လၢယမဲာ်ချံအစ့ၣ်တကပၤန့ၣ် တၢ်သးဟဲပြုထီၣ် တကဝီၤဖိန့ၣ်, ယကမၤဘၢအီၤအဂီၢ်, ယစူးကါတၢ်ဖှူမဲာ်န့ၣ်လီၤ. တၢ်အံၤ ကျၢၢ်ဘၢန့ၢ် ယတၢ်ခူသူၣ်တမံၤအံၤ တစိၢ်တလီၢ်ဖိ န့ၣ်လီၤ. ဘၣ်ဆၣ်, တၢ်ဆၢကတီၢ် ယံာ်ထီၣ်ဒီး, ယမဲာ်သၣ်လိၤတၢ်အဖီးဂီၤကဝီၤဖိတဖၣ် ဟဲညိးအါထီၣ်အဃိ, အလီၢ်အိၣ်လၢ ယကဘၣ်ကူစါယါဘျါယသးန့ၣ် ယသ့ၣ်ညါ ယဲဒၣ်န့ၣ်လီၤ. မုၢ်တဂီၤလၢ ယကဘၣ်လဲၤထံၣ်လိာ်သးဒီးကသံၣ်သရၣ်အကတီၢ်န့ၣ်, တၢ်လ့ပစီလီၤဘၣ်ယၤ ဒ်ညီနုၢ်ယမၤယဲအသိး, ယကဖှူဘၢအီၤ လၢတၢ်ဖှူမဲာ်ဘၣ်ဆၣ်, ယတမၤယဲဘၣ်. ယအဲၣ်ဒိးလၢ ကသံၣ်သရၣ် ကထံၣ်သ့ၣ်ညါ ယတၢ်ဂ့ၢ်ကီအံၤဆှဲဆှဲဖိ, ဒီးကယါဘျါမၤဘၣ်လိာ်ဘၣ်စးက့ၤဝဲခဲလၢာ်အဂီၢ်န့ၣ်လီၤ.
နဂုာ်ကျဲးစၢးပာ်ခူသူၣ် တၢ်ဒဲးဘး အတၢ်ဂ့ၢ်ကီ မ့ၢ်အိၣ်စ့ၢ်ကီးတဘျီဘျီဧါ. နတၢ်ဟူးတၢ်ဂဲၤ (မ့) နသးအတၢ်ဆိကမိၣ်တနီၤနီၤ ပၢၤဃာ်တြီဃာ်နၤန့ၣ်, နကသ့ၣ်ညါနဲ ဘၣ်ဆၣ်, နကဃ့ထုကဖၣ်လၢ နတၢ်ဂ့ၢ်ကီအံၤအဂီၢ်, (မ့) နကပာ်ဖျါယၢၤထီၣ်အီၤဆူ နတံၤသကိး, ဒီးနဟံၣ်ဖိဃီဖိန့ၣ် နပဒ့ၣ်ဟးဆှဲးတ့ၢ်နဲဧါ. မ့ၢ်လၢပှၤအါဒံအါဂၤစ့ၢ်ကီး, ဘၣ်ကွၢ်ဆၢၣ်မဲာ်ဒီးတၢ်ဂ့ၢ်ကီ ဒ်သိးအံၤအဃိ, နကဆိကမိၣ်သ့ၣ်သ့ၣ်လၢ နတၢ်ဂ့ၢ်ကီန့ၣ် တမ့ၢ်တၢ်ဖးဒိၣ်ဖးသွါဘၣ်န့ၣ်ဧါ. ဘၣ်ဆၣ်, လၢတၢ်ခူသူၣ်အပူၤ, ဖဲပတၢ်ဒဲးဘး မ့ၢ်မၤကီမၤတံာ်တာ် ပတၢ်အိၣ်မူန့ၣ်ဒီး, ပကဒိၣ်ထီၣ်ထီထီၣ်လၢ သူၣ်ဂ့ၢ်သးကျိၤန့ၣ် တသ့ဝဲဒၣ်ဘၣ်န့ၣ်လီၤ. ဒ်ကတိၤ ၂၈:၁၃ ပာ်ဖျါဝဲအသိး “ပှၤလၢအကျၢၢ်ဘၢအတၢ်သရူးကမၣ်န့ၣ် တဘီၣ်ထီၣ်ညီထီၣ်ဘၣ်ဘၣ်. မ့မ့ၢ်ပှၤလၢအတဲလီၤကျဲၤလီၤ, ဒီးညိကွံာ်ဝဲန့ၣ် ကဒိး တၢ်သးကညီၤ” န့ၣ်လီၤ.
ပကထံၣ်န့ၢ် ပတၢ်ဟူးတၢ်ဂဲၤတဖၣ် ဒ်ကစၢ်ယွၤ ထံၣ်ဝဲအသိး, ဒီးပကအၢၣ်လီၤ တူၢ်လိာ် ပဖံးတၢ်မၤတၢ်တနီၤ ကမၣ်ဝဲန့ၣ် ကဲထီၣ်တၢ်ကီတၢ်ခဲသ့ဝဲဒၣ်န့ၣ်လီၤ. ဘၣ်ဆၣ်, ကစၢ်ယွၤ အတၢ်သးကညီၤ မၤဖှံထီၣ်ညီထီၣ် ပတၢ်ဆီၣ်လီၤသးလၢအမဲာ်ညါန့ၣ်လီၤ. ဖဲပတူၢ်လိာ်မုာ် ကစၢ်ခရံာ် အသးစီဆှံ အစိအကမီၤဆူ ပတၢ်ဂဲၤလိာ်တဖၣ်အပူၤန့ၣ်ဒီး, ပကပဒ့ၣ်ဟးဆှဲးကွံာ် တၢ်မၤကမၣ်တၢ် လၢအလ့ပစီပှၤ (ကလၤ ၅:၁၆-၁၇, ၂၂-၂၄) သ့ဝဲဒၣ်န့ၣ်လီၤ. ကစၢ်ယွၤ မ့ၢ်နဲၣ်ဆှၢပှၤန့ၣ်ဒီး, လၢပတၢ်အိၣ်မူန့ၣ် တၢ်ဆီတလဲအသး အိၣ်ကဲထီၣ်အသးသ့ဝဲ, ဒီးပဂ့ၤဂုာ်ကျဲးစၢးဝဲလၢ ပနီၢ်သး အတၢ်ဂုၤထီၣ်ပသီထီၣ်အဂီၢ်န့ၣ်လီၤ.
