ယကွၢ်ယလံၤမုၣ်ဖိ လ့လၣ်နံၣ် (Leilani), အသးအိၣ်ဒံးဒၣ် ခံလါဘျဲၣ်ဖိန့ၣ် ယစံးဘၣ်အီၤလၢ “နက့ၢ်ဂီၤဖျါထံဆးဒိၣ်မး” န့ၣ်လီၤ. ဖဲယကတိၤတၢ်ဒီးအီၤအကတီၢ်, အဝဲသွံးထီၣ်အမဲာ်တူၢ်ခိၣ်ဖိ, ဒီးကွၢ်ထံကွၢ်ဆးဝဲယမဲာ်သၣ်န့ၣ်လီၤ. ယစံးဘၣ်အီၤ “တၢ်လၢယအဲၣ်ဒိးတဲလီၤတံၢ်နၤ လၢဟီၣ်ခိၣ်ချၢအံၤ နကဘၣ်သ့ၣ်ညါလၢ နမိမိၢ်အဲၣ်နၤ, နပါပၢ်အဲၣ်နၤ, ဖံဖံ, ဒီးဖုဖုစ့ၢ်ကီးအဲၣ်နၤန့ၣ်လီၤ. ကယဲၢ်တၢ်အဂ့ၤကတၢၢ်တဖၣ်အကျါတမံၤန့ၣ်, ကစၢ်ယ့ၣ်ရှူးအဲၣ်နၤ, ဒီးတၢ်တမံၤအံၤ မ့ၢ်တၢ်အကါဒိၣ်ကတၢၢ်န့ၣ်လီၤ.
ဒ်တၢ်အၢၣ်ပျဲမုၢ်အတၢ်ကပီၤ လဲၤခီအီၤအသိး, တၢ်မၤအသးန့ၣ် အမဲာ်တူၢ်ဖိလၢအသွံးထီၣ်ဝဲန့ၣ် ဟါမၢ်ကွံာ်, ဒီးတၢ်နံၤကမှံၤလၢအမဲာ်သၣ်ဖိန့ၣ် မၤပှံၢ်လီၤ ယသးဒီဖျၢၣ်န့ၣ်လီၤ. ဒ်ဖံဖုအဂၤတဖၣ်အသိး ယအဲၣ်ဒိးနာ်ယဲလၢ ယလံၤမုၣ်ဖိ ကနၢ်ပၢၢ်ယၤန့ၣ် ကမ့ၢ်ဝဲယတၢ်စံးကတိၤကါတၢ်န့ၣ်လီၤ. ဘၣ်ဆၣ်, တၢ်သးခုလၢယတၢ်ကတိၤတဖၣ်အပူၤန့ၣ် ဖျါလၢအသ့ၣ်ညါဝဲသ့ၣ်သ့ၣ်န့ၣ်လီၤ. အတၢ်နံၤကမှံၤကဆှီဒီဖိ, လၢအတအိၣ်ဒီးတၢ်သရူးကမၣ်, အိၣ်ဖျါကပီၤထီၣ်လၢအမဲာ်သၣ်ဖိန့ၣ် ဒုးသ့ၣ်နီၣ်ထီၣ်ယၤ ကစၢ်ယ့ၣ်ရှူး စံးကတိၤဝဲလၢ မၢ် ၁၀:၁၅ အပူၤ, “ပကဘၣ် ဒိးန့ၢ်ယွၤအဘီအမုၢ်ဒ်ဖိသၣ်အသိး” န့ၣ်လီၤ.
ကစၢ်ယ့ၣ်ရှူး စံးဝဲဒၣ် တၢ်ကတိၤတဖၣ်အံၤ ဖဲ “ပှၤဟဲစိာ်ဖိသၣ်တဖၣ်” ဆူအအိၣ်, ဒ်သိး “ကပာ်အစုလၢအလိၤ” ဒီးကဆိၣ်ဂ့ၤဝဲဖိသၣ်တဖၣ် (:၁၃,၁၆) အဂီၢ်န့ၣ်လီၤ. ဘၣ်ဆၣ်, အပျဲၢ်အဘီၣ်တဖၣ် ဆိကမိၣ်ဝဲဒၣ်လၢ ကစၢ်ယ့ၣ်ရှူး အတၢ်ဖံးတၢ်မၤအါ, (မ့) မ့ၢ်ပှၤအကါဒိၣ်တဂၤအဃိ, “ဒူပှၤလၢ အဟဲစိာ်အီၤတဖၣ်အလိၤ” န့ၣ်လီၤ. ဒီးကစၢ်ယ့ၣ်ရှူး ထံၣ်ဝဲဒီးတဘၣ်ဘၣ်အသးဘၣ် (:၁၄-၁၅) န့ၣ်လီၤ.
ညီနုာ်ဖိသၣ်တဖၣ် အန့ဆၢၣ်အိၣ်ဝဲဒၣ်လၢ တၢ်ဆီၣ်လီၤသး, ဒီးတၢ်သန့ၤလီၤသးလၢပှၤဂၤန့ၣ်လီၤ. လၢကစၢ်ခရံာ်အပူၤ, ဒ်သိးပကဒိးန့ၢ် ယွၤအတၢ်သးကညီၤ အဂီၢ်, ပဝဲစ့ၢ်ကီးပကဘၣ် စူးကွံာ်ညိကွံာ် ပတၢ်ပာ်ထီၣ်ထီသး, ဒီးအၢၣ်လီၤပသးလၢ ပလိၣ်ဘၣ်ကစၢ်ယွၤ လၢတၢ်ခဲလၢာ်အပူၤန့ၣ်လီၤ. ပမ့ၢ်မၤဒ်သိးအံၤန့ၣ်ဒီး, ကစၢ်ယွၤကဆီတလဲဝဲဒၣ် ဟီၣ်ခိၣ်လၢတၢ်မုၢ်လၢ် တအိၣ်ဝဲအလီၢ်အကျဲန့ၣ်ဆူ တၢ်အၢၣ်လီၤအီၤလီၤ တၢ်မူအထူအယိာ်ဒီးကစၢ်ယွၤန့ၣ်လီၤ. ဒီးတၢ်အိၣ်အသးအံၤ အလီၢ်အိၣ်လၢပကဘၣ်နံၤကမှံၤဝဲဒၣ်န့ၣ်လီၤ.
