ဒီးကထၢၣ် ဒူလံးတဲၣ် (Dolittle), မ့ၢ်တၢ်တဲပူမုာ်နၢ် ကသံၣ်သရၣ်တဂၤအဂ့ၢ်, လၢကတိၤသကိးတၢ်ဒီးဆၣ်ဖိကီၢ်ဖိတဖၣ်န့ၣ် မၤသူၣ်ဖှံသးညီ ကမျၢၢ်အါဒံအါဂၤအသး ခီဖျိလၢလံာ်ပူတၢ်ကွဲး, တၢ်ဂီၤမူ, ဒီးလၢတၢ်ဂဲၤဒိတဖၣ်န့ၣ်လီၤ. ဘၣ်ဆၣ်, ထဲဒၣ်ပှၤကညီစှၤဂၤ သ့ၣ်ညါဝဲဒၣ် ပှၤကွဲးလံာ် ဟူး လီး(ဖ)တ့ၣ် (Hugh Lofting) အဂ့ၤ, ဒီးအဆိန့ၣ် အဝဲကွဲး ဒူလံးတဲၣ် တၢ်တဲပူမုာ်နၢ်လၢ အဖိတဖၣ်အဂီၢ်, ဖဲဟီၣ်ခိၣ်ဒီဘ့ၣ် တၢ်ဒုးဖးဒိၣ် တၢတဘျီန့ၣ်, လၢတၢ်ပျံၤတၢ်ဖုးအပူၤ, အဝဲသ့ၣ်ဘၣ်ဃ့ၢ်ပူၤဖျဲးအသးသမူလၢဒုၣ်ဒါ လၢဟီၣ်လာ် တၢ်ကျိၤတဖၣ်အပူၤအကတီၤန့ၣ်လီၤ. လၢခံ, အဝဲစံးဝဲဒၣ်လၢ တၢ်ပာ်ဖျါထီၣ်က့ၤ တၢ်ဒုးတၢ်ယၤအဂ့ၢ် လၢအတၢ်ကွဲးတဖၣ်အပူၤန့ၣ် တမုာ်တလၤ, ဒီးလီၤသးဟးဂီၤဒိၣ်မးအဃိ, လၢအလီၢ်န့ၣ် ကွဲးဝဲဒၣ် တၢ်ကွဲးပူလၢအအိၣ်ဒီးတၢ်ဂီၤတဖၣ်န့ၣ်လီၤ. ပူမုာ်နၢ်တဖၣ် အိၣ်ဟဲထီၣ်လၢ သးအတၢ်ဆိကမိၣ်ဘၣ်ဆၣ်, ပှဲၤလုၣ်ကွံာ်ဒီးတၢ်သးခုအဃိ, လီး(ဖ)တ့ၣ် ထီဒါဆီၣ်ဖျိ တၢ်ဒုးတၢ်ယၤ အတၢ်လီၤပျံၤလီၤဖုးတဖၣ် ခီဖျိအတၢ်ကွဲးပူမုာ်နၢ်တဖၣ်န့ၣ်လီၤ.

