ရ့းခၠၢး ကရ့းဖ့ (Richard Griffin) မ့ၢ် ပၢၤကီၢ်တဂၤ, လၢအဘၣ်မၤဝဲဒၣ်ထဲ နီၢ်ပၤမုၢ် အဲလံးစဘဲး ၂ ဂၤတဂၤ (Queen Elizabeth II) အဂီၢ်, လၢတၢ်ဆၢကတီၢ် တဆံလွံၢ်နံၣ် အတီၢ်ပူၤန့ၣ်လီၤ. ဘၣ်ဖဲမုၢ်တနံၤန့ၣ်, ဘၣ်လဲၤပိာ် နီၢ်ပၤမုၣ်အခံ လၢတၢ်လဲၤဟးအီၣ်မုာ်လၤသးဖှံအသးလၢ ဘဲလ်မိရၣ် တိာ် (Balmoral Castle) ဖးဒိၣ် အကပၤ တၢ်လူၢ်ခိၣ်အကတီၢ်, အဝဲသ့ၣ်ထံၣ်လိာ်အသးဒီးပှၤအမဲရကၤဖိ လၢအလဲၤဟးကသူၣ်အသးလၢခီၣ်ခံဂၤန့ၣ်လီၤ.  နီၢ်ပၤမုၣ်န့ၣ် ကူသိးဃာ်ဝဲ ဒ်ပှၤပတီၢ်မုၢ်တဂၤအသိး, ဒီးအဝဲသ့ၣ်တသ့ၣ်ညါတိၢ်နီၣ် နီၢ်ပၤမုၣ်အဃိ, သံကွၢ်ဝဲ နီၢ်ပၤမုၣ်လၢ “မ့ၢ်နထံၣ်လိာ်သးဒီးနီၢ်ပၤမုၣ် တဘျီဘျီဧါ” န့ၣ်လီၤ. ဖဲန့ၣ်, လၢတၢ်နံၤကမှံအပူၤန့ၣ် နီၢ်ပၤမုၣ် စံးဆၢက့ၤ အဝဲသ့ၣ်လၢ “ယတထံၣ်ဘၣ်. ဘၣ်ဆၣ်, ရ့းခၠၢး လၢအအိၣ်ဖဲအံၤတဂၤန့ၣ် ထံၣ်လိာ်အသးဒီးနီၢ်ပၤမုၣ်တလီၢ်လီၢ်” န့ၣ်လီၤ. မ့ၢ်လၢအထံၣ်ဘၣ် ပှၤလၢအအိၣ်ဘူးဒီးနီၢ်ပၤမုၣ်တဂၤအဃိ, လၢတၢ်သူၣ်ပိၢ်သးဝးအပူၤ, ပှၤလဲၤတၢ်ဖိလၢခီၣ် ခံဂၤန့ၣ်, ဟ့ၣ်လီၤဝဲ အခဲမရၣ်ဆူ နီၢ်ပၤမုၣ်အအိၣ်, ဒီးသုးဘူးအသးဆူ ရံးခၠၢး အကပၤ, ဒီးမၢဝဲဒၣ်နီၢ်ပၤမုၣ်လၢ ကဒိန့ၢ်တၢ်ဂီၤတဘ့ၣ် လၢအဝဲသ့ၣ်အဂီၢ်န့ၣ်လီၤ.

တၢ်မၤအသးဒ်သိးအံၤန့ၣ်, တမ့ၢ်တၢ်အဆိကတၢၢ်တဘျီ လၢပှၤတဂၤဂၤ တပာ်သူၣ်ပာ်သးဝဲဒၣ် ပှၤလၢအကါဒိၣ်တဂၤ အိၣ်လၢအကပၤဘၣ်န့ၣ်လီၤ. ဖဲ စီၤယၤကိာ် ထံၣ်လိာ်အသးဒီးကစၢ်ယွၤ လၢတၢ်မံမီၢ်အပူၤ, ဖဲဘ့ၤသ့လးဝံၤန့ၣ်ဒီး, စံးဝဲဒၣ်, “မ့ၢ်မးယွၤအိၣ်ဝဲလၢ တၢ်အလီၢ်တပူၤအံၤ, ဒီးယတသ့ၣ်ညါဘၣ်ယဲဘၣ်” (၁မိၤ ၂၈:၁၆) န့ၣ်လီၤ. ဒီးဖဲစီၤဖံလံးပူး စံးဘၣ် ကစၢ်ယ့ၣ်ရှူး, ဒ်သိးကဒုးနဲၣ် အပျဲၢ်အဘီၣ်တဖၣ်လၢ ပၢ်ကစၢ်ယွၤန့ၣ်ဒီး, ကစၢ်ယ့ၣ်ရှူး စံးဆၢက့ၤအီၤလၢ “စီၤဖံလံးပူးဧၢ, ယအိၣ်တ့ၢ်ဒီးသု ယံာ်ထဲအံၤဒီး, နတသ့ၣ်ညါ ယၤဘၣ်ဧါ. ပှၤလၢအထံၣ်ယၤန့ၣ်, မ့ၢ်အထံၣ်လံပၢ်” (ယိၤ ၁၄:၉) န့ၣ်လီၤ. ဒ်ပှၤလဲၤတၢ် လၢခီၣ်ခံဂၤန့ၣ်အသိး, မ့ၢ်လၢပှၤတၢ်မၢဖိတဖၣ် တသ့ၣ်ညါနီၣ် “ကစၢ်ယ့ၣ်ရှူး” မ့ၢ် ပၢ်ကစၢ်ယွၤတဂၤဃီဘၣ်အဃိ, အိၣ်ကတဲာ်ကတီၤပာ်အသးလၢ ကဟ့ၣ်လီၤဝဲ ခဲမရၣ်ဆူ ကစၢ်ယ့ၣ်ရှူးအအိၣ် (:၁၀-၁၁) န့ၣ်လီၤ.

ဒ်မုၢ်တနံၤအံၤ, ပှၤတသ့ၣ်ညါနီၣ် နီၢ်ပၤမုၣ်အသိး, ကစၢ်ယ့ၣ်ရှူးစ့ၢ်ကီး, အဝဲမ့ၢ်မတၤတဂၤနီၢ်နီၢ်လဲၣ်န့ၣ် ပှၤတသ့ၣ်ညါနီၣ်အီၤထီဘိဘၣ်. ကစၢ်ယ့ၣ်ရှူး အတၢ်မ့ၢ်တၢ်န့ၣ် လဲၤတလၢကွံာ် “ပှၤကူၣ်ဘၣ်ကူၣ်သ့ သရၣ်တဂၤ” (မ့) “ခိၣ်နၢ်အဒိၣ်အထီလၢ အသိၣ်လိနဲၣ်ယုၤတၢ်ဒီသူၣ်ပာ်သးလၢအဂ့ၤ” န့ၣ်လီၤ. ကစၢ်ယ့ၣ်ရှူး မ့ၢ်ကစၢ်ယွၤ, လၢအကဲထီၣ် တၢ်ညၣ်, ဒီးဟီၣ်ခိၣ်ဒီဘ့ၣ် အစီၤပၤ (၁:၁၄, ၁၈:၃၆) န့ၣ်လီၤ. ဖဲလၢပဃုထံၣ်န့ၢ် ကစၢ်ယ့ၣ်ရှူးန့ၣ်ဒီး, အဝဲမ့ၢ် ယွၤအတၢ်လီၣ်ဖျါဖးဒိၣ်တမံၤန့ၣ်လီၤ.