မ့ၢ်လၢအတၢ်စူၢ်တၢ်နာ် ကစၢ်ယ့ၣ်ရှူးအဂၢၢ်အကျၢၤအဃိ, ပှၤအၤဖြံၤကၤဖိ ပှၤစိာ်တၢ်သးခုကစီၣ်, ပှၤလၢအမံၤ တဘၣ်တၢ်ပာ်ပနီၣ်အီၤတဂၤ, တချုးတၢ်မၤသံအီၤ ဒ်မၤထူရၤတဂၤအသိးန့ၣ်, ကွဲးတ့ၢ်ဝဲ “မၢ်ထူရၤတဂၤ အတၢ်ထုကဖၣ်” န့ၣ်လီၤ. စိၤအဂၤတစိၤ အတၢ်ကစီၣ် အဒိၣ်အယိာ်တမံၤအံၤ ဘၣ်တၢ်သ့ၣ်ညါအီၤလၢ “တၢ်ရ့လိာ်မုာ်လိာ်လၢ တၢ်မဲာ်ဆှးအလီၢ်တအိၣ်” (The Fellowship of the Unashamed) န့ၣ်လီၤ. တၢ်အိၣ်ဖှိၣ်သရၣ်တဂၤအံၤ အတၢ်ကတိၤတဖၣ်န့ၣ် တၤဝဲဒၣ် ပှၤလၢအစူၢ်က့ၤနာ်က့ၤ ကစၢ်ယ့ၣ်ရှူးတဖၣ်ခဲလၢာ်န့ၣ်လီၤ. တၢ်တၤတမံၤလၢ အဒုးနၢ်ဟူထီၣ်က့ၤပှၤ တၢ်မၤဖိ စီၤပီလူး အတၢ်ကတိၤတဖၣ်, ဖျါဖဲ ၂တံၤ ၁:၈ အပူၤ, ကွဲးဆှၢလီၤဝဲဒၣ်ဆူ အတံၤသကိးသးစၢ် စီၤတံၤမသ့းအအိၣ်, ဒီးစံးဝဲဒၣ် “တၢ်အုၣ်အသးဘၣ်ဃးဒီး ပကစၢ်မ့ၢ်ဂ့ၤ နသုတမဲာ်ဆှးတဂ့ၤ” န့ၣ်လီၤ. အဂ့ၢ်ဒ်အံၤ, သးစီဆှံ ဟ့ၣ်ပှၤလၢ “ပသးဘၣ်ဃးဒီးတၢ်စီတၢ်ကမီၤ, ဒီးတၢ်အဲၣ်တၢ်ကွံ, ဒီးတၢ်သူၣ်ဂၢၢ်သးကျၢၤ” (:၇) အဃိန့ၣ်လီၤ.
ဖဲအံၤ, အၤဖြံၤကၤ တၢ်အိၣ်ဖှိၣ်သရၣ် လၢအအိၣ်တီအိၣ်လိၤဝဲဒီးယွၤတဂၤန့ၣ် ကွဲးပာ်ဖျါဝဲ, “ယမ့ၢ်ပှၤလၢအဘၣ်ထွဲဒီးတၢ်ရ့လိာ်မုာ်လိာ်လၢ တၢ်မဲာ်ဆှးအလီၢ်တအိၣ်တဖၣ်န့ၣ်လီၤ. ယပာ်လီၤယဲယသးလံ. ယမ့ၢ်ခရံာ်အပျဲၢ်အဘီၣ်တဂၤ, ဒီးယတက့ၤဆူယလီၢ်ခံ, ယတဟ့ၣ်လီၤယသး, ယတမၤယံာ်မၤဃၢယသး, ဃၣ်ကဒါက့ၤယသး (မ့) ယတအိၣ်ဃိကလာ်ဘၣ်. တၢ်ပှ့ၤက့ၤ ယတၢ်အိၣ်မူလၢအပူၤကွံာ်န့ၣ်လံ. ယတၢ်မ့ၢ်တၢ် ခ့ခါအကတီၢ်အံၤ အိၣ်ဒီးအခီပညီလံန့ၣ်လီၤ. ယတၢ်အိၣ်မူခါဆူညါန့ၣ် အိၣ်ဘံၣ်အိၣ်ဘၢဝဲဒၣ်လံ… ယအိၣ်မူယဲလၢတၢ်စူၢ်တၢ်နာ်, သန့ယသးလၢ ယွၤအိၣ်ဒီးယၤ, ယလဲၤယဲဒီးတၢ်သူၣ်စူၤသးစူၤ, မုၢ်လၢ်တၢ်ထုကဖၣ်ယဲ, ဒီးယမၤတၢ် ခီဖျိသးမုာ်စီဆှံအတၢ်ဟ့ၣ်စိဟ့ၣ်ကမီၤယၤအပူၤန့ၣ်လီၤ.”
စီၤတံၤမသ့း, ဒီးတၢ်အိၣ်ဖှိၣ်သရၣ်ခံဂၤလိာ် ဘၣ်လဲၤခီဖျိကွၢ်ဆၢၣ်မဲာ် တၢ်ကီတၢ်ခဲတဖၣ်န့ၣ်, ပတလဲၤခီဖျိဘၣ်ဝဲနီတဘျီဘၣ်ဆၣ်, ဖဲတၢ်မၤကွၢ်ပတၢ်စူၢ်တၢ်နာ်အကတီၢ်, ဒ်သိးပကအိၣ်ဂၢၢ်ဆိးကျၢၤအဂီၢ်, အဝဲသ့ၣ် အတၢ်ကတိၤတဖၣ် တၤပှၤန့ၣ်လီၤ. ဒ်အဆၢဖိ ၁၂ ပာ်ဖျါဝဲဒၣ် ကစၢ်ယွၤ “ကပၢၤတၢ်လၢ ယ(ပ)ပာ်လၢအစုပူၤသ့ဝဲ တုၤမုၢ်နံၤတနံၤ” အံၤအသိး, ယွၤကဟံးဃာ်ပၢၤဃာ် ပတၢ်အိၣ်မူ, ဒီးခါဆူညါတၢ်ကမၤ အသးတဖၣ်အဃိ, လၢပဂီၢ်တၢ်မဲာ်ဆှးအလီၢ်တအိၣ်လၢၤဘၣ်န့ၣ်လီၤ.
