အဲၣ်နံတၣ် ဘ့လ့ၣ် (Anita Bailey) တဂၤ ဖဲအဒိးန့ၢ်ဝဲ အဖိခွါ ဂျ့လဲၣ် (Jalen) အဂ့ၢ်တၢ်ကစီၣ် လၢတၢ်ရ့လိာ်မုာ်လိာ် ပှာ်ပျးစဲအပူၤ, “တနံၤအံၤ, လၢတၢ်ဘါ သရိာ်န့ၣ် ယဘၣ်သဂၢၢ်တူၢ်လိာ်မုာ် ပှၤဟဲထီၣ်ဘါယွၤတဖၣ်အကတီၢ်, ပိာ်ခွါ သးစၢ် လၢအစိာ်ဖိသၣ်တဂၤ ဟဲဆူယအိၣ်, ဒီးဖိးဟုဃာ်ယၤန့ၣ်လီၤ. ယကွၢ်အီၤတစိၤဖိဝံၤ, ယသ့ၣ်ညါနီၣ်အီၤအဃိ, ယစံးယဲလၢ, ဂျ့လဲၣ် ဧၢ, ပဖိးဟုလိာ်ပသး, ဒီးကတိၤသကိးတၢ်ဖုၣ်ကိာ်န့ၣ်လီၤ. မ့ၢ်ဝဲသးစၢ်လၢ အိၣ်မူအိၣ်ဂဲၤဂ့ၤဂ့ၤဘၣ်ဘၣ်တဂၤလီၤ” န့ၣ်ဒီး, အသးမုာ်ထီၣ်ဝဲဒၣ်န့ၣ်လီၤ. ပှၤသဂၢၢ်တူၢ်လိာ်မုာ်တၢ်တဂၤအံၤ သ့ၣ်ညါတ့ၢ်ဝဲ “ဂျ့လၣ်” လၢအတဒိကနၣ်, ပူထီၣ်တၢ်အကတီၢ်, ဃုထၢကျဲလၢ အတဂ့ၤတဘၣ်, ဒီးလၢအဂီၢ် တၢ်အစၢပိာ်ထွဲထီၣ်အခံန့ၣ် မ့ၢ်ဝဲဒၣ်, ဘၣ်လီၤဝဲဒၣ်ဃိာ် (၁၂) နံၣ်အဃိ, ဒ်သိးကမၤစၢၤ အဖိခွါအဂီၢ်, အဲၣ်နံတၣ်ဒီးအဝၤ, အဲး(ဒ) (Ed) န့ၣ် အသးကလၢၢ်ဘၣ်ဝဲ ဒ်အဂံၢ်အဘါတအိၣ်လၢၤဘၣ်န့ၣ်လီၤ.
ဘ့လ့ၣ် အနီၣ်ဒီမိၤဝၤခံဂၤ, အသးကလၢၢ်ဘၣ်ဝဲ ဒ်အစုကတၢၢ်ခီၣ်ကတၢၢ် အသိးဘၣ်ဆၣ်, တမ့ၢ်လၢအတအိၣ်ဒီးတၢ်ဃ့ထုကဖၣ်တၢ်ဘၣ်. ဒ် ၂ ကွဲးနီၣ်တၢ် ၂၀ ပာ်ဖျါဝဲအသိး, စီၤပၤ ယဟိရှၤဖး စ့ၢ်ကီး, အဂံၢ်အဘါတအိၣ်လၢၤဘၣ်န့ၣ်လီၤ. ဖဲဒုၣ်ဒါသုးမုၢ်တဖၣ်လၢ ပာ်ဖှိၣ်ဟဲဒုးအီၤအကတီၢ်, အဝဲကိးထီၣ် ပှၤယူၤဒၤဖိတဖၣ် ကအိၣ်ဖှိၣ်ရိဖှိၣ်, ဒီးဃ့ထုကဖၣ်တၢ်လၢယွၤ (:၁-၄) န့ၣ်လီၤ. အဆၢဖိ ၁၂ အပူၤန့ၣ် ဃ့ထုကဖၣ်ဝဲဒၣ်လၢ “ပကစၢ်ဧၢ, နတစံၣ်ညီၣ်အီၤဘၣ်ဧါ. အဂ့ၢ်ဒ်အံၤ, ပဂံၢ်ပဘါ တအိၣ်ဘၣ်လၢ ပှၤဂီၢ်မုၢ်ဖးဒိၣ်အမဲာ်ညါ လၢအဟဲထီဒါပှၤအံၤဘၣ်. ဒီးပကမၤ ဒ်လဲၣ်ဒ်လဲၣ်န့ၣ် ပတသ့ၣ်ညါဘၣ်. မ့မ့ၢ်ပမဲာ်အိၣ်ဝဲဆူနအိၣ်” န့ၣ်လီၤ.
မ့ၢ်နသးကလၢၢ်ဘၣ်ဝဲလၢ နဂံၢ်နဘါတအိၣ်, (မ့) တၢ်အိၣ်အသးမၤအသးလၢတၢ်ပူၤဖျဲးကျိၤကျဲတအိၣ်, တၢ်လၢနဟံးဃာ်ပၢၤဃာ်တန့ၢ်တသ့န့ၣ် မ့ၢ်အိၣ်တမံၤမံၤဧါ. ထဲနၤတဂၤဧိၤမ့ၢ်ဂ့ၤ, တၢ်ပာ်ဖှိၣ်ဃ့ထုကဖၣ်သကိးဒီးပှၤဂၤမ့ၢ်ဂ့ၤ, ဘၣ်မနုၤအဃိ နတဃ့ထုကဖၣ်နဲလဲၣ်. တချုးလၢ ကစၢ်ယ့ၣ်ရှူး ဘၣ်တၢ်မၤသံအီၤ, လၢထူၣ်စုညါအကတီၢ်, ဃ့ထုကဖၣ်ဝဲဒၣ် (လူၤ ၂၂:၃၄-၄၄) န့ၣ်လီၤ. တၢ်ထုကဖၣ် အလီၢ်ကဝီၤ မ့ၢ်တၢ်လီၢ်စီဆှံတတီၤ လၢပှၤအဂံၢ်ဘါတအိၣ်တဖၣ် ဃ့ထုကဖၣ်သကွံကညး ကစၢ်ယွၤ, လၢအဂံၢ်ဆူၣ်ဘါဆူၣ်တဂၤအအိၣ်, ခီဖျိလၢကစၢ်ယ့ၣ်ရှူးအမံၤန့ၣ်လီၤ.
