တၢ်ကစီၣ်န့ၣ် လီၤပျံၤလီၤဖုးဒိၣ်မးန့ၣ်လီၤ. ပှၤမၤစၢၤ ဟံၣ်ဃီအတၢ်ဖံးတၢ်မၤတဂၤလၢအလဲၤမၤတၢ်အဟံၣ်, ဟံၣ်ဖိဃီဖိတဖၣ်မၤအၢမၤနးအီၤအဃိ, သံဝဲဒၣ်န့ၣ်လီၤ. အကတၢၢ်န့ၣ် ဟံၣ်ကစၢ်တဖၣ် ဘၣ်လီၤဝဲဒၣ်ဃိာ်ဘၣ်ဆၣ်, ယသးကလၢၢ်ဘၣ်ယဲလၢ တၢ်အံၤတလၢပှဲၤဒံးဘၣ်န့ၣ်လီၤ. ဒ်ပိာ်မုၣ်ဖိအံၤ ဘၣ်လဲၤခီဖျိဝဲအသိး, ဟံၣ်ကစၢ် တဖၣ်ကြၢးတူၢ်ဘၣ် တၢ်နးတၢ်ဖှီၣ်, ဒီးကြၢးသံဝဲန့ၣ်လီၤ. တၢ်အံၤမ့ၢ်ဒၣ် ယတၢ်ဆိကမိၣ်န့ၣ်လီၤ. ဝံၤန့ၣ်ဒီး, ယဆိကမိၣ်ထီၣ်က့ၤဝဲလၢ ယသးဒိၣ်ထီၣ်တၢ်အံၤ မ့ၢ်အလဲၤတလဲၤကွံာ် တၢ်အဆၢလံဧါ. ယဆိကမိၣ်တၢ်ဒ်သိးအံၤအဃိ, မ့ၢ်ကမၣ်လၢာ်လံဧၣ်.
ယဖးထါစံးထီၣ်ပတြၢၤ ၁၀၉ ဟ့ၣ်ထီၣ်ယၤ သးအတၢ်ထံၣ်ဆိကမိၣ်လၢပှၤကညီ အန့ဆၢၣ်, သးလၢအသ့ၣ်ညါတၢ်တီတၢ်လိၤန့ၣ်လီၤ. စီၤဒၤဝံး, မ့ၢ်ပှၤလၢအဘၣ်ဂဲၤလိာ် သးဒီးအတၢ်သူၣ်ဒိၣ်သးဒိၣ် ပှၤမၤနးမၤဖှီၣ် ပှၤဖှီၣ်ဖိယာ်ဖိ, ဒီးပှၤတအိၣ်လၢအိၣ်ပှဲၤတဖၣ်န့ၣ်လီၤ. ၁၀၉:၈-၉ န့ၣ် စီၤဒၤဝံး ဆိၣ်အၢဝဲဒၣ်လၢ “မ်အနံၤအသီ အိၣ်စှၤဝဲတက့ၢ်… မ်အဖိတဖၣ် ကဲထီၣ်ပှၤဖိၣ်ဃဲ, ဒီးအမါလၢ ပှၤမုၣ်ကမဲတက့ၢ်,” န့ၣ်လီၤ.
ဘၣ်ဆၣ်, စီၤပၤစီၤဒၤဝံး အိၣ်ဒီးအစိကမီၤ, လၢကဟ့ၣ်ကၣ်တၢ်အဂီၢ်ဒၣ်လဲာ်, တဟ့ၣ်ကၣ်ဝဲ ပှၤမၤအၢတၢ်ဖိတဖၣ်န့ၣ်ဘၣ်. လၢတၢ်အံၤအလီၢ်န့ၣ်, စီၤဒၤဝံး ဃာ်အသးဆူ ယွၤအအိၣ်, လၢအမ့ၢ် ပှၤစံၣ်ညီၣ်တီတၢ်, ဒီးပှၤအုၣ်က့ၤခီၣ်က့ၤတၢ်အမ့ၢ်အတီအဂံၢ်ထံးတဂၤန့ၣ်လီၤ. အဆၢဖိ ၂၀ န့ၣ် စီၤဒၤဝံး စံးဝဲဒၣ်လၢ “မ်တၢ်န့ၣ်ကဲထီၣ်ပှၤထီဒါယၤ, ဒီးပှၤလၢအစံးအၢယသးတဖၣ် အဘူးအလဲ လၢယွၤအစုပူၤန့ၣ်တက့ၢ်.” ဒီး အဆၢဖိ ၂၆ န့ၣ်, “မၤစၢၤယၤယွၤဧၢ, အုၣ်က့ၤခီၣ်က့ၤယၤ ဒ်နဘျုးနဖှိၣ်အသိးန့ၣ်တက့ၢ်” န့ၣ်လီၤ.
ယနာ်ယဲလၢ ကစၢ်ယွၤ တ့လီၤပှၤ,ဃုာ်ဒီးသးလၢအသ့ၣ်ညါ တၢ်တီတၢ်လိၤ န့ၣ်လီၤ. အဂ့ၢ်ဒ်အံၤ, သးလၢအသ့ၣ်ညါ တၢ်တီတၢ်လိၤအံၤ ဆဲးကပီၤဖျါထီၣ်က့ၤ ယွၤအက့ၢ်ဂီၤကံၢ်စီအဃိန့ၣ်လီၤ. ဒီးပပာ်ဖျါထီၣ် ပသးတူၣ်ဘၣ်ခီၣ်ဘၣ်တၢ်တီတီလိၤလိၤသ့ဝဲန့ၣ်လီၤ. ဘၣ်ဆၣ်, အကတၢၢ်န့ၣ်, ပကဘၣ်နာ်သန့ၤယွၤလၢ အဝဲကဟဲစိာ်န့ၢ် တၢ်စံၣ်ညီၣ်တီ ဖဲလၢအကတီၢ်ဒၣ်ဝဲ, ဒီးအကျဲဒၣ်ဝဲ, ဒီးဟ့ၣ်လီၤပာ်လီၤ တၢ်စံၣ်ညီၣ်, ဒီးတၢ်သိၣ်ဃီၣ်တဖၣ်ခဲလၢာ်ဆူ ယွၤအစုပူၤန့ၣ်လီၤ. ရိ ၁၂:၁၉ အပူၤန့ၣ် ပှၤတၢ်မၢဖိ စီၤပီလူး ပာ်ဖျါထီၣ်ဝဲဒၣ်ဖျိဖျိဖျါဖျါလၢ, “သုတမၤကၣ်တၢ်လၢသုဂီၢ်ဒၣ်သုဝဲတဂ့ၤ. မ့မ့ၢ်ပျဲ (ယွၤအတၢ်သးဒိၣ်) တၢ်သးဒိၣ်တက့ၢ်” န့ၣ်လီၤ.
