီၤ. ဒဲ(န) တံၢ် တဲဖျါထီၣ်ဝဲလၢ, “တၢ်ဘၣ်ဆၢၣ်ဘၣ်တီၤ ဒ်သိးအံၤန့ၣ် တမ့ၢ်ကအိၣ်ဝဲဒၣ်ဘၣ်. ကစၢ်ယွၤ စူးကါဝဲ ပၢ်, လၢအကဲထီၣ်တၢ်ဆိၣ်ဂ့ၤ လၢယဂီၢ်တဂၤအံၤ အဖိခွါ, ဒ်သိးကမၤစၢၤယၤလၢ ယတၢ်စူၢ်တၢ်နာ်အဂီၢ်န့ၣ်လီၤ”.

ပိာ်မုၣ်တဂၤ, လၢဝ့ၢ်ရှူန့ၣ် စ့ၢ်ကီး လဲၤခီဖျိကလၢၢ်ဘၣ် ကစၢ်ယွၤ အတၢ်ကတဲာ် ကတီၤန့ၢ်တၢ်လၢအဂီၢ်န့ၣ်လီၤ. ၂ စီၤ ၈:၁-၂ ပာ်ဖျါဝဲလၢ ပိာ်မုၣ်အံၤ ဒိကနၣ် ဝံအလံၤရှါ အတၢ်ဟ့ၣ်ကူၣ်လၢတၢ်နာ်, ဒ်သိးဒီးကပဒ့ၣ်ဟးဆှဲးဝဲလၢ တၢ်သၣ်ဝံၤလီၤဒိအဂီၢ်, ပာ်တ့ၢ်အဟံၣ်ဃီ, ဒီးဟးထီၣ်ဝဲဒၣ်န့ၣ်လီၤ. မ့ၢ်လၢအမၤဝဲဒ်သိးအံၤအဃိ, အဟံၣ်ဃီ, ဒီးတၢ်လီၢ်တၢ်ကျဲတဖၣ် လီၤမၢ်ကွံာ်ဝဲဒၣ်န့ၣ်လီၤ. ဒီးတုၤအကတီၢ်ဘၣ်ဒီးဟဲက့ၤဝဲဒၣ်န့ၣ် ဘၣ်ဃးဒီးအတၢ်ဂ့ၢ်အံၤ ဘၣ်ပတံထီၣ် တၢ်မၤစၢၤလၢ စီၤပၤန့ၣ်လီၤ. ဖဲန့ၣ်, ဘၣ်ဃးဒီးပိာ်မုၣ်အံၤအတၢ်ဂ့ၢ်တၢ်ကျိၤန့ၣ် စီၤပၤ စံးကတိၤလိာ်သးဒီးဝံအလံၤရှါ အပျဲၢ် စီၤက့ၤဃစံန့ၣ်လီၤ.

နံၣ်လၢအပူၤကွံာ်တဖၣ်န့ၣ်, စီၤက့ၤဃစံ ထံၣ်ဘၣ်တ့ၢ်ဝဲ တၢ်မၤမူထီၣ်က့ၤ ပိာ်မုၣ်အံၤ အဖိခွါန့ၣ်လီၤ. ခဲကနံၣ်အံၤ, စီၤက့ၤဃစံ စံးဘၣ်စီၤပၤလၢ “ပိာ်မုၣ်လၢ ဝံအလံၤရှါ ဒုးမူထီၣ်က့ၤ အဖိခွါ” (:၅) န့ၣ်လီၤ. ဝံၤန့ၣ်ဒီး, စီၤပၤ “ပာ်လီၤပှၤဒ့ဒံၣ်ဖိတဂၤလၢအဂီၢ်,” ဒီးစံးဝဲဒၣ်လၢ “ဟ့ၣ်က့ၤအီၤလၢ ကယဲၢ်အတၢ်, ဒီးအဟီၣ်ခိၣ်အတၤသၣ်ခဲလၢာ်” (:၆) န့ၣ်လီၤ.

ဒ်ပရဲၣ်ကျဲၤတ့ၢ်ဝဲအသိး, တၢ်မ့ၢ်တကဲထီၣ်လိၣ်ထီၣ်အကတီၢ်ဒၣ်လဲာ်, ပနာ်သန့ၤ ကစၢ်ယွၤ, ဒီးယွၤအတၢ်ကဟုကယာ် သ့ဝဲဒၣ်န့ၣ်လီၤ.