ဖဲပထံၣ်ဘၣ် ပှၤတဂၤ, လၢအထီဒါတၢ်ဂံၢ်အသဟီၣ်တမံၤ, လၢအကမၤပျံၤမၤဖုးတၢ်, လၢအကမၤဆံးလီၤစှၤလီၤ ပှၤအသူးသ့ၣ်လၤကပီၤ, လၢအဖျါဒိၣ်စိဒိၣ်ကမီၤတုၤဒၣ်လဲာ်, တၢ်ကမၤနၢၤတန့ၢ်တသ့အဂ့ၢ်န့ၣ် ကဲထီၣ်တၢ်န့ၢ်ဂံၢ်န့ၢ်ဘါလၢပဂီၢ်န့ၣ်လီၤ. မ့ၢ်လၢပပျံၤတၢ်ဘၣ်ယိၣ်တၢ်လၢ တၢ်တတီတလိၤ, တၢ်စုဆူၣ်ခီၣ်တကးအတၢ်မၤ, ဒီးတၢ်သူၣ်လီၤသးကွံတဖၣ် ကမၤနၢၤကွံာ်တၢ်အဃိ, ပဘၣ်ယူးယီၣ်ပးကဲ တၢ်သူၣ်ဒူသးဒူ လၢအတူၢ်တၢ်န့ၢ် ဒ်သိးအံၤန့ၣ်လီၤ. ဘၣ်တဘျီဘျီန့ၣ်, ပပျံၤဘၣ်ယိၣ်တၢ်လၢ ဟီၣ်ခိၣ်ဒီဘ့ၣ်န့ၣ် ကဘၣ် “တၢ်မၤနၢၤလၢ တၢ်အၢတၢ်သီ ” (ရိမ့ၤ ၁၂:၂၁) န့ၣ်လီၤ. လၢပသးဒီးပကစၢ်ဒၣ်ဝဲအဂီၢ်န့ၣ်တၢ်ပျံၤတၢ်ဖုးတဖၣ် ကအိၣ်ဂၢၢ်ဆိးကျၢၤဝဲလၢပပူၤန့ၣ်လီၤ. ဘၣ်ဆၣ်, ကစၢ်ယွၤ တပျဲဝဲလၢပတူၢ်ခီၣ်တၢ် ထဲပကစၢ်ဒၣ်ဝဲဘၣ်. ကစၢ်ယွၤ မၤပှဲၤပှၤ လၢအဂံၢ်အဘါ, ဆီလီၤပာ်လီၤပှၤလၢ တၢ်မၤသကိးတၢ်, ဒီးကိးပှၤဒ်သိးပက “မၤနၢၤတၢ်အၢလၢ တၢ်ဂ့ၤ” (:၂၁) အဂီၢ်န့ၣ်လီၤ.

ပဝဲတဂၤစုာ်စုာ် ပကမၤနၢၤ တၢ်အၢတၢ်သီလၢတၢ်ဂ့ၤ ခီဖျိလၢကျိၤကျဲတဖၣ်, ကယဲၢ်ယွၤဟ့ၣ်လီၤတ့ၢ်ဝဲ လၢပသူၣ်ပသးအပူၤန့ၣ်လီၤ. ပှၤတနီၤန့ၣ်, ကကွဲးဝဲ တၢ်တဲပူအဃံအလၤတဖၣ်, ပှၤတနီၤန့ၣ်, ကကွၢ်ထွဲကဟုကယာ်ပှၤဖှီၣ်ပှၤယာ်ဖိတဖၣ်လီၤ. ပှၤတနီၤန့ၣ်, ဒုးကဲထီၣ် အဟံၣ်အဃီလၢ တၢ်သ့တၢ်တူၢ်လိာ်မုာ်တၢ်အလီၢ်အကျဲန့ၣ်လီၤ. ပှၤတနီၤနီၤန့ၣ်, ကနီၤဟ့ၣ် ကစၢ်ယွၤ အဂ့ၢ် ခီဖျိလၢတၢ်သူၣ်ဝံၣ်သးဆၢ, ထါ, (မ့) တၢ်စံးကတိၤသကိးတၢ်န့ၣ်လီၤ. လၢကျိၤကျဲအါဘိအပူၤန့ၣ်, ဒ်ပစိာ်မူစိာ်ဂဲၤ ယွၤအတၢ်ဂ့ၢ်တၢ်ဝါ, ဒီးအတၢ်ဃူတၢ်ဖိးဆူဟီၣ်ခိၣ်ချၢ (:၁၈), ဒီးပကမၤနၢၤ တၢ်အၢတၢ်သီ လၢပသးသမူအတၢ်လဲၤအပူၤန့ၣ်လီၤ.